ساتباەۆتاعى ەرەۋىلگە قاتىسى بار دەلىنگەن 55 ايىپتالۋشىعا سوت ۇكىمى شىقتى

قاراعاندىدا ساتباەۆ قالاسىندا بولعان توبەلەسكە قاتىستى سوت ۇكىمى وقىلىپ، 55 ايىپتالۋشىنىڭ توعىزى ءۇش جىلعا باس بوستاندىعىنان ايىرىلدى.

44 ادام 4 جىل شارتتى جازا الىپ، ەكى ادام 1,5 جىلعا شارتتى تۇردە سوتتالعان. بۇعان دەيىن پروكۋرورلار ايىپتالۋشىلاردىڭ كىناسىن مويىنداعانىن، ولارمەن پروتسەسسۋالدى كەلىسىم جاسالعانىن حابارلاعان. سوت پروكۋرور سۇراعان جازانى بەردى. اتالعان ءىس بويىنشا تاعى ەكى ايىپتالۋشىعا ىزدەۋ جاريالانعان. ولاردىڭ ءىسى بولەك تەرگەلىپ جاتىر.

بىلتىر 23 شىلدە كەشكىسىن قاراعاندى وبلىسىنىڭ ساتپاەۆ قالاسىندا بەس جاستاعى قىز بالا جوعالىپ، پوليتسيا مەن ەرىكتىلەر جۇمىلا  ىزدەگەن. ءتۇن اۋا جۇماعا قاراعان ساعاتتاردا قالاداعى كوپقاباتتى تۇرعىن ءۇيدىڭ بىرىنەن ءيىسشىل ءيتتىڭ كومەگىمەن ءبۇلدىرشىن ەگدە جاستاعى ەر ادامنىڭ پاتەرىنەن تابىلعانى تۋرالى اقپارات تاراعان. ساتپاەۆتىقتار بىرنەشە ساعات بويى كۇدىكتىنى «جالپىحالىقتىق سوت رەتىندە كوپشىلىك الدىندا جاۋاپقا تارتۋعا تىرىسىپ»، ءوز بەتىنشە جازالاۋعا تالپىنعان.

نارەستەگە زورلىق كورسەتتى دەپ ىزالانعان جۇرت قالالىق پوليتسيا دەپارتامەنتى باستىعىنىڭ ورىنباسارى ەرنات قالياكپاروۆ، قالا اكىمى اسقار ىدىرىسوۆ جانە جەرگىلىكتى يمامنىڭ دا سوزىنە قۇلاق اسپاعان. وسى سەبەپتى العا تارتقان اشۋلى ەل (الەۋمەتتىك جەلىلەردە تاراعان ۆيدەودان توپتىڭ قاتارى قالىڭ ەكەنىن اڭعارۋ قيىن ەمەس – رەد.) كۇدىكتى جەتكىزىلگەن پوليتسيا بولىمشەسىنە بەت الىپ، وندا تاياق-تاس لاقتىرعان، كۇشتىك قۇرىلىمنىڭ كولىگىن ورتەگەن. سوندىقتان ۇلتتىق گۆارديانىڭ ارنايى اسكەرى، تەمىرقۇرساۋ جاساعى جۇمىلدىرىلعان.

"The Qazaq Times"