"قىزمەتتىك وكىلەتىن اسىرا پايدالاندى" دەپ ايىپتالىپ جاتقان "سك-فارماتسيا" كومپانياسىنىڭ بۇرىنعى باسشىسى بەرىك ءشارىپتىڭ ادۆوكاتتارى سوتقا دەنساۋلىق ساقتاۋ ءمينيسترى الەكسەي تسويدى كۋاگەر رەتىندە شاقىرۋىن سۇرادى. بۇل اقپارتتى Tengrinews.kz سايتى حابارلادى.

ءشارىپتىڭ ۇستىنەن قوزعالعان ءىس بويىنشا سوت 21 ساۋىردە باستالعان. وعان ەكى باپ بويىنشا ايىپ تاعىلعان: "قىزمەتتىك وكىلەتىن اسىرا پايدالانۋ" (361-باپ، 4-تارماق 3-پۋنكت) جانە "زاڭسىز قارۋ-جاراق ساقتاۋ، الۋ، تاسىمالداۋ" (287-باپ 2-تارماق 3-4 پۋنكتەر).

Tengrinews.kz سايتىنىڭ اقپاراتىنا قارعاندا، 28 cاۋىردەگى سوت وتىرىسىندا ءشارىپتىڭ ادۆوكاتى ەرلان ماكەن جابىرلەنۋشى تاراپ (دەنساۋلىق ساقتاۋ مينيسترلىگى) وكىلىنىڭ سوت بارىسىندا قويىلعان سۇراقتارعا جاۋاپ بەرە الماعانىن العا تارتىپ، كۋاگەر رەتىندە مينيستر تسويدىڭ ءوزىن شاقىرتۋدى سۇراعان.

ال جابىرلەنۋشى تاراپ وكىلى ءمينيستردى سوتقا شاقىرتۋ "نەگىزسىز" دەپ ايتقان.

ء"وتىنىشتى قاناعاتتاندىرۋدان باس تارتۋىڭىزدى سۇرايمىن، ويتكەنى قورعاۋشى تاراپ ءوتىنىشتى بەرگەن كەزدە جالعان دەرەكتەردى پايدالاندى. ءبىزدى كوپتەگەن سۇراققا جاۋاپ بەرمەدى دەيدى. جاۋاپسىز قالعان سۇراقتارعا مەن كەلەسى سوت وتىرىسىندا جاۋاپ بەرەمىن. ولاردىڭ جالپى سانى نەبارى بەس سۇراقتى قۇرايدى. ءمينيستردى سوت وتىرىسىنا شاقىرتۋ ارتىق دەپ ەسەپتەيمىن، ويتكەنى مينيستر ماعان مينيسترلىكتىڭ اتىنان سەنىمحات جازدى"  دەدى جابىرلەنۋشى تاراپتىڭ وكىلى سەرجان ورالوۆ سوتقا.

سۋديا قوس تاراپتىڭ ءوتىنىش بويىنشا بىرجاقتى شەشىم شىعارعان جوق، بىراق سوتتا قويىلعان سۇراقتارعا جاۋاپ الا الىنباسا، كۋاگەر رەتىندە تسويدى شاقىرتۋ ماسەلەسىن قاراستىراتىنىن جەتكىزدى.

"مەن جابىرلەنۋشى تاراپتىڭ وكىلىنە قويعان سۇراقتارىم بويىنشا وعان دايىندالۋدى تاپسىردىم. قاجەت بولعان جاعدايدا ءسىز مينيسترلىكتىڭ قانداي دا ءبىر قۇرىلىمدىق بولىمشەلەرىنىڭ باسشىلارىنان جاۋاپ الۋ تۋرالى ءوتىنىش جاساي الاسىز، ولار وسى سۇراقتارعا تولىعىراق جاۋاپ بەرە الادى، ءبىز ولاردى شاقىرامىز. ەگەر سوت جاۋاپ الماسا جانە ءمينيستردى شاقىرۋ قاجەت دەپ تاپسا، مەن ادۆوكاتتىڭ وتىنىشىنە ورالامىن. سونىمەن قاتار، كۋاگەرلەر تىزىمىندە بۇرىنعى مينيستر ەلجان ءبىرتانوۆ بار، وعان دا سۇراقتار قويا الامىز" دەدى سۋديا قانات دۇيسەمبيەۆ.

پروكۋراتۋرانىڭ بولجاۋىنشا، بەرىك ءشارىپ ء"بىر رەتتىك قورعانىش كيىمدەرىن ساتىپ الۋ بويىنشا باسقا تاسىمالداۋشىلارعا قاراعاندا قىمباتىراق باعا ۇسىنىپ، سونىڭ وزىندە ءونىمدى ۋاقىتىندا جەتكىزبەگەن كومپانياعا باسىمدىق بەرگەن". پروكۋراتۋرا وكىلدەرىنىڭ ايتۋىنشا، بىلتىر ىندەت ورشىگەن شاقتا – ءساۋىر-مامىر ايلارىندا رەسپۋبليكالىق ماڭىزى بار قالالار مەن ايماقتاردا سونىڭ سالدارىنان قورعانىش كيىم تاپشىلىعى تۋىنداپ، ناتيجەسىندە دارىگەرلەر جاپپاي كوروناۆيرۋسقا شالدىققان. سوتتا دەنساۋلىق ساقتاۋ مينيسترلىگىنەن كۋالىك رەتىندە كەلگەن ادام سول ارالىقتا ەلدە 2 مىڭعا جۋىق مەديتسينا قىزمەتكەرىنە كوروناۆيرۋس جۇققانىن ايتقان.

بەرىك ءشارىپتى ايىپتاپ جاتقان پروكۋرورلاردىڭ ايتۋىنشا، ول 2007 جىلى وڭتۇستىك قازاقستان وبلىسىنىڭ (قازىرگى تۇركىستان وبلىسى) دەنساۋلىق ساقتاۋ دەپارتامەنتىندە قىزمەت ىستەپ جۇرگەن كەزدە دۇكەننەن قارۋ-جاراق ساتىپ الىپ، ونى زاڭدى تۇردە تىركەتپەگەن. بىلتىر تامىز ايىندا ءتىنتۋ كەزىندە سول ارەكەتى اشكەرەلەنىپ، تاركىلەنگەن. وعان "قارۋ-جاراقتى زاڭسىز ساقتاۋعا" بايلانىستى ايىپ وسى ارەكەتىنە بايلانىستى تاعىلىپ وتىر.

"سك-فارماتسيا" – مەملەكەتتىك اۋرۋحانالارعا ءدارى-دارمەك جەتكىزەتىن بىرىڭعاي ديستريبيۋتور كومپانيا. بەرىك ءشارىپ بىلتىر وسى كومپانيانى 4 اي باسقارعان. ول بۇل قىزمەتىنەن بىلتىر شىلدە ايىندا ەلدە كوروناۆيرۋس ىندەتى ءورشىپ تۇرعان شاقتا پرەزيدەنت قاسىم-جومارت توقاەۆ سىنان كەيىن بوساتىلعان.  توقاەۆ سول كەزدە "سك-فارماتسيا" توڭىرەگىندە "قانداي دا كلانداردىڭ مۇددەسى بار" دەپ ايتقان.

«The Qazaq Times»