شەكاراداعى قاقتىعىس: ەۋرووداق قىرعىز-تاجىك بايلانىسى جونىندە پىكرى ءبىلدىردى

ەۋروپالىق وداقتىڭ ورتالىق ازيا بويىنشا ارنايى وكىلى پيتەر بۋريان قىرعىز-تاجىك شەكاراسىنداعى قارۋلى قاقتىعىس تۋرالى پىكىر ءبىلدىردى.

ەكى ەل اراسىنداعى احۋال جونىندە ول: «شەكارا ماڭى ىنتىماقتاستىعى مەن ساۋدانى دامىتۋ ارقىلى ءبىز ادامداردىڭ ەركىن قوزعالىسىنا، شەكاراداعى وزگە دە پروبلەمالاردى شەشۋگە ىقپال ەتىپ، ەسىرتكىنىڭ زاڭسىز اينالىمى مەن كونترابانداعا توسقاۋىل قويعىمىز كەلەدى. بۇگىنگى قاقتىعىستىڭ ءبىر قىرى وسىعان كەلىپ تىرەلەدى»، – دەدى.

ەۋرووداق شەكارالاردى باسقارۋدىڭ وڭىرلىك BOMCA باعدارلاماسى ارقىلى كەلىسسوزدەر جۇرگىزگەن. اتالعان باعدارلاما 22 ميلليون ەۋرو كولەمىندە قارجىلاي قولداۋعا يە بولعان. وعان اۋعانستان دا كىرەدى.

28-30 ساۋىردە قىرعىزستان مەن تاجىكستان شەكاراسىندا قارۋلى قاقتىعىس بولىپ، قىرعىز جاعىنان 36 ادام، ونىڭ ەكەۋى بالا، قازا بولعان. 183 قىرعىز ازاماتى جارالانعان.

قاقتىعىس سالدارىنان قىرعىزستاننىڭ باتكەن وبلىسىندا 78 تۇرعىن ءۇي، ەكى مەكتەپ، فەلدشەر-اكۋشەرلىك پۋنكت، ءۇش شەكارا بەكەتى، بالاقشا، ون جانار-جاعارماي ستانتسياسى، ميليتسيا بولىمشەلەرى، سەگىز دۇكەن ورتەنگەن. 29 ساۋىردە شەكاراداعى جاعداي ۋشىعىپ، ەكى ەلدىڭ اسكەري قىزمەتكەرلەرى اراسىندا اتىس بولعان. سول كۇنى كەشكە تاراپتار اتىستى توقتاتۋعا كەلىسكەنمەن، اتىس جەكەلەگەن جەرلەردە 1 مامىرعا دەيىن جالعاستى.

1 مامىردا باتكەن وبلىسىندا ەكى ەل ۇكىمەتتەرىنىڭ دەلەگاتسياسى دەليميتاتسيا جانە دەماركاتسيا ماسەلەلەرى بويىنشا كەلىسسوز وتكىزدى، كەزدەسۋ كەزىندە تاراپتار اتىستى تولىق توقتاتۋ جانە شەكارادان اسكەر اكەتۋ تۋرالى كەلىسىمگە كەلگەن. ەكى ەل پروكۋراتۋراسى اۋىر باپتار بويىنشا قىلمىستىق ءىس قوزعادى.

"The Qazaq Times"