بيلىك تولىعىمەن پرەزيدەنت قولىنا وتەدى: قىرعىزستاندا جاپاروۆ ۇسىنعان زاڭ قابىلداندى

قىرعىزستاندا وتكەن رەفەرەندۋمنىڭ العاشقى قورىتىندىلارى بەلگىلى بولدى. ازاتتىق ۇنالعىسى سايلاۋشىلاردىڭ 79%-ى كونستيتۋتسيانىڭ پرەزيدەنت وكىلەتتىلىگىن كۇشەيتەتىن جوباسىنا قولداپ داۋىس بەرگەنىن جازدى.

ورتالىق سايلاۋ كوميتەتىنىڭ مالىمەتىنشە، داۋىس بەرۋگە سايلاۋشىلاردىڭ 37,4%-ى عانا قاتىسقان. ساياسي شاراعا 31 مەملەكەتتىڭ 183 حالىقارالىق باقىلاۋشىسى اككرەديتتەلگەن. باقىلاۋشىلار رەسەي، ءازىربايجان، بەلارۋس، ۇلىبريتانيا، قازاقستان، ماكەدونيا، مولدوۆا، ساۋد ارابياسى، تۇركيا، وزبەكستان، ۋكراينا، فرانتسيا، جاپونيا جانە باسقا دا ەلدەردەن كەلدى.

كونستيتۋتسياعا وزگەرىستەر ەنگىزۋ تۋرالى شەشىم قىرعىزستاندا 2021 جىلى 10 قاڭتاردا وتكەن رەفەرەندۋم بارىسىندا قابىلدانعان. ياعني پرەزيدەنت بيلىگىن كۇشەيتۋدى ەلدىڭ قازىرگى پرەزيدەنتى سادىر جاپاروۆ ۇسىنعان. جاپاروۆ جاڭا كونستيتۋتسيانى تولىقتاي قىرعىز ماماندارى ازىرلەگەنىن، وسىعان دەيىنگى كونستيتۋتسيانىڭ «شەتەلدەن كوشىرىلگەنىن» ايتتى.

جاڭا كونستيتۋتسيا تولىقتاي ەنگىزىلگەننەن كەيىن «حالىق قۇرىلتايى» اتتى پرەزيدەنت باقىلاۋىنداعى جاڭا قۇرىلىم جۇمىسىن باستايدى. ساراپشىلار اتالعان قۇرىلتاي پارلامەنتكە بالاما بولىپ، پرەزيدەنتكە پارلامەنت بيلىگىن شەكتەۋگە جول بەرەدى دەپ سانايدى. بىراق جاپاروۆ «بيلىك تولىعىمەن پرەزيدەنتكە وتەدى» دەگەن تۇجىرىمداردى جوققا شىعاردى. سونىمەن قاتار، جاڭا زاڭ پارلامەنتتەگى دەپۋتات سانىن 120-دان 90-عا دەيىن ازايتىپ، پرەزيدەنتكە سۋديالار مەن قۇقىق قورعاۋ قۇرىلىمدارىنىڭ باسشىسىن تاعايىنداۋعا مۇمكىندىك بەرەدى.

52 جاستاعى جاپاروۆ – اۆتوريتار باسشىلاردىڭ ۇزاق جىل بيلىكتە وتىرۋى داستۇرگە اينالعان ورتالىق ازياداعى قازىرگى ەڭ جاس پرەزيدەنت. ول بيلىك باسىنا كەلگەندە كونستيتۋتسياعا وزگەرىستەر ەنگىزۋدى قولعا العان. بۇل مالىمدەمەدەن كەيىن Human Rights Watch ۇيىمى مەن بىرقاتار زاڭگەر قازىرگى پارلامەنت سايلاۋىنىڭ مەرزىمى ءوتىپ كەتكەنىن، سول سەبەپتى ونىڭ كونستيتۋتسياعا وزگەرىس ەنگىزۋ تۋرالى باستاما كوتەرە المايتىنىن ايتقان. ال جەرگىلىكتى ساراپشىلار سادىر جاپاروۆتىڭ پرەزيدەنتتىك باسقارۋ فورماسىنا ءوتۋ باستاماسى ەلدى ورتالىق ازيانىڭ وزگە ەلدەرىندەگى سەكىلدى اۆتوريتارلىق رەجيمگە اكەلۋى مۇمكىن دەپ الاڭداۋشىلىق بىلدىرگەن.

"The Qazaq Times"