جاپونيادا ەپيدەميولوگيالىق احۋالدىڭ ۋشىعۋىنا بايلانىستى توتەنشە جاعداي مەرزىمى ۇزارتىلدى. رەسمي مالىمەت بويىنشا بۇگىنگە دەيىن مۇندا بارلىعى 618 مىڭ ادام ۆيرۋس جۇقتىرعان. 10 مىڭ ادام قايتىس بولعان. 

بيىل توكيودا جازعى وليمپيادا ويىندارى ءوتۋى ءتيىس. وليمپيادانىڭ اشىلۋى 23 شىلدەگە جوسپارلانعان. بىراق بۇگىن وليمپيادا ويىندارىنىڭ وتۋىنە قارسىلىق بىلدىرگەن حالىق ەرەۋىلگە شىقتى. تۇرعىندار سپورتتىق شارادان كەيىن كوروناۆيرۋس ىندەتىنىڭ ۋشىعىپ كەتۋىنە الاڭداۋلى. توكيوداعى ۇلتتىق ستاديون الدىندا جينالعان كوپشىلىك پاندەميا كەزىندە بۇل دودانى وتكىزۋ ورىنسىز دەيدى.

بۇعان دەيىن ون ءۇش ەلگە جاپونيا اۋماعىنا كىرۋ ەرەجەلەرى قاتاڭداتىلعان بولاتىن. رەسمي قۇجاتتا: «اۆستريا، بەلگيا، برازيليا، گەرمانيا، دانيا، يتاليا، نيگەريا، نيدەرلاندى، ءباا، سلوۆاكيا، شۆەيتساريا، شۆەتسيا، فرانتسيا ازاماتتارى ءۇشىن جاپونيا اۋماعىنا كىرۋ ەرەجەلەرى وزگەرتىلدى. تۋريستەر ەلگە كىرگەننەن كەيىن ءۇش كۇن ىشىندە كارانتيندىك مەكەمەلەردە بولۋى كەرەك. وسىدان كەيىن ولار كوروناۆيرۋسقا تەست تاپسىرۋى كەرەك. تەرىس ناتيجە بولعان جاعدايدا ەكى اپتا وقشاۋلانۋى ءتيىس»، – دەلىنگەن.

ۇلىبريتانيادان كوروناۆيرۋستىڭ جاڭا شتامىنىڭ تابىلۋىنا بايلانىستى الەمنىڭ بارلىق ەلدەرىنە ۆيزا بەرۋگە تىيىم جاپونيادا 28 جەلتوقساندا كۇشىنە ەندى. باستاپقىدا بۇل شارا قاڭتاردىڭ سوڭىنا دەيىن قولدانىلۋى كەرەك ەدى. بىراق كەيىننەن ول توتەنشە جاعداي رەجيمىمەن بىرگە ۇزارتىلدى. ەلدە توتەنشە رەجيم جويىلعاننان كەيىن دە جاپونيا بيلىگى شەتەلدىكتەرگە ۆيزا بەرۋ ەرەجەلەرىن جەڭىلدەتپەيدى.

قازىر ەلگە تەك جاپون ازاماتتارى جانە ۇزاق مەرزىمدى ۆيزالارى بار شەتەلدىكتەر كىرە الادى. شەكارادان وتكەندە ولار 72 ساعات ىشىندە تاپسىرىلعان تەرىس ناتيجەلى پتر تەستىن راستايتىن قۇجات بولۋى قاجەت.

"The Qazaq Times"