«ءۇشىنشى تولقىنداعى» رەانيماتسيا زالىنىڭ كورىنىسى. ۇيقىدا يا ەس-ءتۇسسىز جاتقان ناۋقاستاردىڭ بەت-الپەتى بۇلدىراتىپ مونتاجتالدى. ي.س.جەكەنوۆا اتىنداعى قالالىق كلينيكالىق جۇقپالى اۋرۋلار اۋرۋحاناسىنىڭ تۇركسىب اۋدانىنداعى فيليالى. ءساۋىر 2021 جىل. الماتى قالاسى. فوتو: QT / كۇلتەگىن اسپانۇلى

كوكتەم تۋعالى قازاقستاندا 125 مىڭنان اسا سىرقات تىركەلىپ ۇلگەردى. رەسپۋبليكانىڭ ءۇشىنشى تولقىندا قىزىل ايماققا وتكەنىنە ايدان استى. كۇندەلىكتى انىقتالىپ جاتقان ناۋقاستار سانى ەكى مىڭنان، ال ءولىم جاعدايى 20-دان ازايار ەمەس. بۇل پاندەميا كەزىندەگى ەڭ اۋىر كورسەتكىش. سالدارىنان قازاقستان الەمدە ەڭ كوپ ادام اۋىرعان ەلدەر قاتارىندا ءبىر ساتىعا كوتەرىلىپ، 46-ورىنعا ورنالاستى.

دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 5 مامىردا كوروناۆيرۋس (كۆي+) جۇققان 2443 ادام، ال 4-ءى كۇنى كوروناۆيرۋس پنەۆمونياسىنا (كۆي-) شالدىققان 177 ادام تىركەلدى. قازىر ەلدە 43 مىڭنان اسا ادام (كۆي+ بويىنشا 42 792, كۆي- بويىنشا 461) اۋىرىپ جاتىر.

#COVID پتر تەستى ارقىلى كوروناۆيرۋس جۇققانى راستالعان ناۋقاستاردىڭ باسىم بولىگى ادەتتەگىدەي الماتى قالاسى (658) مەن استانادا (250) تىركەلدى. بۇدان وزگە  قاراعاندى (240), الماتى (180), اقمولا (137), پاۆلودار (125), شقو (73), قىزىلوردا (73) وبلىستارى جانە شىمكەنتتە (65) دەرت دەندەپ تۇر. وتكەن تاۋلىكتە اۋرۋدان ايىققان 3816 ادام ۇيىنە جىبەرىلگەن. بۇدان وزگە سەيسەنبىدە جيىنى 37 ادام قايتىس بولعان.

#COVID_پنەۆمونياسى 4 مامىردا اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 105 ناۋقاس ەسەپكە الىندى. ۆەدومستۆو دەرەگىنشە، جامبىل (38), الماتى وبلىسى (24) مەن قالاسى (16), شقو (16), اتىراۋ (14), ماڭعىتاۋ جانە تۇركىستان (ارقايسىندا ون ءبىر-ون بىردەن) وبلىستارىندا كوپتەپ تىركەلگەن. سونىمەن قوسا، 80 ادام ايىعىپ شىققان، تاعى 6 ادام كوز جۇمعان.

#جالپى  دەنمين دەرەگىنە قاراعاندا، ەمدەلىپ جاتقان 43 253 ناۋقاستىڭ 14 مىڭى اۋرۋحانادا، 28 مىڭى امبۋلاتورلىق باقىلاۋدا. احۋالى ناشار 780 ناۋقاستىڭ جاعدايى قيىن، ونداعى 195 ادامنىڭ ءحالى وتە اۋىر. بۇدان وزگە 121 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

اتىراۋ، وسىلايشا ازىرگە ۆيرۋستىڭ تارالۋ قاتەرى جاعىنان سقو، قوستاناي مەن تۇركىستان وبلىسى «جاسىل ايماقتا». الماتى، شقو، اقتوبە، ماڭعىستاۋ، اتىراۋ، قىزىلوردا وبلىستارى مەن شىمكەنت  «سارى»، ال اقمولا، جامبىل، بقو، پاۆلودار،  قاراعاندى وبلىستارى، الماتى قالاسى مەن استانا «قىزىل ايماقتا» تۇر.

ۇكىمەت مالىمەتىنشە، كوكتەم باسىندا گەنومدىق زەرتتەۋ ناتيجەسىندە ەلدىڭ باسىم بولىگىنەن ۆيرۋستىڭ برازيليالىق، بريتاندىق جانە وڭتۇستىكافريكالىق شتامدارى انىقتالعان.

ەلدە قاڭتار ايىنىڭ ەكىنشى جانە اقپان ايىنىڭ العاشقى جارتىسىندا ناۋقاستار قاتارى كۇرت كوبەيگەن. اقپان ايىنىڭ ەكىنشى جارتىسىندا ءبىرشاما كەمىگەن ەدى، دەسە دە ناۋرىزدا قايتا ارتتى. قازىر تاۋلىگىنە كەمىندە 2 مىڭ سىرقات جانە 20 شاقتى ءولىم جاعدايى تىركەلىپ جاتىر. ءساۋىر ايىنداعى اۋرۋشاڭدىق ناۋرىزعا قاراعاندا 2 ەسەگە ارتتى. جالپى وسى كوكتەمدە ازىرگە 125 مىڭ (كۆي+ 121 مىڭ، كۆي- 4 مىڭداي) ناۋقاس انىقتالدى. سونداي-اق، وتكەن بىرەر ايدا رەسمي راستالعان ءولىمنىڭ ۇشتەن ءبىرى، ياعني 1622 ادام (كۆي+ 1361, كۆي- 261) ومىردەن قايتتى.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 334,5 مىڭنان، 1 تامىزدان بىلايعى كوروناۆيرۋس پنەۆمونياسى 53 مىڭنان اسقان. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 388 مىڭعا جەتكەن. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى ۆيرۋس جۇققانداردىڭ 6275-ءى (كۆي+ / U07.1 – 3833, كۆي- / U07.2 – 823, ىلەسپە اۋرۋلاردان – 1619) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان. ەسكەرەر جايت، مينيسترلىك 2020 جىلى كۆي- ستاتيستيكاسىن ەسەپكە الماس بۇرىن جىلداعىدان ءۇش ەسەگە وسكەن پنەۆمونيانىڭ 256 مىڭ جاعدايىنان (بىلتىرعى قاڭتار-شىلدە ارالىعىنداعى) كوروناۆيرۋستىق ءتۇرىن انىقتاپ-زەرتتەۋدەن باس تارتقان. ماماندار وسى كەيستەردى وبەكتيۆتى تۇردە زەردەلەگەندە شىنايى ەسەپ قازىرگىدەن الدەقايدا كوپ بولار ەدى دەپ ەسەپتەيدى. دەمەك جوعارىداعى سان دا ناقتى بولماۋى مۇمكىن.

قازاقستان ۆيرۋس تارالۋى بويىنشا الەمدە Worldometers دەرەكقورى، دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا ەكۆادوردان كەيىنگى ءبىر ساتىعا كوتەرىلىپ، 46-ورىنعا تۇراقتادى.

ۇكىمەتتىڭ سوڭعى دەرەگىنە قاراعاندا، قازاقستاندا 1 ملن 565 مىڭ ادام كوروناۆيرۋسقا قارسى رەسەيلىك Sputnik V جانە وتاندىق QazVac ۆاكتسيناسىنىڭ العاشقى دوزاسىن العان.

"The Qazaq Times"