بايدەننىڭ سۇحباتىنا رەاكتسيا: رەسەي اقش-تاعى ەلشىسىن قايتاردى

• ءسىز ءپۋتيندى قانىشەر دەپ ەسەپتەيسىز بە؟
• ءيا!

بايدەننىڭ اۆس تەلەارناسىنداعى وسى سۇحباتىنان كەيىن رەسەي ۆاشينگتونداعى ەلشىسى اناتولي انتونوۆتى ەكى ەل ساياساتىن تالقىلاۋ ءۇشىن ماسكەۋگە قايتاردى. بۇل تۋرالى ءسىم وكىلى ماريا زاحاروۆا حابارلادى.

«ءبىز ءۇشىن ەڭ باستىسى – ۆاشينگتون مەن ماسكەۋ اراسىنداعى دەگراداتسياعا كەتكەن ساياساتتى قالپىنا كەلتىرۋ. تاراپتار ديپلوماتيالىق قارىم-قاتىناستىڭ بولاشاعىن ناقتىلاۋى ءتيىس»، – دەدى زاحاروۆا.

سۇحباتتا ماسكەۋدىڭ 2020 جىلى اقش-تاعى پرەزيدەنت سايلاۋىنا ارالاسقانى جايلى بايانداعان امەريكالىق بارلاۋ قىزمەتىنىڭ ەسەبى ءسوز بولعان. بايدەن ەگەر رەسەيدىڭ سايلاۋعا ارالاسقانى راستالسا، ونىڭ ارتى جاقسىلىققا اپارمايدى دەپ پۋتينگە ەسكەرتۋ جاسادى.

اق ءۇي باسشىسىنىڭ سۇحباتى مەن سانكتسيالاردان كەيىن رەسەيلىك اكتسيالار نارىعى، رۋبل قۇلدىرادى. دوللار باعامى 1,13 رۋبلگە، ەۋرو باعامى - 1,33 رۋبلگە، 88,08 رۋبلگە دەيىن وسكەن. رەسەي مەملەكەتتىك دۋماسىنىڭ توراعاسى ۆياچەسلاۆ ۆولودين ءوزىنىڭ Telegram پاراقشاسىندا: «بايدەننىڭ بۇگىنگى مالىمدەمەسى اقىلعا سىيمايدى. دەمەك، دەموكراتيالىق پرينتسيپتەر مەن مورالدى ءبىرىنشى رولگە قوياتىن مەملەكەتتىڭ باسشىسى ءوزىن ۇستاي المايدى دەگەن ءسوز. ءبىزدىڭ مەملەكەت باسشىمىز تۋرالى مۇنداي پىكىر ايتۋعا ەشكىمنىڭ قۇقىعى جوق. بايدەن ءوز مالىمدەمەسىمەن ەلىمىزدىڭ ازاماتتارىن قورلادى. پۋتين – ءبىزدىڭ پرەزيدەنت، وعان جاسالعان شابۋىل – ءبىزدىڭ ەلگە جاسالعان شابۋىل!»، – دەپ جازعان.

اق ءۇيدىڭ ءباسپاسوز حاتشىسى دجەننيفەر پساكي 17 ناۋرىزدا «رەسەي ءوزىنىڭ ارەكەتى ءۇشىن جاۋاپ بەرەدى» دەپ مالىمدەدى. بۇعان دەيىن اقش بارلاۋ قىزمەتى ارنايى بايانداماسىندا ماسكەۋ 2020 جىلى اقش-تاعى پرەزيدەنت سايلاۋىنا ارالاستى دەگەن تۇجىرىم جاساعان.

18 ناۋرىزدا اقش ساۋدا دەپارتامەنتى سەرگەي سكريپال مەن يۋليا سكريپال جانە الەكسەي ناۆالنىيدىڭ ۋلانۋىنا بايلانىستى رەسەيمەن ساۋدا-ساتتىقتا جاڭا شەكتەۋلەردى قاتايتتى. وعان سايكەس، اقش ۇلتتىق قاۋىپسىزدىككە قاتىسى بار تاۋارلار مەن تەحنولوگياسىن رەسەيگە ەكسپورتتاۋدى توقتاتادى. ماسەلە قورعانىس سالاسىندا قولدانىلاتىن ونىمدەر مەن ءتۇرلى ماقساتتا قولدانىلۋى مۇمكىن تاۋارلار جونىندە بولىپ وتىر. سونىڭ سالدارىنان رەسەيدىڭ اۆياتسيا جانە عارىش سالاسى ءىرى ماسەلەگە كەزىگۋى مۇمكىن. جاڭا ساۋدا شەكتەۋلەرى بۇگىننەن باستاپ كۇشىنە ەنەدى.

سكريپالدار وتباسى ۋلانعاننان كەيىن امەريكا بيلىگى حيميالىق قارۋعا تىيىم سالۋ تۋرالى 1991 جىلى قابىلدانعان زاڭ اياسىندا ەكى سانكتسيا سالعان. ناۆالنىيدىڭ ۋلانۋىنا بايلانىستى بىلتىر تامىز ايىندا جانە بيىل ناۋرىز ايىندا سوعان ۇقساس شارالار قولدانىلدى. قارا تىزىمگە بىرقاتار جەكە جانە زاڭدى تۇلعالار ەنگەن، اراسىندا رەسەيلىك عىلىمي ينستيتۋتتار دا بار.

سەيسەنبىدە اقش-تىڭ ۇلتتىق بارلاۋ قىزمەتىنىڭ قۇپيا ەسەبى جاريالاندى. باياندامادا پۋتين دجو بايدەننىڭ بەدەلىن ءتۇسىرۋ تۋرالى بۇيرىقا بەرگەنى جازىلعان. سونىمەن قاتار، اۆتورلار: «2020 جىلى بىردە-ءبىر شەتەلدىك دەرجاۆا رەسەيدىڭ سياقتى سايلاۋعا اسەر ەتۋ ماقساتىندا كەڭ اۋقىمدى ناۋقان جۇرگىزۋگە تىرىسپادى. ال رەسەي دەموكراتيالىق پارتيانىڭ ەلەكتروندىق پوشتاسىنا حاكەرلىك شابۋىل جاساپ، الەۋمەتتىك جەلىلەردە فەيك حابار تاراتتى»، – دەيدى.

ءوز كەزەگىندە ۆاشينگتونداعى رەسەي ەلشىلىگى دە، كرەمل دە امەريكالىق بارلاۋ قىزمەتىنىڭ ەسەبىن «نەگىزسىز جانە دالەلدەنبەگەن اقپارات» ەكەنىن ايتتى. ءپۋتيننىڭ ءباسپاسوز حاتشىسى دميتري پەسكوۆ بۇل جونىندە: «ءبىز بۇل بايانداما قورىتىندىسىمەن كەلىسپەيمىز. رەسەي 2020 جىلعى سايلاۋعا ارالاسقان جوق. كانديداتتاردىڭ سايلاۋ ناۋقانىنا دا قاتىسقان جوق. سول سەبەپتى بۇل ەسەپ نەگىزىز»، – دەپ مالىمدەدى.

"The Qazaq Times"