فوتو: اشىق دەرەككوز

بەيسەنبى كۇنى جالپى وتىرىس بارىسىندا سەنات 2021 جىلعا ارنالعان رەسپۋبليكالىق بيۋدجەتتىڭ ناقتىلانعان نۇسقاسىن قابىلدادى. قۇجاتتا شىعىستاردى 1,3 ترلن تەڭگەگە ۇلعايتۋ كوزدەلگەن. الايدا مەملەكەتتىك قارىز ءوسىپ كەلە جاتىر.

رەسپۋبليكالىق بيۋدجەت شىعىستارىنىڭ ءوسۋى ءداستۇرلى تۇردە ۇلتتىق قوردان 850,0 ملرد تەڭگە سوماسىندا ترانسفەرت ەسەبىنەن جانە تاپشىلىق كولەمىنىڭ 2 ترلن 760 ملرد تەڭگەگە دەيىن نەمەسە ءجىو-گە 3,5%-عا دەيىن ۇلعايعان.

جەرگىلىكتى اتقارۋشى ورگانداردىڭ قارجىلىق بورىشى 4 دونور-ءوڭىردى قوسپاعاندا ءبىر جىل ىشىندە 2 ەسەگە وسكەن. ولاردىڭ مىندەتتەمەلەرى رەسپۋبليكالىق بيۋدجەتكە اۋىر جۇكتەمە بولۋى مۇمكىن.

جالپى 2021 جىلعا ارنالعان بيۋدجەت شىعىستارى 1,3 ترلن تەڭگەگە ۇلعايتىلىپ، 15,3 ترلن تەڭگە بولدى. ونىڭ ىشىندە «نۇر وتان» پارتياسىنىڭ سايلاۋالدى باعدارلاماسىن ىسكە اسىرۋعا – 844,4 ملرد تەڭگە، كوروناۆيرۋسپەن كۇرەسكە باعىتتالعان ءىس-شارالارعا – 265,3 ملرد تەڭگە، ونىڭ ىشىندە مەديتسينا قىزمەتكەرلەرىنە قوسىمشا اقى تولەۋگە – 69,5 ملرد تەڭگە، ۇكىمەت رەزەرۆىن ۇلعايتۋعا – 100 ملرد تەڭگە، يممۋندىق-بيولوگيالىق پرەپاراتتار شىعاراتىن بيوفارماتسەۆتيكالىق زاۋىت قۇرىلىسىن اياقتاۋعا – 1,5 ملرد تەڭگە، سovid-19 ينفەكتسياسىنا قارسى وتاندىق كانديداتتىق ۆاكتسينانىڭ سۋببىرلىكتى جانە بەلسەندىلىگى جويىلعان كلينيكالىق زەرتتەۋلەرىنىڭ I/II جانە III فازالارىن جۇرگىزۋگە – 1,4 ملرد تەڭگە. سونداي-اق، پرەزيدەنت توقاەۆتىڭ قازاقستان حالقىنا جولداۋلارىندا بەرىلگەن تاپسىرمالارىن ىسكە اسىرۋعا – 154,6 ملرد تەڭگە جانە مەملەكەتتىڭ بۇرىن قابىلدانعان مىندەتتەمەلەرىن ىسكە اسىرۋعا – 182,7 ملرد تەڭگە ءبولىندى.

بيىلعى جىلدىڭ قورىتىندىسى بويىنشا ۇكىمەت قازاقستان ءجىو-ءنىڭ 3,1% دەڭگەيىندە، نومينالدى ءجىو-ءنىڭ 77 869 ملرد تەڭگەگە وسەدى دەيدى. بۇل تسيفرلار ماقۇلدانعان بولجامنان 1 207 ملرد تەڭگەگە جوعارى، حالىقتىڭ جان باسىنا شاققانداعى ءجىو – 9 655 مىڭ اقش دوللارى.

"The Qazaq Times"