فوتو: baigenews.kz

وسى اپتادا قازاقستان پرەزيدەنتى توقاەۆ ورتا ازيا ەلدەرىنىڭ باسشىلارىمەن سويلەستى. قاتارىندا سادىر جاپاروۆ پەن ەمومالي راحمون دا بار.

توقاەۆ ارىپتەستەرىمەن قىرعىز-تاجىك شەكاراسىندا بولعان وقيعالاردى تالقىلاعان. قىرعىزستان پرەزيدەنتىنىڭ ءباسپاسوز حابارلاماسىندا: «سادىر جاپاروۆ قاسىم-جومارت توقاەۆقا جاعدايعا نازار اۋدارىپ، قايرات تانىتىپ، قولداۋ كورسەتكەنى ءۇشىن جانە باتكەن وبلىسىنداعى شەكاراعا جاقىن اۋىل تۇرعىندارىنا گۋمانيتارلىق جاردەم بەرگەنى ءۇشىن ريزاشىلىق ءبىلدىردى»، – دەلىنگەن.

ال ەمومالي راحمونمەن كەلىسسوز بارىسىندا قاسىم-جومارت توقاەۆتىڭ الداعى ۋاقىتتا تاجىكستانعا جاسايتىن رەسمي ساپارىنىڭ جاي-جاپسارى قاراستىرىلعان.  19-20 مامىردا قازاق پرەزديەنتى دۋشانبەگە بارۋدى جوسپارلاپ وتىر.

وتكەن اپتادا تاجىك-قىرعىز شەكاراسىندا بولعان قاقتىعىستان 50-دەن استام ادام قازا تاۋىپ، باتكەن وبلىسىنداعى قاقتىعىس اۋماعىنان 30 مىڭنان استام تۇرعىن قاۋىپسىز جەرگە كوشىرىلگەن. 29 ساۋىردە شەكاراداعى جاعداي ۋشىعىپ، ەكى ەلدىڭ اسكەري قىزمەتكەرلەرى اراسىندا اتىس بولعان. سول كۇنى كەشكە تاراپتار اتىستى توقتاتۋعا كەلىسكەنمەن، اتىس جەكەلەگەن جەرلەردە 1 مامىرعا دەيىن جالعاستى.

بۇل ماسەلەدە وزگە ەلدەر قىرعىزستان مەن تاجىكستاننىڭ قايسىسىنا جاق ەكەنىن اشىق كورسەتپەۋگە تىرىستى. كەيىننەن ەكى ەلدىڭ رەسمي تۇلعالارى اراسىندا اسكەري ءىس-قيمىلدى توقتاتۋ تۋرالى كەلىسىم جاسالعاننان كەيىن كەي ەلدىڭ باسشىلارى شەكاراداعى كيكىلجىڭگە بايلانىستى پوزيتسياسىن بىلدىرەتىن مالىمدەمەلەر جاساي باستادى.

قازاقستان پرەزيدەنتى قاسىم-جومارت توقاەۆ ەكى ەل اراسىندا بىتىمگەر بولۋدى ۇسىنعان. ول مالىمدەمەسىندە: «ءوز تاراپىمنان ماسەلەنى شەشۋدىڭ ءتيىمدى جولدارىن قاراستىرۋعا جانە ءوزارا سەنىمدى قايتا قالپىنا كەلتىرۋگە كۇش سالۋعا دايىنمىن. ورتالىق ازيا مەملەكەتتەرى باسشىلارىنىڭ كەزەكتى كونسۋلتاتيۆتىك كەزدەسۋى اياسىندا مۇنداي شەكارالىق قاقتىعىستاردى رەتتەۋدىڭ تەتىكتەرىن قاراستىرۋ قاجەت دەپ سانايمىن»، – دەدى. شەكاراداعى قارۋلى قاقتىعىستى «قاتتى الاڭداۋشىلىقپەن» قابىلداعانىن جەتكىزگەن توقاەۆ ەكى ەلدىڭ اتىستى توقتاتىپ، كەلىسسوز باستاۋ نيەتىن قۇپتادى.

"The Qazaq Times"