قىتاي پالەستينانىڭ قايتا قۇرىلۋىن قولدايتىنىن مالىمدەدى

قىتاي سىرتقى ىستەر ءمينيسترى ۆان ي حابارلاما جاريالاپ، رەسمي پەكيننىڭ شىعىس يەرۋساليمدى استانا ەتكەن دەربەس پالەستينانىڭ قۇرىلۋىن قۋاتتايتىندىعىن مالىمدەدى. وسىدان بۇرىن پالەستينانىڭ سىرتقى ىستەر ءمينيسترى رياد ءال-ماليكي رەسمي ساپارلاي كەلىپ، قىتاي سىرتقى ىستەر مينيسترىمەن كەزدەسكەن بولاتىن. بۇل تۋرالى «اناتولى» اقپاراتتىق اگەنتتىگىنىڭ رەسمي سايتى حابارلايدى.

قىتاي سىرتقى ىستەر ءمينيسترى ۆان ي 1967 جىلعى شەكارانىڭ نەگىزىندە شىعىس يەرۋساليمدى استانا ەتكەن تۇتاستىقتاعى ءبىر پالەستينانىڭ قۇرىلۋىن قۋاتتايتىنىن ايتا كەلىپ: «بەيبىتشىلىك كەلىسسوزدەر مەن ەكى جاقتى سەنىمگە كولەڭكە تۇسىرەتىن تالپىنىستاردى تەز ارادا جويۋ كەرەك. جازىقسىز ادامدار نىساناعا الىنعان زاڭسىزدىق پەن جاڭا تۇرعىن ايماعى قۇرىلىستارى تەز ارادا توقتاتىلۋى قاجەت»، – دەدى. سونىمەن بىرگە يزرايل باسقىنشىلىعىنداعى  پالەستينا جەرى ماسەلەسى بۇۇ قاۋىپسىزدىك كەڭەسىنىڭ نازارىندا قالپىنا كەلتىرىلۋى كەرەك ەكەنىن، بۇنىڭ دۇنيە بەيبىتشىلىگى ءۇشىن اسا وزەكتىلىگىن دە اتاپ ءوتتى.

قىتايدىڭ پالەستينا ازاتتىعىن قولداۋى يزرايل-پالەستينا اراسىنداعى قاقتىعىستار مەن ساياسي تىرەستەر، سونداي-اق، ورتا-شىعىس ەلدەرى ءۇشىن ماڭىزدى بولىپ سانالادى. قازىرگى كۇندە پالەستينا ازاتتىعىن قۋاتتاۋشى ەلدەر كۇننەن-كۇنگە كوبەيىپ كەلەدى. وسى تۋرالى يران «پالەستينانى ازات ەتۋ» قوزعالىسىنا باسشىلىق ەتىپ وتىر.

پالەستينا جاق 1967 جىلعى شەكارالىق كەلىسىم پالەستين-يزرايل اراسىنداعى قاقتىعىستى جوياتىن بىردەن ءبىر شەشىم ەكەنىن العا تارتۋدا. بۇل جولى پالەستينا سىرتقى ىستەر ءمينيسترى ءال-ماليكي پالەستينا ازاتتىعى ماسەلەسى جولىندا قىتايدىڭ ماڭىزدى ءرول اتقارۋىن سۇراندى.

“The Qazaq Times”