«ساتىلاتىن ەكپە پاسپورتى» تۋرالى رەسمي تۇسىنىكتەمە جانە الماتىداعى ەپيداحۋال

الماتى قالاسىنىڭ اكىمدىگى  كەيبىر اقپارات قۇرالدارىنادا جاريالانعان «ۆاكتسيناتسيا پاسپورتتىن ساتۋ جونىندەگى جاڭا بيزنەس» تۋرالى دەرەكتى جوققا شىعاردى.

قوعامدىق دەنساۋلىق باسقارماسى «مۇنداي ءىس-ارەكەتتىڭ قىلمىستىق سيپاتتا ەكەنىن جانە زاڭمەن قۋدالاناتىنىن» رەسمي تۇردە حابارلايدى. وسى ماتەريال بويىنشا ارنايى قىزمەتتىك تەرگەۋ جۇمىسى باستالعان.

قازىرگى ۋاقىتتا ۆاكتسيناتسيادان وتكەندىگى تۋرالى ەلەكتروندىق پاسپورتتى بەرۋ فاكتىسى راستالمادى.

اكىمدىك مالىمەتىنشە، بارلىق مەديتسينالىق ۇيىمدار مەن رەدو-نىڭ اقپاراتتىق جۇيەسى ءجىتى تەكسەرىلىپ جاتىر. بۇل اقپارات راستالعان جاعدايدا، تەرگەۋ ماتەريالدى  تيىستى شارا قولدانۋ ماقساتىندا زاڭعا سايكەس قۇقىق قورعاۋ ورگاندارىنا بەرىلمەك. باسقارما وكىلى قىزمەتتىك تەرگەۋ بارىسى تۋرالى اقپارات كەيىننەن تولىقتىرۋعا ۋادە ەتتى.

ۆاكتسينا الۋعا كەلگەن ازاماتتاردى تىركەۋ ءبولىمى. 17 ەمحانا. الماتى قالاسى. 28 ءساۋىر 2021 جىل. فوتو: QT / كۇلتەگىن اسپانۇلى

الماتىداعى ەپيداحۋال

ەلۋ كۇندەي «قىزىل ايماقتا» تۇرعان قالادا ءساۋىر ايىنداعى اۋرۋشاڭدىق تۇتاس ناۋرىزداعى ەسەپكە قاراعاندا ەسەلەپ ءوستى (ناۋرىز ايى – 9631, 1-27 ءساۋىر – 18 017 ناۋقاس). قالادا سەيسەنبى كۇنى 700-دەي سىرقات انىقتالدى. ونىڭ 619-ىندا سيمپتومدىق بەلگىلەرى بار، 76-ى سيمپتومسىز.

قوعامدىق دەنساۋلىق ساقتاۋ باسقارماسىنىڭ مالىمەتىنشە، وتكەن تاۋلىكتە 398 ادام اۋرۋحاناعا جاتقىزىلعان جانە 460 ادام ۇيىنە جىبەرىلگەن. جالپى قالادا 5502 ادام امبۋلاتورلىق دەڭگەيدە ەمدەلۋدە جانە سىيىمدىلىعى 6060 ورىن بولاتىن ينفەكتسيالىق ستاتسيونارلاردا 3734 ادام جاتىر. ولاردىڭ اراسىندا جاعدايى جەڭىل ءارى ورتا دەڭگەيدە 125 بالا بار. بۇدان وزگە اۋرۋحانداعى ەرەسەكتەردىڭ 900-دەيى اۋىر جانە 3118-ءى ورتا حالدە. ال رەانيماتسيا جانە قارقىندى تەراپيا بولىمدەرىندە 246 ناۋقاس بار. 38 ادام ءوجج، 85 ناۋقاس ءينۆازيۆتى ەمەس ءوجج-ىمەن جانە 89 سىرقات High flow اپپاراتىمەن تىنىستاپ جاتىر.

رەسمي دەرەككە قاراعاندا، جالپىحالىقتىق ۆاكتسيناتسيالاۋ ناۋقانى باستالعالى، ياعني 1 اقپاننان بەرى مەگاپوليستە 194 مىڭ ادام ەكپە العان. اكىمدىك مالىمەتىنشە، ازىرگە 210 ەگۋ پۋنكتى مەن 309 ەگۋ بريگاداسىندا 1197 مەدقىزمەتكەر جۇمىس ىستەيدى.

بىلتىر ءبىرىنشى تولقىندا – «ماۋسىم-شىلدە قىرعىنىندا» 6372, قازان ايىندا جۇرگەن ەكىنشى تولقىندا 3607 جانە بيىل كوكتەمگى ءۇشىنشى تولقىندا ازىرگە 27 648 جاعداي تىركەلدى.

الماتىدا پاندەميا كەزىندە كوروناۆيرۋس پەن پنەۆمونيا سىرقاتتارىنىڭ قاتارى 58 مىڭعا جەتتى. مۇنىڭ 47.5%-ى, ياعني 27 مىڭ ادام وسى كوكتەمدە تىركەلگەن. وكىنىشكە قاراي، كەيىنگى ەكى ايدا 333 الماتىلىق كوز جۇمعان.

“The Qazaq Times”