جاپونيادا ءۇشىنشى مارتە توتەنشە جاعداي جاريالاندى

جاپونياداعى ەپيدەميولوگيالىق احۋالدىڭ ۋشىعۋىنا بايلانىستى ايماقتا ءۇشىنشى مارتە توتەنشە جاعداي رەجيمى جاريالاندى. ەلدىڭ ءتورت پرەفەكتۋراسىنداعى قاتاڭ كارانتين 11 مامىرعا دەيىن جالعاسادى.

ولاردىڭ اراسىندا توكيو، وساكا، كيوتو مەن حيوگو پرەفەكتۋرالارى بار. بيلىك وكىلدەرى ءساۋىردىڭ سوڭىندا باستالاتىن مەرەكەدەن كەيىن ايماقتاعى جاعداي ودان بەتەر كۇردەلەنىپ كەتۋى مۇمكىن دەيدى. جاڭا شەكتەۋ شارالارىنا سايكەس ءدامحانالار، ساۋدا ورىندارى، ساياباقتار، تەاتر مەن مۇراجاي جۇمىستارى شەكتەلەتىن بولادى. قوعامدىق تاماقتانۋ ورىندارى مەن قوعامدىق كولىكتەردىڭ جۇمىس ۋاقىتى دا قىسقارتىلادى. ال ستۋدەنتتەر ونلاين وقۋ فورماتىنا كوشەدى.

وتكەن ايدان باستاپ ون ءۇش ەلگە جاپونيا اۋماعىنا كىرۋ ەرەجەلەرى قاتاڭداتىلعان بولاتىن. رەسمي قۇجاتتا: «اۆستريا، بەلگيا، برازيليا، گەرمانيا، دانيا، يتاليا، نيگەريا، نيدەرلاندى، ءباا، سلوۆاكيا، شۆەيتساريا، شۆەتسيا، فرانتسيا ازاماتتارى ءۇشىن جاپونيا اۋماعىنا كىرۋ ەرەجەلەرى وزگەرتىلدى. تۋريستەر ەلگە كىرگەننەن كەيىن ءۇش كۇن ىشىندە كارانتيندىك مەكەمەلەردە بولۋى كەرەك. وسىدان كەيىن ولار كوروناۆيرۋسقا تەست تاپسىرۋى كەرەك. تەرىس ناتيجە بولعان جاعدايدا ەكى اپتا وقشاۋلانۋى ءتيىس»، – دەلىنگەن. ەلدە توتەنشە رەجيم جويىلعاننان كەيىن دە جاپونيا بيلىگى شەتەلدىكتەرگە ۆيزا بەرۋ ەرەجەلەرىن جەڭىلدەتپەيدى.

بۇگىنگە دەيىن ەلدە كوروناۆيرۋستىڭ 564 مىڭ كەيسى تىركەلگەن. ناۋقاستاردىڭ باسىم بولىگى كوروناۆيرۋستىڭ جاڭا شتامىن جۇقتىرعاندار. اسىرەسە «بريتاندىق جانە برازيليالىق شتام» جۇقتىرعاندار سانى كوپ.

"The Qazaq Times"