ناتيجەسىز مامىلە: بۇۇ ءيزرايلدىڭ ارەكەتىن ايىپتاعانمەن، اقش قولداۋ ءبىلدىردى

ءتورت كۇننىڭ ىشىندە يزرايل گازا سەكتورىنىڭ اۋماعىنا كەمىندە 1 750 زىمىران اتىلعان. وسىعان بايلانىستى بۇۇ شۇعىل كەڭەس وتكىزدى، بىراق ناتيجە بولعان جوق. كەڭەستىڭ 14 مۇشەسى يزرايلدەن قاقتىعىستى توقتاتۋدى تالاپ ەتتى. بىراق اقش پرەزيدەنتى بايدەن ءيزرايلدى قولدايتىنىن ايتىپ، باسقا تاراپتارمەن كەلىسكەن جوق.

يزرايل قورعانىس ارمياسىنىڭ Twitter-دەگى جازباسىندا: «يزرايل گازا سەكتورىنداعى 650-دەن استام تەرروريستىك نىساناعا، سونىڭ ىشىندە زىمىراندارعا، پالەستينا يزرايلگە شابۋىل جاساۋ ءۇشىن قولداناتىن 10 تۋننەلگە، حاماس قوزعالىسىنىڭ 100-دەن استام سودىرىنا جانە «يسلام جيھادىنا» سوققى بەردى»، – دەلىنگەن.

پالەستينا دەنساۋلىق ساقتاۋ مينيسترلىگىنىڭ مالىمەتىنشە، قاقتىعىس كەزىندە 109 پالەستينالىق، ونىڭ ىشىندە كامەلەتكە تولماعان 28 قۇربان بولعان. 600-دەن استام نىسان قيراعان. جاراقاتتانعاندار سانى ارتتى.

پالەستينا پرەزيدەنتى ماحمۇد ابباس مالىمدەمەسىندە: «قۇددىس پالەستينانىڭ جانى مەن جۇرەگى. ونى تولىق ازات ەتپەي، ەشقانداي دا بەيبىتشىلىك، قاۋىپسىزدىك بولمايدى. قۇددىس – پالەستينانىڭ، ماڭگىلىك مەملەكەتتىڭ استاناسى. مەن اقش پەن يزرايلگە «جەتەدى ەندى، ەلىمىزدەن كەتىڭدەر» دەپ، شەگەلەپ تۇرىپ ايتقىم كەلەدى. جەرىمىزدەگى باسىپ الۋ ساياساتىن ەرتەڭ ەمەس، بۇگىن توقتاتىڭدار»،– دەدى.

ەكى ەل اراسىندا باستالعان قاقتىعىس 10 مامىردان بەرى جالعاسىپ جاتىر. 12 مامىردا يزرايل گازا سەكتورىنا اۋەدەن شابۋىل جاساپ، حاماس توبىنىڭ كومانديرىن ءولتىردى. بۇعان جاۋاپ رەتىندە حاماس يزرايل تاراپىن راكەتامەن اتقىلادى. سونداي-اق يزرايل كوشەلەرىندە ەۆرەيلەر مەن يزرايلدىك ارابتار توبەلەسىپ، جانجالداسقان. بۇل ماسەلەدە يزرايل پرەمەرى بەنجامين نەتانياحۋمەن تەلەفون ارقىلى سويلەسكەن اقش پرەزيدەنتى دجو بايدەن يزرايلگە قولداۋ ءبىلدىرىپ، حاماس توبىنىڭ راكەتا شابۋىلدارىن ايىپتاعان.

تاياۋ شىعىستاعى شيەلەنىس وتكەن ايدا ۋشىعا باستاعان. وعان يزرايل سوتىنىڭ يەرۋساليمدەگى شەيح-دجاراح اۋدانىنان پالەستينالىقتاردى كوشىرۋ تۋرالى شەشىمى سەبەپ بولدى. يزرايل 1967 جىلى تاياۋ شىعىستاعى سوعىستان سوڭ شىعىس يەرۋساليمدى باسىپ الىپ، استانامىز دەپ جاريالاعان. بىراق حالىقارالىق قاۋىمداستىق يەرۋساليمدى يزرايل استاناسى دەپ مويىندامادى. پالەستينالىقتار شىعىس يەرۋساليمدى ءوز جەرىمىز ءارى بولاشاقتا قۇرىلاتىن تاۋەلسىز ەلىمىزدىڭ استاناسى بولادى دەپ سانايدى.

ياعني يەرۋساليم مارتەبەسىن انىقتاۋ – پالەستينا-يزرايل قاقتىعىسىنداعى نەگىزگى ماسەلەنىڭ ءبىرى. 1967 جىلعى سوعىس كەزىندە يزرايلدىكتەر قالانىڭ شىعىس بولىگىن الدى. ولار يەرۋساليمدى ءيزرايلدىڭ «ءبىرتۇتاس جانە بولىنبەيتىن» استاناسى دەپ اتايدى. ال پالەستينالىقتار قالانىڭ شىعىس بولىگىن ءوز مەملەكەتىنىڭ استاناسى رەتىندە جاريالاعىسى كەلەدى. 2018 جىلدان باستاپ اقش پەن گۆاتەمالا ەلشىلىكتەرى يەرۋساليمدە جۇمىس ىستەپ تۇر.

2019 جىلى ماۋسىمنىڭ سوڭىندا اق ءۇي پالەستينا-يزرايل قاقتىعىسىن رەتتەۋ بويىنشا قۇجاتتا ەكونوميكالىق اسپەكتىلەر بار ەكەنىن مالىمدەدى. اتاپ ايتقاندا، پالەستينا مەن كورشى ەلدەرگە $50 ملرد.كولەمىندە ينۆەستيتسيا ءبولۋ قاراستىرىلعان. بىراق پالەستينا اكىمشىلىگى مەن بىرقاتار اراب ەلدەرى وسىنداي كوزقاراستى ورىنسىز دەپ، قۇجاتقا بويكوت جاريالادى. ۋاشينگتون داۋلى ايماققا اينالعان يەرۋساليمدى ءيزرايلدىڭ تەرريتورياسىنا جاتقىزادى. پالەستينا بولسا، بۇعان ءۇزىلدى-كەسىلدى قارسى.

"The Qazaq Times"