Türikmenstan eki palatalı parlamenttik jüyege köşudi bastadı: tarihta alğaş ret Parlamenttiñ joğarğı palatasına saylau ötti. Nätijesinde, 100% dauıspen el basşısı Gurbangulı Berdimwhamedov jañadan jasaqtalğan senattıñ (Halıq mäslihatı) qwramına endi. Bwl turalı Türikmenstannıñ memlekettik aqparattıq agenttigi habarladı.

Qazir 63 jastağı Berdimwhamedov memleket basşısı jäne prem'er-ministri qızmetin qatar atqaradı. Resmi basılımdar saylaudıñ ädil ötkenin jazdı. Biraq şetel baqılauşılarına saylaudı baqılauğa rwqsat etilmedi jäne oppoziciya kandidattarına da jol berilmedi.

Bwğan deyin parlament bir Palatadan – Medjlisten ğana twrğan. 48 mandat üşin 112 kandidat küresti. «Tdh» mälimetteri boyınşa monitoringti partiyalardan, qoğamdıq wyımdardan jäne azamattardıñ jekelegen toptarınan 440 wlttıq baqılauşı jüzege asırdı. Mandat üşin «baq sınağandar» bes oblıstan jäne Aşhabadtan jergilikti halıq keñesteriniñ otırıstarında jasırın dauıs beru arqılı saylandı. Tağı segiz müşeni prezident tağayındaydı.

Aqpannıñ ortasında Türikmenstan prezidenti Gurbangulı Berdimwhamedov öziniñ wlı Serdardı Ükimettiñ vice-törağası etip tağayındadı. Vice-prem'erdiñ mindetine öndiristiñ barlıq salalarına cifrlıq jüye men innovaciyalıq tehnologiyalardı engizu, sonday-aq osı qızmetti baqılau kiredi.

24 aqpanda ötken Parlament qwrılımındağı özgerister turalı konstituciyalıq tüzetuler jariyalanğannan keyin, qazirgi prezident öz mwragerin bilikke dayındap jatır degen boljamdar aytıldı. Sarapşılar 39 jastağı Serdardı mwrager dep sanaydı. Ol qazirdiñ özinde Medjlis zañ komitetiniñ basşısı, Sırtqı ister ministriniñ orınbasarı, aymaqtıñ basşısı boldı (Ahal uälayatı). 2020 jılı aqpanda äkesi onı jaña önerkäsip jäne qwrılıs öndirisi ministrliginiñ basşısı etip tağayındadı. Ol soñğı lauazımın şamamen bir jıl atqarğan.

"The Qazaq Times"