جاپون-قىتاي اۋماقتىق داۋى شيەلەنىسە باستادى

جاپونيا ۇكىمەتى سەنكاكۋ (دياويۋداو) ارالدارى ورنالاسقان ايماققا كەزەكتى مارتە «حالىقارالىق ەرەجەنى بۇزىپ، رۇقساتسىز كىرگەن» قىتايعا نارازىلىق بىلدىرەدى. بۇل تۋرالى جاپونيا مينيسترلەر كابينەتىنىڭ باس حاتشىسى كاتسۋنوبۋ كاتو ءباسپاسوز ءماسليحاتىندا مالىمدەدى.

رەسمي مالىمدەمەدە: «6-7 اقپاندا ورىن العان جاعدايعا بايلانىستى توكيو ديپلوماتيالىق ارنالار ارقىلى بەيجىڭگە نارازىلىق بىلدىرەدى. ءبىز سەنكاكۋ ارالدارىنىڭ ماڭىنداعى ايماقتى باقىلاۋ ءۇشىن بارلىق كۇش-جىگەرىمىزدى سالامىز، سونداي-اق وسى ماسەلە بويىنشا قحر-گە ەسكەرتۋ جاسايمىز»، – دەلىنگەن.

2012 جىلدىڭ قىركۇيەگىندە توكيو سەنكاكۋ ارالدارىن جەكە مەنشىك يەلەرىنەن ساتىپ الۋ تۋرالى جاريالاعاننان كەيىن جاپون-قىتاي اراسىنداعى اۋماقتىق داۋ كۇشەيە ءتۇستى. وسىدان كەيىن قحر-دا جاپونياعا قارسى بىرنەشە مارتە دەمونستراتسيالار ءوتتى. سودان بەرى قىتاي كەمەلەرى ۇنەمى سەنكاكۋ ارالدارىندا جۇرەدى.

1985 جىلى يمپەريالىق قىتايمەن سوعىستا جەڭىسكە جەتكەن سوڭ، سەنكاكۋ ارالدارى مەن تايۋان جاپونيا قۇرامىنا قوسىلدى. ەكىنشى دۇنيەجۇزىلىك سوعىستا جەڭىلگەننەن كەيىن توكيو تايۋانعا باسشىلىق ەتۋ قۇقىعىنان باس تارتتى. رەسمي بەيجىڭ سەنكاكۋ ارالدارىن دا يەلەنگىسى كەلەدى. الايدا، جاپونيا ۇكىمەتى بۇل ارالدار سوڭعىس ناتيجەسىندە اننەكسيالانبادى دەيدى.

ەكى ەل دە سەنكاكۋ ارالدارىنىڭ ەگەمەندىگىن تالاپ ەتەدى. دەگەنمەن تاراپتار بۇرىننان بەرى ورتاق شەشىمگە كەلە الماعان. جاپونيا بيىل ماۋسىمدا سەنكاكۋ ارالدارىنىڭ اكىمشىلىك وكرۋگىن «توننودجو سەنكاكۋ» دەپ وزگەرتۋ تۋرالى قارار قابىلدادى. ال بەيجىڭ تاراپى اتالعان قۇجاتتى قىتايدىڭ ايماقتىق ەگەمەندىگىنە جاسالعان ارانداتۋشىلىق رەتىندە قابىلداپ، قۇجاتتى زاڭسىز دەپ تانىعان. سونىمەن قاتار قىتاي سەنكاكۋ ارالدارىن وزىنە تيەسىلى دەپ مالىمدەگەن.

"The Qazaq Times"