جاپونيادا كارانتين شەكتەۋلەرى قاتاڭداتىلدى

جاپونيادا ىندەتتىڭ ورشۋىنە بايلانىستى تاعى 4 پرەفەكتۋرادا كارانتيندىك شەكتەۋلەر كۇشەيتىلدى. وسىعان سايكەس قوعامدىق تاماقتانۋ ورىندارىنىڭ جۇمىس ۋاقىتى قىسقارىپ، ىشىمدىك ساتۋعا شەكتەۋ قويىلدى.

ۆيرۋس كەيستەرى 47 پرەفەكتۋرانىڭ 34-ىندە ارتقان. ناۋقاستاردىڭ باسىم بولىگى كوروناۆيرۋستىڭ جاڭا شتامىن جۇقتىرعاندار. اسىرەسە «بريتاندىق جانە برازيليالىق شتام» جۇقتىرعاندار سانى كوپ. جاڭا قاۋلى بويىنشا كوروناۆيرۋسقا قارسى شارالار ءساۋىردىڭ 20-سىنان باستاپ مامىردىڭ 11-ىنە دەيىن جالعاسادى.

وتكەن ايدان باستاپ ون ءۇش ەلگە جاپونيا اۋماعىنا كىرۋ ەرەجەلەرى قاتاڭداتىلعان بولاتىن. رەسمي قۇجاتتا: «اۆستريا، بەلگيا، برازيليا، گەرمانيا، دانيا، يتاليا، نيگەريا، نيدەرلاندى، ءباا، سلوۆاكيا، شۆەيتساريا، شۆەتسيا، فرانتسيا ازاماتتارى ءۇشىن جاپونيا اۋماعىنا كىرۋ ەرەجەلەرى وزگەرتىلدى. تۋريستەر ەلگە كىرگەننەن كەيىن ءۇش كۇن ىشىندە كارانتيندىك مەكەمەلەردە بولۋى كەرەك. وسىدان كەيىن ولار كوروناۆيرۋسقا تەست تاپسىرۋى كەرەك. تەرىس ناتيجە بولعان جاعدايدا ەكى اپتا وقشاۋلانۋى ءتيىس»، – دەلىنگەن.

ەلدە توتەنشە رەجيم جويىلعاننان كەيىن دە جاپونيا بيلىگى شەتەلدىكتەرگە ۆيزا بەرۋ ەرەجەلەرىن جەڭىلدەتپەيدى. قازىرگى ۋاقىتتا ەلگە تەك جاپون ازاماتتارى جانە ۇزاق مەرزىمدى ۆيزالارى بار شەتەلدىكتەر كىرە الادى. شەكارادان وتكەندە ولار 72 ساعات ىشىندە تاپسىرىلعان تەرىس ناتيجەلى پتر تەستىن راستايتىن قۇجات بولۋى قاجەت.

"The Qazaq Times"