يزرايل پوليتسياسى ەلدەگى قاۋىپسىزدىگى جوعارى تۇرمەدەن قاشىپ شىققان التى پالەستينالىقتىڭ تورتەۋىن ۇستادى.ۇستالعان تورتەۋ 11 قىركۇيەك كۇنى سوت الدىنا باردى. ولار ءيزرايلدىڭ سولتۇستىگىندە قولعا تۇسكەن.

يزرايل پوليتسياسى تۇرمەدەن قاشقانداردى قولعا ءتۇسىرۋ ءۇشىن كۇنى-ءتۇنى جۇمىس ىستەپ جاتقانىن مالىمدەدى.

تۇرمەدەن قاشقان ادامداردىڭ بەسەۋى – "يسلام جيھادى" توبىنىڭ مۇشەسى. التىنشىسىنىڭ "فاتاح" توبىنا قاتىسى بار. تورتەۋى لاڭكەستىك ارەكەت ءۇشىن سوتتالعان، ەكەۋى بوستاندىعىنان ءومىر بويىنا ايىرىلعان.

التى پالەستينالىق 6 قىركۇيەك كۇنى تۇرمەدەن تۋننەل ارقىلى قاشىپ شىققان. بۇل جاعداي يزرايل تۇرمەسى جۇيەسىندەگى كەمشىلىكتەردى كورسەتىپ، تۇرمەدەن قاشقانداردى پالەستينانىڭ باتىرىنا اينالدىردى.

گازا سەكتورى مەن باتىس جاعالاۋىندا پالەستينالىقتار جيىن وتكىزىپ، تۇرمەدەن قاشىپ شىعۋ وقيعاسىن تويلاتتى. 10 قىركۇيەك كۇنى گازا سەكتورىنداعى پالەستينالىق توپتار يزرايلگە قاراتا زىمىران اتىپ، تۇرمەدەن قاشقاندارعا قولداۋ ءبىلدىردى. يزرايل قارىمتا شابۋىل جاسادى. ءدال وسىنداي جاعداي 11 قىركۇيەك كۇنى دە بولعان.

يزرايل پوليتسياسىنىڭ حابارلاۋىنشا، قاشىپ شىققانداردىڭ ەكەۋى ءيزرايلدىڭ سولتۇستىگىندەگى ۋمم ءال-عانام قالاسىنداعى اۆتوتۇراققا تىعىلعان. سولاردىڭ ءبىرى زاكاريا زۋبەيدي 2000-جىلداردىڭ باسىندا پالەستينالىقتاردىڭ ەكىنشى كوتەرىلىسىندە قارۋلانعان توپتىڭ ليدەرى بولعان. 2019 جىلى وعان راقىمشىلىق جاساعان، بىراق كەيىن ونى شابۋىلعا قاتىسى بار دەگەن كۇدىكپەن قايتا ۇستاعان.

ونىڭ الدىندا ۋمم ءال-عانام قالاسىنان باتىسقا قاراي ورنالاسقان نازارەت قالاسىندا تاعى ەكەۋى ۇستالعان. قالعان ەكى ادامدى ءالى ىزدەپ جاتىر.

The Qazaq Times