فوتو: ماحمۇد ابباس

اراب ەلدەرىنىڭ باسشىلارى ۋاشينگتون بيلىگىنىڭ قالاۋىمەن دايىندالىپ جاتقان پالەستينالىقتار مەن يزرايلدىكتەردىڭ ارا-قاتىناستارىن رەتتەۋگە باعىتتالعان «عاسىر كەلىسىمشارتى» اتتى قۇجاتقا قارسى. بۇل تۋرالى پالەستينا باسشىسى ماحمۇد ابباس حابارلادى، دەپ جازادى «evrensel.net» اقپارات قۇرالى.

«ءبىزدىڭ اراب باۋىرلارىمىز وسى ءبىر «عاسىر كەلىسىمشارتى» دەپ اتالاتىن قۇجاتقا قارسى ەكەندىكتەرىن ايتتى»، - دەگەن پالەستينالىق باسشىنىڭ سوزىنشە، ەۋروپانىڭ، ازيانىڭ جانە افريكانىڭ بىرقاتار ەلدەرى دە وسىنداي كەلىسىمشارتتىڭ جاسالۋى مۇمكىن ەمەس دەپ سانايدى. اقپارات قۇرالدارىنىڭ حابارلارىنا قاراعاندا، «عاسىر كەلىسىمشارتى» شىعىس يەرۋساليمنىڭ يزرايلگە بەرىلۋىن قاراستىرادى. سونىمەن قاتار يوردان وزەنىنىڭ باتىس جاعالاۋىنداعى كەزىندە زاڭسىز قۇرىلعان يزرايلدىك ەلدىمەكەندەردىڭ اۋقىمدى بولىگىنىڭ ساقتالۋىنا دا باعىتتالعان. ونىڭ ۇستىنە، اتالعان كەلىسىمشارتتا 5,9 ملن. پالەستينالىق بوسقىندارعا ءوز جەرلەرىنىڭ قايتارىلۋى تۋرالى ماسەلەگە ەشقانداي ورىن بەرىلمەگەن. بارىمىزگە بەلگىلى، گازا سەكتورىندا پالەستينالىقتار مەن يزرايلدىك اسكەريلەردىڭ اراسىندا كوپتەن بەرى جەر داۋى بىتپەي كەلەدى. ەندى، پالەستينا جاعى وسى قۇجات ارقىلى وزدەرىنىڭ زور شىعىنعا ۇشىرايتىندىقتارىن ايتىپ، حالىقارالىق وداقتاردىڭ بۇل ىسكە ارالاسپاۋىن، ۋاشينگتون ۇكىمەتىنىڭ اتالعان ماسەلەگە باعىتتالعان كەلىسىمشارتىنا قول قويمايتىندىقتارىن دا مالىمدەۋدە. ولاردىڭ ايتۋلارىنشا، اتالعان كەلىسىمشارتتا پالەستينالىقتاردىڭ مۇددەسىن قورعايتىن بىردە-ءبىر پۋنكت جوق.

“The Qazaq Times”