تۇركيادا لوكداۋن. فوتو: انادولى.

 قاۋىپتى ىندەتتىڭ تارالۋى قايتا تولقىن العاندا تۇركيا العاش رەت تولىقتاي لوكداۋن جاريالادى. قاتاڭ كارانتيندىك شەكتەۋدەن بۇرىن ەل ازاماتتارى بازارلار مەن دۇگەندەردەن ازىق-تۇلىگىمەن، كەرەك-جاراقتارىن تولىقتادى. تۇرىك بيلىگى بولسا بەيسەنبىنىڭ (29 ءساۋىر) كەشىندە لاكداۋن باستالاتىنىن ەسكەرتتى.

تۇركيا ۇكىمەتى ىندەتتىڭ تارالۋىن باقىلاۋدا ۇستاپ تۇرعانىن ايتىپ كەلەدى. دەگەنمەن، سوڭعى بىرنەشە اپتاداعى ىندەتتىڭ ءورشۋى ەل ازاماتتارىن دا، ددسۇ-نى دا الاڭداتتى. كۇن سايىن 60 مىڭنان استام ادامنان ۆيرۋس انىقتالىپ، ءار كۇنى 300-دەن استام ادام كوز جۇمىپ جاتتى.

بيلىك سىنشىلارى تۇركيا ەكونوميكالىق مۇددەلەردى قاناعاتتاندىرۋ ءۇشىن ەلدەگى ازاماتتاردى جاپپاي ەمدەۋدەن وتكىزىپ ۇلگەرمەي جاتىپ شەكتەۋ شارالارىن تىم ەرتە الىپ تاستادى دەپ سانايدى. ناۋرىزدا كارانتيندىك شەكتەۋلەر الىنا سالىسىمەن ەلدەگى ىندەتتىڭ تارالۋى قارقىن العان.

قازىرگە دەيىن تۇركيادا شامامەن 39 مىڭ ادام ىندەتتەن كوز جۇمدى. بىراق، ەلدەگى دەنساۋلىق سالاسىنىڭ ءبىرشاما كەمەلدىلىگىنەن اۋىرعاندار سانىنا قاراعاندا قازا بولعاندار كورسەتكىشى سالىستىرمالى تومەن.

ەلدە قازىر قىتايلىق sinavac پەن Pfizer-Biontech ۆاكتسينالارى قولدانىلۋدا.

“The Qazaq Times”