فوتو: bbci.co.uk

رەسەيدە الەكسەي ناۆالنىيدىڭ جاقتاستارى وتىزگەن ميتينگتە 1700-دەن استام ادام ۇستالدى. ۇستالعانداردىڭ باسىم بولىگى سانكت-پەتەربۋرگتەن.

كەشە قيىر شىعىستا ۆلاديۆوستوكتان باستاپ، بالتىق جاعالاۋىنداعى كالينينگرادقا دەيىنگى ارالىقتا ءتۇرلى قالالاردا مىڭداعان ادام شەرۋگە شىقتى. سول كۇنى رەسەي پرەزيدەنتى ۆلاديمير پۋتين فەدەرالدىق كەڭەسكە جولداۋ جاساعان.

شەرۋ باستالماي جاتىپ پوليتسيا بەلسەندىلەر مەن جۋرناليستەردى ءسات سايىن ۇستاپ، ءتىنتۋ جۇرگىزدى. ميتينگ بەلگىلەنگەن اۋماقتار قورشاۋعا الىندى. شەرۋگە شىققاندار ناۆالنىيعا مەديتسينالىق كومەك كورسەتۋدى تالاپ ەتتى. سونىمەن قاتار ولار «ءپۋتينسىز رەسەي» دەپ ۇرانداتتى.

بىرنەشە كۇن بۇرىن بيلىك  ناۆالنىي نەگىزىن قالاعان «جەمقورلىقپەن كۇرەس» قورىن «ەكسترەميستىك ۇيىم» دەپ اتاپ، ونى جاپپاق بولدى. ب اس پروكۋراتۋرا تۇرعىندارعا «رۇقسات ەتىلمەگەن ميتينگىگە شىقپاۋ قاجەتتىگىن» ەسكەرتىپ، شىققان جاعدايدا جاپپاي تارتىپسىزدىك بابى بويىنشا ءىس قوزعالاتىنىن مالىمدەگەن.

ماسكەۋدە الەكسەي ناۆالنىيدىڭ ءباسپاسوز حاتشىسى كيرا يارمىش، وپپوزيتسيونەر ليۋبوۆ سوبول، ساياساتكەر ۆلاديمير رىجكوۆتى ۇستاپ اكەتكەن. ەكى بەلسەندى دە سوت قاڭتاردا وتكەن ناۆالنىيدى قولداۋ اكتسياسىندا «ەپيدەميولوگيادىق ەرەجەلەردى بۇزدى» دەپ ايىپتاعان. SOTA باسىلىمىنىڭ ءتىلشىسى سەرگەي كۋوكۋگە ميتينگىگە قاتىسپاۋ جايلى ەسكەرتۋ جاساعان. كراسنوداردا سوت ناۆالنىي كومانداسىنىڭ بەلسەندىسى اليپات سۋلتانبەگوۆانى نارازىلىق اكتسياسى تۋرالى TikTok-تا جاريالانعان ۆيدەوسى ءۇشىن 10 كۇنگە قاماۋعا العان.  پوليتسيا حاتتاماسىندا «حالىقتى نارازىلىق اكتسياسىنا قاتىسۋعا شاقىرىپ، بەينەروليگىندە ميتينگ تۋرالى زاڭدى بۇزدى» دەلىنگەن.

كرەمل سىنشىسى الەكسەي ناۆالنىي 31 ناۋرىزدان بەرى اشتىق جاريالاپ، دەنساۋلىعى ناشارلاعان. وسى اپتادا پوكروۆاداعى تۇرمەدەن سوتتالعاندارعا ارنالعان وبلىستىق اۋرۋحاناعا اۋىستىرىلدى. بۇعان دەيىن ناۆالنىيدى ەمدەگەن دارىگەرلەر ونىڭ قان ءاناليزىنىڭ قورىتىندىسىن جاريالاپ، دارىگەر اناستاسيا ۆاسيلەۆا ناۋقاستىڭ جۇرەگى توقتاپ قالۋى مۇمكىن دەپ ەسكەرتكەن. ناۋرىزدىڭ سوڭىندا مىڭنان استام دارىگەر بيلىككە اشىق حات جازىپ، ساياساتكەرگە تاۋەلسىز دارىگەردى كىرگىزۋگە شاقىرعان.

"The Qazaq Times"