ايالداماعا توقتاپ تۇرعان اۆتوبۋس. الماتى قالاسى. فوتو: QT / كۇلتەگىن اسپانۇلى

36 كۇننەن بەرى «قىزىل ايماقتا» تۇرعان الماتى قالاسىندا ءساۋىر ايىنىڭ العاشقى ەكى اپتاسىندا اۋىرعاندار سانى تۇتاس ناۋرىز ايىنداعى جيىنتىق ەسەپپەن تەڭەسۋگە جاقىن (ناۋرىز ايى – 9631, 1-14 ءساۋىر – 9034 ناۋقاس). قالادا ءسارسەنبى كۇنى 657 سىرقات انىقتالدى. ونىڭ 547-سىندە سيمپتومدىق بەلگىلەرى بار، 110-ى سيمپتومسىز.

قوعامدىق دەنساۋلىق ساقتاۋ باسقارماسىنىڭ مالىمەتىنشە، وتكەن تاۋلىكتە 416 ادام اۋرۋحاناعا جاتقىزىلعان جانە 339 ادام ۇيىنە جىبەرىلگەن. ناۋرىز ايىنىڭ ورتاسىندا باس سانيتار دارىگەر جانداربەك بەكشين ءبىر كۇندە اۋرۋحاناعا جاتقىزىلعاندار سانى 500-دەن اسسا، قالادا لوكداۋن كۇشەيتىلىپ، بلوك-بەكەت قويىلاتىنىن ەسكەرتكەن.

جالپى قالادا 6201 ادام امبۋلاتورلىق دەڭگەيدە ەمدەلۋدە جانە سىيىمدىلىعى 6060 ورىن بولاتىن ينفەكتسيالىق ستاتسيونارلاردا 3712 ادام جاتىر. ولاردىڭ اراسىندا جاعدايى جەڭىل ءارى ورتا دەڭگەيدە 112 بالا بار. بۇدان وزگە اۋرۋحانداعى ەرەسەكتەردىڭ 767-ءسى اۋىر جانە 2945-ءى ورتا حالدە. ال رەانيماتسيا جانە قارقىندى تەراپيا بولىمدەرىندەگى 272 ورىننىڭ 235-ىندە ناۋقاستار جاتىر. 32 ادام ءوجج، 84 ناۋقاس ءينۆازيۆتى ەمەس ءوجج-ىمەن جانە 84 سىرقات High flow اپپاراتىمەن تىنىستاپ جاتىر.

رەسمي دەرەككە قاراعاندا، جالپىحالىقتىق ۆاكتسيناتسيالاۋ ناۋقانى باستالعالى، ياعني 1 اقپاننان بەرى مەگاپوليستە 87 مىڭعا تارتا ادام ەكپە العان.

بىلتىر ءبىرىنشى تولقىندا – «ماۋسىم-شىلدە قىرعىنىندا» 6372, قازان ايىندا جۇرگەن ەكىنشى تولقىندا 3607 جانە بيىل كوكتەمگى ءۇشىنشى تولقىندا ازىرگە 18 665 جاعداي تىركەلدى. سونىمەن قوسا، كەيىنگى ەكى جارىم ايدا قالادا 108 مىڭنان اسا ادام ەكپە العان. اكىمدىك مالىمەتىنشە، ازىرگە 203 ەگۋ پۋنكتى مەن 406 ەگۋ بريگاداسى جۇمىس ىستەيدى.

الماتىدا ءبىر جىلدا كوروناۆيرۋس پەن پنەۆمونيا سىرقاتتارىنىڭ قاتارى 49 مىڭنان اسقان. مۇنىڭ 38%-ى، ياعني 18,5 مىڭ ادام وسى كوكتەمدە تىركەلگەن. وكىنىشكە قاراي، وسى ارالىقتا 220 الماتىلىق كوز جۇمعان.

ءباا، مىسىر، مالديۆ، يسپانيا، تۇركيا، گرۋزيا، بەلارۋس، شري-لانكا، ساۋد ارابياسى، قحر، وڭتۇستىك كورەيا، گەرمانيا، ۋكراينا، رەسەي فەدەراتسياسى، ءازىربايجان، تاجىكستان، وزبەكستان جانە قىرعىزستان ءتارىزدى ەلدەردەن الماتى قالاسىنا 1 ناۋرىزدان بەرى جۇزدەگەن حالىقارالىق اۋە رەيسى كەلدى. كوكتەم تۋعالى الاتاۋ باۋرايىنا 687 رەيسپەن 100 مىڭداي جولاۋشى ۇشىپ كەلگەن: 95 مىڭ ادام پتر قورىتىندىسىمەن، 4590 ادام تەست انىقتاماسىنسىز. وسىنىڭ سالدارىنان جۇعۋ جانە ولىمگە سوقتىرۋ قاتەرى جوعارى بريتاندىق جانە وڭتۇستىكافريكالىق شتامدار تىركەلىپ، وزگە وڭىرلەرگە تارالعان.

ەلدە قاڭتار ايىنىڭ ەكىنشى جانە اقپان ايىنىڭ العاشقى جارتىسىندا ناۋقاستار قاتارى كۇرت كوبەيگەن. اقپان ايىنىڭ ەكىنشى جارتىسىندا ءبىرشاما كەمىگەن ەدى، دەسە دە ناۋرىزدا قايتا ارتتى. قازىر تاۋلىگىنە 2 مىڭ سىرقات جانە 20 شاقتى ءولىم جاعدايى تىركەلىپ جاتىر. قالانىڭ باس سانيتار دارىگەرى جانداربەك بەكشين بەس اپتادا 10 قاۋلى شىعاردى. سەبەبى قابىلدانعان ەرەجە مەن قاتاڭداتىلعان لوكداۋن شاراسى كۇتكەندەي ناتيجە بەرمەدى. مۇنى 5 ءساۋىر كۇنگى بريفينگتە بەكشين دەمالىس كۇندەرى قوعامدىق كولىكتى توقتاتۋ جانە ساۋدا قاتارلارىنىڭ جۇمىسىن شەكتەۋ سياقتى شەشىم «ءتيىمسىز بولعانىن»، ياعني بۇدان ىندەت احۋالى جاقسارماعانىن مويىندادى. ول ءبىر ايدان اسا ۋاقىت «قىزىل ايماقتا» تۇرعان قالادا تىركەلىپ جاتقان ناۋقاستار ۆيرۋستى «كوبىنە جاياۋ جۇرگىنشىلەردىڭ جولدارى مەن ساياباقتا» جۇقتىرعانىن ايتقان.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 278 مىڭعا، 1 تامىزدان بىلايعى كوروناۆيرۋس پنەۆمونياسى 51 مىڭعا جەتكەن. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 330 مىڭنان اسقان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى. سونداي-اق پاندەميا كەزىندە جالپى ۆيرۋس جۇققانداردىڭ 5,6 مىڭى (كۆي+ / U07.1 – 3306, كۆي- / U07.2 – 741, ىلەسپە اۋرۋلاردان – 1619) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى.

"The Qazaq Times"