قازاقستاننىڭ ەكس-پرەزيدەنتى ن. نازارباەۆ پەن قازىرگى پرەزيدەنتى ق.توقاەۆ

قازاقستانىڭ ەكس-پرەزيدەنتى نۇرسۇلتان نازارباەۆ قازاقستان حالقى اسسامبلەياسى توراعالىعىنان باس تارتىپ، ول لاۋازىمىن ەلدىڭ قازىرگى پرەزيدەنتى قاسىم-جومارت توقاەۆقا بەردى. بۇل تۋرالى بۇگىن، 28 ساۋىردە وتكەن اسسامبلەياسىنىڭ  29-سەسسياسىندا بەلگىلى بولدى.

سەسسيانى قورىتىندىلاعان نازارباەۆ قحا توراعاسى لاۋازىمىن ەلدىڭ ءىس باسىنداعى پرەزيدەنتى اتقارۋى تيىستىگىن العا تارتتى.

«قازاقستان رەسپۋبليكاسىنىڭ تۇڭعىش پرەزيدەنتى – ەلباسى تۋرالى» كونستيتۋتسيالىق زاڭعا، اسسامبلەيا تۋرالى زاڭعا سايكەس ماعان قازاقستان حالقى اسسامبلەياسىنىڭ توراعاسى لاۋازىمىن ءومىر بويى اتقارۋ قۇقىعى بەرىلگەن. جالپى مەن سىزدەرمەن بارلىق ۋاقىتتا بىرگە بولامىن ءارى ودان باس تارتپايمىن دا. دەگەنمەن اسسامبلەيانى باسقارۋعا قاتىستى بىرقاتار قۇزىرەت ەلىمىزدىڭ پرەزيدەنتىنە جۇكتەلگەن. ءتىپتى، بۇل دا ماڭىزدى ەمەس. قازاقستان حالقى اسسامبلەياسى تىرەك رەتىندە ءىس باسىنداعى پرەزيدەنتتىڭ جانىندا تۇرۋى ءتيىس جانە ەكىنشى جاعىنان مەملەكەت باسشىسى دا اسسامبلەياعا ارقا سۇيەيدى. سوندىقتان مەن اسسامبلەيانى باسقارۋ قۇقىعىمدى پرەزيدەنت قاسىم-جومارت توقاەۆقا بەرۋ تۋرالى شەشىم قابىلدادىم» دەدى نۇرسۇلتان نازارباەۆ.

قازاقستان حالقى اسسامبلەياسى 1995 جىلى كونسۋلتاتيۆتى-كەڭەسشى ورگان رەتىندە نازارباەۆ باستاماسىمەن قۇرىلعان. ونى سول ساتتەن باستاپ نازارباەۆتىڭ ءوزى باسقارىپ كەلدى. بۇل ورگانعا 2007 جىلى كونستيتۋتسيالىق مارتەبە بەرىلگەن. وسىدان كەيىن اسسامبلەيا پارلامەنتتىڭ تومەنگى پالاتاسى – ءماجىلىستىڭ توعىز دەپۋتاتىن سايلاۋ قۇقىعىنا يە بولدى. ەلدە بۇل ورگاننىڭ جۇمىسىن سىنايتىندار كوپ.

قازاقستاندى 30 جىلعا جۋىق ۇزدىكسىز بيلەگەن 80 جاستاعا نازارباەۆ 2019 جىلدىڭ ناۋرىزىندا پرەزيدەنتتىك وكىلەتىنەن باس تارتىپ، بيلىكتى سەناتتىڭ cول كەزدەگى سپيكەرى قاسىم-جومارت توقاەۆقا تاپسىرعان. بىراق ول  قاۋىپسىزدىك كەڭەسىنىڭ، «نۇر وتان» پارتياسىنىڭ توراعاسى رەتىندە بيلىككە ءالى دە ىقپالىن جۇرگىزىپ وتىر.

«The Qazaq Times»