بيلىك قورداي قاقتىعىسىن ۇلتارالىق ەمەس، تۇرمىستىق ماسەلەسىنەن تۋعان دەگەن پىكىردى پروپوگاندالاۋعا تىرىسىپ كەلەدى. ال ساراپشىلار مەن ازاماتتىق قوعام بەلسەندىلەرى مۇنىڭ استارىن "بيلىكتىڭ زاڭعا ساي جۇمىس ىستەمەۋىمەن، الەۋمەتتىك-ساياسي جۇيەلى ماسەلەلەردىڭ ابدەن تەرەڭدەۋىمەن" بايلانىستى تۇسىندىرەدى. فوتو: ازاتتىق / اسىلحان ماماشۇلى

29 قىركۇيەكتە الماتى گورنيزونىنىڭ اسكەري سوتىندا جامبىل وبلىسى قورداي اۋدانىنداعى قازاقتار مەن دۇنگەندەر اراسىنداعى ۇلتارالىق جانجالدان سوڭ كۇدىككە ىلىنگەن 50-دەن استام ادامنىڭ جەتەۋىنە ۇكىم شىقتى دەپ حابارلايدى Azattyq راديوسى. 

ۇكىمگە ساي، ابزال نۇراحانوۆ «جاپپاي تارتىپسىزدىككە قاتىستى» (قىلمىستىق كودەكستىڭ 272-بابى) جانە «ۇرلىق جاسادى» (قىلمىستىق كودەكستىڭ 188-بابى) دەگەن ايىپپەن سەگىز جىلعا سوتتالدى. سۋديا ۇكىم شىعارعاندا نۇراحانوۆتىڭ «ەكىنشى رەت اۋىر قىلمىس جاساعانىن» ەسكەرگەن.

سوت باقىتبەك يبراگيموۆتى «اسا ءىرى كولەمدە ۇرلىق جاسادى» دەپ جەتى جىلعا سوتتادى. سوت ۇكىم شىعارعاندا ونىڭ «ەكىنشى رەت اۋىر قىلمىس جاساعانىن» ەسكەرگەن. نۇراحانوۆ پەن يبراگيموۆ جازاسىن قاتاڭ تارتىپتەگى تۇرمەدە وتەيدى.

بۇدان بولەك، مىرزاعالي دۇيسەنباەۆ «اسا ءىرى كولەمدە ۇرلىق جاسادى» دەگەن ايىپپەن بەس جىلعا سوتتالدى. «جاپپاي تارتىپسىزدىككە قاتىستى» دەپ ايىپتالعان رۇستەم بەجىباەۆ ءتورت جىلعا، ەرلان بۇرالقىنوۆ 3 جىل 20 كۇنگە، ۇلان اتامباەۆ پەن المات تىلەۋعاليەۆ ءۇش جىلعا تۇرمەگە قامالدى. ولار جازاسىن قاۋىپسىزدىگى ورتاشا تۇرمەدە وتەۋى ءتيىس.

سوت ۇكىمى ءالى كۇشىنە ەنگەن جوق. ايىپتالۋشىلار ۇكىممەن كەلىسپەيدى جانە اپەللياتسيالىق شاعىم تۇسىرمەك.

بەس جىلعا سوتتالعان دۇيسەنبەكوۆ سوتتا «مەن تاكسيست بولعانىم ءۇشىن سوتتاپ جاتىر. ۇيدە بالا-شاعام بار، بالا-شاعامدى باعاتىن جالعىز اداممىن. كەلىنشەگىم اۋىرادى، قىزىمنىڭ جۇرەگىندە اقاۋ بار، سوت ماعان ەشقانداي جەڭىلدىك قاراپ جاتقان جوق. مەن [جانجال بولعان جەرگە] تاكسيست بولىپ باردىم، نەگىزى ۇرلىق جايىندا ەشتەڭە بىلمەيمىن. سونىڭ ءبارىن تەرگەپ، ءبىلىپ تۇرسا دا سوتتاپ جىبەردى» دەدى.

ءۇش جىلعا سوتتالعان المات تىلەۋعاليەۆ «ءبىز ءوز ماسەلەمىزدى ويلاپ، ۇرلىق، توناۋ ماقساتىندا بارعان جوقپىز، ءبىز تەك الەۋمەتتىك جەلىدەن كەلگەن ۆيدەولاردى كورىپ، قازاقتارعا كومەكتەسەيىك دەپ، جاناشىرلىق تانىتىپ بارعانبىز. ال ەندى مىنانداي ۇكىمنەن كەيىن قانداي ادىلەت سۇرايسىز؟» دەدى.

