ۋكراينا پارلامەنتىنىڭ دەپۋتاتى ۆيكتور مەدۆەدچۋك پەن تاراس كوزاك مەملەكەتكە وپاسىزدىق جاسادى دەگەن كۇدىككە ءىلىندى. ۋكراينانىڭ قىلمىستىق كودەكسىنە سايكەس، كۇدىك راستالعان جاعدايدا ولار ون بەس جىلعا دەيىن باس بوستاندىعىنان ايىرىلۋى مۇمكىن.

باس پروكۋرور يرينا ۆەنەديكتوۆانىڭ مالىمەتىنشە، دەپۋتاتتار قىرىمدا ۇلتتىق رەسۋرستاردى تونادى جانە مەملەكەتكە قاستاندىق جاساعان. ازىرگە، ۆيكتور مەدۆەدچۋكتىڭ مەكەن-جايى انىقتالعان جوق. كەيىننەن مەدۆەدچۋكتىڭ ءباسپاسوز قىزمەتى ساياساتكەردىڭ ۋكراينادا ەكەنىن حابارلاپ، ونىڭ ءۇيى مەن كەڭسەسىندە ءتىنتۋ جۇرگىزۋ زاڭسىز دەدى. ال تاراس كوزاك رەسەيگە كەتكەن.

مەدۆەدچۋك: «بيلىكتىڭ زاڭسىز بۇيرىعىن ورىنداعان باس پروكۋراتۋرا ۋكراينانىڭ كونستيتۋتسياسى مەن زاڭدارىن ورەسكەل بۇزىپ، مەنىڭ ۇيىمدە جانە كەڭسەمدە ءتىنتۋ جۇرگىزدى. زاڭسىز ەشتەڭە تابىلعان جوق»، – دەيدى. ونىڭ «وپپوزيتسيالىق پلاتفورما – ءومىر ءۇشىن» پارتياسى بيلىكتىڭ ءىس-ارەكەتىن «وپپوزيتسيالىق ساياساتكەرگە قارسى ۇيىمداستىرىلعان ساياسي رەپرەسسيا» دەپ اتادى.

ۆيكتور مەدۆەدچۋك – رەسەي پرەزيدەنتى ۆلاديمير پۋتينمەن جەكە تىعىز بايلانىستاعى ۋكراين ساياساتكەرى. ول ۋكراينا شىعىسىنداعى ۋكراين اسكەريلەرى مەن رەسەي قولدايتىن سەپاراتيستەر اراسىنداعى قاقتىعىستى توقتاتۋ ءۇشىن وتەتىن كەلىسسوزگە ۇنەمى قاتىسادى.

"The Qazaq Times"