قىرعىزستان مەن تاجىكستان شەكاراسىندا جاعداي قايتا شيەلەنىسە باستادى.

قىرعىزستاننىڭ ۇلتتىق قاۋىپسىزدىك كوميتەتى شەكارا قىزمەتىنىڭ حابارلاۋىنشا، تاجىكستان تاراپى قىرعىزستاننىڭ 1 مىڭ شارشى مەتر اۋماعىنا كىرىپ، وش وبلىسىنىڭ چونالاي اۋدانىنداعى ۋنجۋ-بۋلاك مەكەنىندە كونتەينەر قويعان. جانە شەكارا ماڭىنا اسكەرى مەن تەحنيكاسىن شوعىرلاندىرا باستاعان.

قىرعىز شەكاراشىلارى جاعداي ۋشىقپاۋ ءۇشىن كۇش سالعانىمەن تاجىكستان شەكارا وكىلدەرى جاۋاپ بەرمەي جاتقانىن ايتادى. وسىعان بايلانىستى شەكاراداعى جاساقتارىن كۇشەيتىلگەن رەجيمگە كوشىرگەن. جانە ماسەلەنى شەشۋ ءۇشىن ەكى ەل اراسىنداعى شەكارانى بەلگىلەۋ بويىنشا قىرعىز دەلەگاتسياسىنىڭ باسشىسى مەن ۇكىمەت وكىلدەرى وقيعا ورنىنا اتتاندى.

28-30 ساۋىردە قىرعىزستان مەن تاجىكستان شەكاراسىندا قارۋلى قاقتىعىس بولىپ، قىرعىز جاعىنان 36 ادام، ونىڭ ەكەۋى بالا، قازا بولعان. 183 قىرعىز ازاماتى جارالانعان.

قاقتىعىس سالدارىنان قىرعىزستاننىڭ باتكەن وبلىسىندا 78 تۇرعىن ءۇي، ەكى مەكتەپ، فەلدشەر-اكۋشەرلىك پۋنكت، ءۇش شەكارا بەكەتى، بالاقشا، ون جانار-جاعارماي ستانتسياسى، ميليتسيا بولىمشەلەرى، سەگىز دۇكەن ورتەنگەن. 29 ساۋىردە شەكاراداعى جاعداي ۋشىعىپ، ەكى ەلدىڭ اسكەري قىزمەتكەرلەرى اراسىندا اتىس بولعان. سول كۇنى كەشكە تاراپتار اتىستى توقتاتۋعا كەلىسكەنمەن، اتىس جەكەلەگەن جەرلەردە 1 مامىرعا دەيىن جالعاستى.

1 مامىردا باتكەن وبلىسىندا ەكى ەل ۇكىمەتتەرىنىڭ دەلەگاتسياسى دەليميتاتسيا جانە دەماركاتسيا ماسەلەلەرى بويىنشا كەلىسسوز وتكىزدى، كەزدەسۋ كەزىندە تاراپتار اتىستى تولىق توقتاتۋ جانە شەكارادان اسكەر اكەتۋ تۋرالى كەلىسىمگە كەلگەن. ەكى ەل پروكۋراتۋراسى اۋىر باپتار بويىنشا قىلمىستىق ءىس قوزعادى.

"The Qazaq Times"