![](https://qazaqtimes.com/kk/content/uploads/2021/05/Biden2_AP-Photo-Jose-Luis-Magana-1280x720-1-800x480.jpg?token=c6724484383dfe90860161f5fbf70ecb)
اقش پرەزيدەنتى دجو بايدەننىڭ اكىمشىلىگى يزرايلگە 735 ميلليون دوللارعا جوعارى دالدىكتەگى قارۋ-جاراق ساتۋدى ماقۇلدادى.
The Washington Post مالىمەتىنشە، كونگرەسس حابارلامانى 5 مامىردا – يزرايل مەن پالەستينا اراسىنداعى قاقتىعىس باستالاردان بىرنەشە كۇن بۇرىن العان. زاڭ شىعارۋشىلار مامىلەنى 20 كۇن ىشىندە قاراۋى ءتيىس بولاتىن.
گازاداعى پالەستينالىقتار مەن يزرايل ارمياسىنىڭ قاقتىعىسى 10 مامىردان بەرى جالعاسىپ جاتىر. بۇعان دەيىن پالەستينا پرەزيدەنتى ماحمۇد ابباس مالىمدەمەسىندە: «قۇددىس پالەستينانىڭ جانى مەن جۇرەگى. ونى تولىق ازات ەتپەي، ەشقانداي دا بەيبىتشىلىك، قاۋىپسىزدىك بولمايدى. قۇددىس – پالەستينانىڭ، ماڭگىلىك مەملەكەتتىڭ استاناسى. مەن اقش پەن يزرايلگە «جەتەدى ەندى، ەلىمىزدەن كەتىڭدەر» دەپ، شەگەلەپ تۇرىپ ايتقىم كەلەدى. جەرىمىزدەگى باسىپ الۋ ساياساتىن ەرتەڭ ەمەس، بۇگىن توقتاتىڭدار»،– دەدى. ال يزرايل پرەمەر-ءمينيسترى بينيامين نەتانياحۋ قاجەت بولعان جاعدايدا وپەراتسيا جالعاساتىنىن ايتتى.
سوڭعى مالىمەتتەر بويىنشا يزرايلدە كەم دەگەندە 10 ادام قازا تاۋىپ، جۇزدەگەن ادام جاراقات العان. پالەستينادا 200-دەن استام ادام قايتىس بولدى جانە 6000-عا جۋىق ادام جاراقاتتانعان.