بيىل 7 اقپان كۇنى كەشكىسىن جامبىل وبلىسى قورداي اۋدانىندا قازاق-دۇنگەن توپتارى قاقتىعىسىپ، سالدارىنان 10 ادام قازا تاپقان، 19 پوليتسەي مەن 40-تان استام تۇرعىن جارالانعان ەدى.

ساراپشىلار مەن ازاماتتىق بەلسەندىنىڭ كوبى بولعان جاعدايعا «نەمقۇرايلى قاراعان جاۋاپسىز بيلىكتى» جازعىرىپ، مۇنىڭ ءتۇبى جىلدار بويى نازار اۋدارىلماي، قوردالانعان الەۋمەتتىك-ۇلتتىق تەڭسىزدىك جانە جەمقورلىق ماسەلەسىمەن بايلانىستىرادى. وقيعا كەزىندە 11 ادام قازا تاپقان. جانجالدان سوڭ 120-دان استام قىلمىستىق ءىس قوزعالىپ، 59 ادامعا ايىپ تاعىلعان. ايىپتالۋشىلاردىڭ سوتى ءار قالادا ءوتىپ جاتىر.

پروكۋراتۋرانىڭ مالىمەتىنشە، قوردايداعى ۇلتارالىق جانجال كەزىندە 164 ءۇي مەن ساۋدا ورنى، 100 كولىك قيراعان. 342 ادام جابىرلەنۋشى دەپ تانىلعان. 400-دەن استام ەكسپەرتيزا جۇرگىزىلىپ، مىڭ جارىمنان استام ادام سۇرالعان.

قوردايداعى جانجال كەزىندە نەگىزىنەن ەتنيكالىق دۇنگەندەر تۇراتىن ماسانچي، سورتوبە، اۋقاتتى اۋىلدارى كوپ زارداپ شەككەن.

رەسمي مالىمەت بويىنشا، جانجالعا سارتوبە اۋىلىنداعى قازاقتار مەن دۇنگەندەر اراسىنداعى كيكىلجىڭ سەبەپ بولعان. تەرگەۋ ورگاندارى دەرەگىنشە، ۇلتى دۇنگەن مارات يۋنحۋ جولعا شىعىپ، اۋلادان اعاسى مىنگەن جۇك كولىگىن شىعارۋ ءۇشىن باسقا كولىكتەردى توقتاتقان. ءدال وسى كەزدە 78 جاستاعى قازاق تولەگەن قۇداشباەۆتى بالالارى كولىكپەن دارىگەرگە اپارا جاتقان. وسى كەزدە ەكى جاق جولعا تالاسىپ، توبەلەسىپ قالعان. قاريانىڭ جامباسى سىنعان، ونىڭ ۇلىنىڭ باس سۇيەگى مەن ميىنا زاقىم كەلگەنى حابارلانعان. كەيىن سوت مارات يۋنحۋدى 2,6 جىلعا سوتتاعان. ال ونىڭ اكەسى ەرسمان يۋنحۋدىڭ باس بوستاندىعىن 2,6 جىلعا شەكتەگەن.

قوردايداعى جانجالدان سوڭ جامبىل وبلىسىنىڭ اكىمى اسقار مىرزاحمەتوۆ باستاعان بىرنەشە شەنەۋنىك جانە پوليتسيا دەپارتامەنتىنىڭ باسشىسى قىزمەتتەن كەتتى. ونىڭ ورنىنا سول كەزدە پرەمەر-ءمينيستردىڭ ورىنباسارى بولعان بەردىبەك ساپارباەۆ تاعايىندالدى.​

29 ساۋىردە الماتىداعى تەرگەۋ يزولياتورىندا ۇلتارالىق جانجالعا بايلانىستى ۇستالعان بەكبول كيباەۆ قايتىس بولدى. پروكۋراتۋرا وسى وقيعا بويىنشا سوتقا دەيىنگى تەرگەۋ باستالعانىن حابارلادى. وقيعانىڭ باسقا جايتتارى بەلگىسىز.​

"The Qazaq Times"