كورنەكى سۋرەت. قىرعىز پرەزيدەنتى سادىر جاپاروۆ. فوتو: اكيپرەسس

قىرعىزستان پرەزيدەنتى سادىر جاپاروۆتى سىناپ جۇرگەن وپپوزيتسيالىق ساياساتكەر جەنيش مولدوكماتوۆ ەكى ايعا قامالدى. ول «بيلىككە قارسى نارازىلىق كەزىندە جاپپاي تارتىپسىزدىك ۇيىمداستىردى» دەگەن كۇدىككە ىلىنگەن. تاۋەلسىز ساراپشىلار مۇنىڭ «ساياسي استارى بار» دەپ سانايدى.

مولدوكماتوۆ بىلتىر قازاندا پارلامەنت سايلاۋىنا ءتۇسىپ، جەڭىلىپ قالعان. كەيىن ول مىڭداعان اداممەن بىرگە سايلاۋ ناتيجەسىنە قارسى نارازىلىققا شىققان. ناتيجەسىندە سول كەزدەگى پرەزيدەنت سوورونباي جەەنبەكوۆ وتستاۆكاعا كەتكەن بولاتىن.

وپپوزيتسيونەردىڭ ادۆوكاتى كانتەمىر تۋرداليەۆ سوت شەشىمىمەن كەلىسپەيتىنىن ايتىپ، شاعىم تۇسىرمەك.

ەلدىڭ قازىرگى پرەزيدەنتى سادىر جاپاروۆ 2013 جىلدىڭ تامىزىندا قىرعىزستان جوعارعى سوتىنىڭ شەشىمىمەن «بيلىكتى كۇشپەن باسىپ الۋعا ارەكەت ەتكەنى ءۇشىن» كىنالى دەپ تانىلىپ، ءبىر جىل بەس ايعا باس بوستاندىعىنان ايىرىلدى. بىراق سوت زالىندا بوساتىلدى. كەيىننەن جاپاروۆ ءتورت جىل بويى شەتەلدە تۇردى.

2017 جىلعى 25 ناۋرىزدا ساياساتكەر قىرعىزستانعا ورالعاننان كەيىن قاماۋعا الىندى. وعان قىلمىستىق كودەكستىڭ «كىسى ولتىرۋگە ارەكەت»، «كەپىلگە الۋ»، «بۇزاقىلىق»، «بيلىك وكىلىنە زورلىق-زومبىلىق ەتۋ» باپتارى بويىنشا قىلمىستىق ءىس قوزعالدى. سول جىلى 2 تامىزدا بىشكەكتىڭ پەرۆوماي اۋداندىق سوتى ونى بىرنەشە قىلمىس جاساعانى ءۇشىن 11 جىلعا باس بوستاندىعىنان ايىردى.

2020 جىلى قازاننىڭ باسىندا قىرعىزستاندا پارلامەنتتىك سايلاۋ ناتيجەلەرىنە قارسى جاپپاي نارازىلىق اكتسيالارى باستالدى. 6 قازانعا قاراعان ءتۇنى جاپاروۆ جازاسىن وتەپ جاتقان شۋ وبلىسىنداعى كولونيادان ءوز جاقتاستارىمەن بوساتىلدى. سول كۇنى قىرعىزستاننىڭ جوعارعى سوتى ونىڭ ۇكىمىن جويدى. 10 قاڭتاردا جاپاروۆ قىرعىزستان پرەزيدەنتى بولىپ سايلاندى. ورتالىق سايلاۋ كوميتەتىنىڭ مالىمەتىنشە، ول سايلاۋشىلار داۋىسىنىڭ 79,2% داۋىسىن جيناعان. كەيىننەن كونستيتۋتسياعا وزگەرتۋ ەنگىزۋدى قولعا العان ول قىرعىزستاندى پرەزيدەنتتىك رەسپۋبليكا دەپ جاريالاپ، تۇتاس بيلىكتى قولىنا الدى.

"The Qazaq Times"