كيم چەن ىن. فوتو https://zrpress

قازاقستان وڭتۇستىك جانە سولتۇستىك كورەيا اراسىنداعى كەلىسسوزدەرگە كومەكتەسۋى مۇمكىن.

وسى اپتادا سەۋلدە ورنالاسقان «اسان» ساياسي زەرتتەۋلەر ينستيتۋتىنىڭ ديرەكتورى حان سىن دجۋ قازاقستان سىرتقى ىستەر مينيسترلىگى جانىنداعى سىرتقى ساياساتتى زەرتتەۋ ينستيتۋتىمەن ىنتىماقتاستىق تۋرالى مەموراندۋمعا قول قويدى. رەسمي وكىلدىڭ ايتۋىنشا، كورەيانى قازاقستاننىڭ يادرولىق قارۋدان باس تارتۋداعى بىرەگەي تاجىريبەسى قىزىقتىرادى.

وڭتۇستىك كورەياداعى ساياسي زەرتتەۋلەر ينستيتۋتىنىڭ ديرەكتورى حان سىن دجۋ: «يادرولىق قارۋعا يەلىك ەتكەن جانە ءوز ەركىمەن ودان باس تارتقان ەلدەر وتە از. قازاقستاندا وسىنداي تاجىريبە بار جانە ول ۇلگى بولىپ تابىلادى. سولتۇستىك كورەيا يادرولىق قارۋدان ارىلعىسى كەلمەيتىنىن كورسەتىپ وتىر. ءبىز تىكەلەي كەلىسسوزدەر جۇرگىزىپ، سولتۇستىك كورەيانى يادرولىق قارۋدان باس تارتۋعا سەندىرۋ ءۇشىن حالىقارالىق ۇيىمداردىڭ نەمەسە قازاقستان سەكىلدى ەلدەرىنىڭ كومەگى قاجەت. مەنىڭ ويىمشا، ءبىز سولتۇستىك كورەيانى قارۋسىزداندىرۋ قارۋلى قاقتىعىسسىز ءوتۋى كەرەك. سوندىقتان قازاقستان مەن كورەيا اراسىندا جاسالعان مەموراندۋمنىڭ ماڭىزى وتە زور»، – دەيدى.

بىلتىر قاڭتاردا سولتۇستىك كورەيا باسشىسى كيم چەن ىن يادرولىق قارۋ مەن قۇرلىقارالىق بالليستيكالىق زىمىران سىناعىن وتكىزۋگە جاريالانعان موراتوري اياقتالعانى تۋرالى مالىمدەدى. بۇعان قوسا ول جاقىن بولاشاقتا ستراتەگيالىق قارۋدىڭ جاڭا ءتۇرىن كورسەتۋگە ۋادە ەتكەن.

كحدر-ءدىڭ بالليستيكالىق زىمىران ۇشىرۋىن حالىقارالىق ۇيىمدار ايىپتاپ كەلەدى. 2017 جىلى قازاقستان دا بۇل ماسەلەدە ءوز ۇستانىمىن بىلدىرگەن. ال اقش-تىڭ تالاپتارىنا كيم چەن ىن اق ءۇيدى پحەنيانعا «گانگستەرلەرشە تالاپ قويدى» جانە وڭتۇستىك كورەيامەن بىرلەسكەن اسكەري جاتتىعۋ وتكىزىپ، «دۇشپاندىق پيعىل تانىتىپ وتىر» دەدى.

"The Qazaq Times"