جاپونيا-اقش شىعىس قىتاي تەڭىزىندە اسكەري جاتتىعۋ باستادى

جاپونيا مەن اقش اۋە كۇشتەرى شىعىس قىتاي تەڭىزىندە بىرلەسكەن جاتتىعۋ وتكىزدى. شىعىس قىتاي تەڭىزىندە توكيو مەن بەيجىڭ اراسىنداعى اۋماقتىق داۋ-دامايعا اينالعان سەنكاكۋ (دياويۋداو) ارالدارى ورنالاسقان.

جاپون قورعانىس مينيسترلىگىنىڭ مالىمەتىنشە, اتتىعۋعا 13 F-15 يسترەبيتەلى جانە جاپونياداعى ەكى F-2 ۇشاعى، اقش اسكەري-اۋە كۇشتەرىنىڭ B-52 ءبومبارديرى قاتىستى. جاپونيانىڭ قورعانىس ءمينيسترى نوبۋو كيسي ءباسپاسوز ءماسليحاتىندا قىتاي تاراپى بۇل جاتتىعۋلاردى قاتاڭ باقىلاپ وتىرعانىن ايتتى.

16 ساۋىردە جاپونيا پرەمەر-ءمينيسترى ەسيحيدە سۋگا اقش پرەزيدەنتى دجو بايدەنمەن كەزدەسۋ وتكىزدى. ساياساتكەرلەردىڭ باستى تاقىرىبى – ازيا-تىنىق مۇحيتى ايماعىنداعى تۇراقتىلىق پەن قاۋىپسىزدىكتىڭ ىرگەتاسى سانالاتىن ەكىجاقتى اليانستى نىعايتۋ بولدى. سونىمەن قاتار، ەكى ەل باسشىلارى قىتاي تاقىرىبىن دا تالقىلادى. بۇعان دەيىن توكيو دا، ۆاشينگتون دا بەيجىڭنىڭ سىرتقى ساياساتتاعى ۇستانىمدارىنا، وڭتۇستىك قىتاي مەن شىعىس قىتاي تەڭىزدەرىندەگى ارەكەتتەرىنە بىرنەشە رەت ەسكەرتۋ جاساعان.

2012 جىلدىڭ قىركۇيەگىندە توكيو سەنكاكۋ ارالدارىن جەكە مەنشىك يەلەرىنەن ساتىپ الۋ تۋرالى جاريالاعاننان كەيىن جاپون-قىتاي اراسىنداعى اۋماقتىق داۋ كۇشەيە ءتۇستى. وسىدان كەيىن قحر-دا جاپونياعا قارسى بىرنەشە مارتە دەمونستراتسيالار ءوتتى. سودان بەرى قىتاي كەمەلەرى ۇنەمى سەنكاكۋ ارالدارىندا جۇرەدى.

1985 جىلى يمپەريالىق قىتايمەن سوعىستا جەڭىسكە جەتكەن سوڭ، سەنكاكۋ ارالدارى مەن تايۋان جاپونيا قۇرامىنا قوسىلدى. ەكىنشى دۇنيەجۇزىلىك سوعىستا جەڭىلگەننەن كەيىن توكيو تايۋانعا باسشىلىق ەتۋ قۇقىعىنان باس تارتتى. رەسمي بەيجىڭ سەنكاكۋ ارالدارىن دا يەلەنگىسى كەلەدى. الايدا، جاپونيا ۇكىمەتى بۇل ارالدار سوعىس ناتيجەسىندە اننەكسيالانبادى دەيدى.

ەكى ەل دە سەنكاكۋ ارالدارىنىڭ ەگەمەندىگىن تالاپ ەتەدى. دەگەنمەن تاراپتار بۇرىننان بەرى ورتاق شەشىمگە كەلە الماعان. جاپونيا بيىل ماۋسىمدا سەنكاكۋ ارالدارىنىڭ اكىمشىلىك وكرۋگىن «توننودجو سەنكاكۋ» دەپ وزگەرتۋ تۋرالى قارار قابىلدادى. ال بەيجىڭ تاراپى اتالعان قۇجاتتى قىتايدىڭ ايماقتىق ەگەمەندىگىنە جاسالعان ارانداتۋشىلىق رەتىندە قابىلداپ، قۇجاتتى زاڭسىز دەپ تانىعان. سونىمەن قاتار قىتاي سەنكاكۋ ارالدارىن وزىنە تيەسىلى دەپ مالىمدەگەن.

"The Qazaq Times"