دجو بايدەن جانە ۆلاديمير پۋتين. فوتو: اشىق دەرەككوز

اقش اشىق اسپان تۋرالى كەلىسىمشارتتى قالپىنا كەلتىرمەيدى. بۇل تۋرالى اق ءۇي باسشىسى دجو بايدەن مالىمدەدى.

ەندى رەسەي مەن اقش اراسىندا قارۋ-جاراققا باقىلاۋ جاساۋ كەلىسىمى عانا كۇشىندە بولادى. بىلتىر قاراشادا رەسمي ۆاشينگتون اتالعان كەلىسىمشارتتان شىققان بولاتىن. ەكس-پرەزيدەنت دونالد ترامپ رەسمي ماسكەۋ ەرەجەلەردى بىرنەشە رەت بۇزدى دەپ نارازىلىق تانىتقان. كەيىن رەسەي دە كەلىسىمنەن شىقتى. بىراق كرەمل مامىردا قايتا قوسىلاتىنىن مالىمدەدى.

امەريكا قۇراما شتاتتارى اشىق اسپان كەلىسىمىنەن شىعاتىنىن حابارلاعاننان التى اي وتكەن سوڭ، بىلتىر 22 قاراشادا ءوز ەلىندە قۇجاتتىڭ كۇشىن توقتاتقان. ۆاشينگتون ماسكەۋدىڭ كەلىسىمدى «ورەسكەل بۇزعانىن» بىرنەشە مارتە مالىمدەگەن. اقش-تىڭ بۇل قادامى الەمدەگى قارۋ-جاراقتى تاراتپاۋ ىسىنە كوپ زاردابىن تيگىزدى. امەريكانىڭ بۇرىنعى پرەزيدەنتى دونالد ترامپ «ۆاشينگتوندى الداپ جاتىر، ونىڭ اسكەري الەۋەتىن ادىلەتسىز تۇردە شەكتەپ وتىر» دەپ بۇل جۇيەنى ءجيى سىناپ كەلگەن.

بىلتىر تاراپتار اراسىندا جاڭا كەلىسىمگە قول جەتاىزۋ مۇمكىندىگى بولعانمەن، رەسمي ماسكەۋ ۋاشينگتوننىڭ بۇل ارەكەتىنە تەرىس رەاكتسيا تانىتتى. رەسەي سىرتقى ىستەر مينيسترلىگى قارۋدى تاراتپاۋ جانە قارۋدى باقىلاۋ دەپارتامەنتىنىڭ ديرەكتورى ۆلاديمير ەرماكوۆ ۋاشينگتوننىڭ كەلىسىمنەن شىعۋىن جانە ماسكەۋگە قاتىستى ايىپتى نەگىزسىز دەپ اتادى.

اتالعان كەلىسىمگە 1992 جىلى حەلسينكيدە ەۋروپاداعى قاۋىپسىزدىك جانە ىنتىماقتاستىق ۇيىمىنا مۇشە 23 مەملەكەتتىڭ وكىلدەرى قول قويدى. قۇجاتتىڭ قابىلدانۋىنا ماسكەۋ بەلسەندى اتسالىسقان. كەلىسىم 2002 جىلى كۇشىنە ەنگەن. ونىڭ شارتتارى بويىنشا، كەلىسىمگە قول قويعان 34 ەل اسكەري كۇشى مەن مەكەمەلەرى تۋرالى اقپارات جيناۋ ءۇشىن ءبىر-ءبىرىنىڭ اۋماعىنا قىسقا مەرزىمگە قارۋسىز ۇشاق جىبەرە الادى.

كەلىسىمدى قولدايتىندار بۇل قۇجات ەلدەردىڭ ءبىر-بىرىنە سەنىمىن ارتتىرىپ، ولاردىڭ جاسىرىن اسكەر جۇمىلدىرىپ جاتپاعانىنا، الدەبىر ەلگە شابۋىلداۋ جوسپارى جوق ەكەنىنە كوز جەتكىزۋگە مۇمكىندىك بەرەدى دەپ سانايدى.

"The Qazaq Times"