الماتى قالاسىنىڭ سانيتارلىق-ەپيدەميولوگيالىق باقىلاۋ جونىندەگى دەپارتامەنتى تىركەلمەگەن قازاقستان دەموكراتيالىق پارتياسىنىڭ 24 ساۋىرگە بەلگىلەنگەن ميتينگىسىنە بايلانىستى ەسكەرتۋ جاسادى. دەپارتامەنت قازىر قالانىڭ كوروناۆيرۋس بويىنشا "قىزىل ايماقتا" تۇرعانىن العا تارتىپ، قوعامدىق شارا وتكىزۋگە تىيىم سالىنعانىن ەسكەرتتى.

"ازامات ج.مامايدىڭ ميتينگىگە شىعۋ تۋرالى شاقىرۋىنا وراي، الماتى قالاسىنىڭ سانيتارلىق-ەپيدەميولوگيالىق باقىلاۋ جونىندەگى دەپارتامەنتى قالانىڭ كوروناۆيرۋس بويىنشا "قىزىل ايماقتا" ەكەنىن، سول سەبەپتى قالادا قوعامدىق شارا وتكىزۋگە تىيىم سالىنعانىن ەسكەرتەدى. مۇنداي تىيىم الماتى قالاسىنىڭ باس سانيتار دارىگەرىنىڭ 2 ساۋىردە شىققان N15 قاۋلىسىندا ايتىلعان" دەلىنگەن  سەس حابارلاماسىندا.

ال جانبولات ماماي بۇل ەسكەرتۋ "جەر ءۇشىن وتەتىن ميتينگىنى توقتاتۋعا سەبەپ بولا المايدى" دەگەن ويدا.

– بەكشيننىڭ ءسوزى، سەس-ءتىڭ ءسوزى ءبىزدىڭ ميتينگىنى توقتا المايدى. قازاق جەرىنە قاۋىپ ءتونىپ تۇرعاندا، ۇيدە قاراپ جاتا المايمىز. قالاي بولعاندا دا ەرتەڭ ميتينگى مىندەتتى تۇردە وتەدى، – دەيدى تىركەلمەگەن قازاقستان دەموكراتيالىق پارتياسىنىڭ جەتەكشىسى ماماي Qazaq Times تىلشىسىنە.

ونىڭ سوزىنشە، ميتينگى وتكىزۋ جايلى اكىمدىككە ەسكەرتۋ جاسالعان.

بۇعان دەيىن جانبولات ماماي بارشا قازاقستاندىقتى جەردى شەتەلدىكتەرگە جالعا بەرمەۋدى تالاپ ەتىپ، 24 ساۋىردە  ميتينگىگە شىعۋعا شاقىرعان ەدى. مامايدىڭ ايتۋىنا قاراعاندا، ميتينگىگە شىعۋعا سەبەپ – ماجىلىستە ماقۇلدانىپ، سەناتتا قارالىپ جاتقان جەر تۋرالى زاڭ جوباسىندا ورمان شارۋاشىلىعىمەن اينالىسۋ ءۇشىن شەتەلدىكتەرگە جەر بەرۋدى كوزدەيتىن باپتىڭ بولۋى.

"The Qazaq Times"