جاپاروۆ پەن پۋتيننىڭ ەكىنشى مارتە كەزدەسۋى. فوتو: كتر.

قىرعىزستان پرەزيدەنتى سادىر جاپاروۆ ماسكەۋ ساپارى كەزىندە تاجىك ورتاسىنداعى شەكارا ماسەلەسىن شەشۋدى باستى كۇن تارتىپكە قوياتىنى بەلگىلى بولعان ەدى. رەسەي پرەزيدەنتى ۆلاديمير پۋتينمەن كەزدەسۋ كەزىندە دە بۇل ماسەلە باستى تاقىرىپ بولدى.

بۇنىمەن جاپاروۆ پۋتينگە ەكىنشى مارتە كەزدەسىپ وتىر. انىعىندا قىرعىزستان مەن تاجىكستان اراسىنداعى شەكارا جانجالىنان كەيىن پۋتين ەكى ەل باسشىسىن جەكە-جەكە شاقىرىپ تالقىلادى.

جابىق وتىرىستاردا قانداي ديالوگتاردىڭ بولعانى بەيمالىم، دەگەنمەن اقپارات قۇرالدارىنا اشىق كەزدەسۋدە رەسەي پرەزيدەنتى ورتا ازياداعى ەكى كورشىلەس ەلدىڭ ورتاسىنداعى قايشىلىقتى رەتكە كەلتىرۋ ءۇشىن قولدان كەلگەن شارانىڭ ءبارىن جاسايتىنىن، قىرعىز-تاجىك ورتاسىندا ۇزاق مەرزىمدى ءارى قوس تاراپتىڭ مۇددەسى تەڭ قامتىلعان كەلىسىم جاساسۋعا تىرىساتىنىن جەتكىزدى.

جاپاروۆ ساپارىندا ەكونوميكالىق ينتەگراتسيا ماسەلەسى باسىم باعىتتاي كورىنگەنىمەن، قاتىستى ەلدەردىڭ اقپارات قۇرالدارى ءۇشىن قىرعىزستان مەن تاجىكستان اراسىنداعى شەكارا جانجالىنا قاتىستى ماسكەۋدىڭ ۇستانىم، مامىلەسى كوبىرەك قىزى بولدى.

تاۋەلسىز ساراپشىلار، ماسكەۋ ەكى ەل ليدەرلەرىمەن جەكە-جەكە سويلەسۋ ارقىلى وڭىردەگى ءوز ىقپالىن ساقتاپ قالۋعا، ءتىپتى ايماقتاعى باقىلاۋ مۇمكىندىگىن ءتىپتى دە كۇشەيتۋگە تىرىسىپ جاتىر دەپ سانايدى. ورتالىق ازيا رەسەيمەن بىرقاتار ءىرى دەرجاۆالاردى جانە بەلسەندى گەوساياسي ايماقتاردى تۇتاستىراتىندىقتان ماسكەۋ بۇل وڭىردەگى قانداي دا ءبىر جاعدايعا بەي-جاي قاراپ وتىرا المايدى دەپ سانايدى ەكسپەرتتەر.

“The Qazaq Times”