لۋكاشەنكونىڭ بيلىككە وڭ باعاسى: بەلارۋستە كونستيتۋتسيانى وزگەرتۋ باستالدى

بەلارۋس پرەزيدەنتى الەكساندر لۋكاشەنكو ەل كونستيتۋتسياسىنا وزگەرىستەر ەنگىزۋ جونىندەگى كوميسسيا جۇمىسىنىڭ باستالعانىن حابارلادى. سونىمەن قاتار، ول ميتينگ كەزىندە بەلاۋرس بيلىگى جۇرگىزگەن ساياساتقا وڭ باعا بەردى.

«كونستيتۋتسيالىق كوميسسيانىڭ قىزمەتى جاريالى جانە اشىق سيپاتتا بولۋى ءتيىس. قولجەتىمدىلىكتىڭ بولۋى حالىقتىڭ سەنىمىن ارتتىرادى. سوندىقتان كونستيتۋتسيالىق كوميسسيانىڭ باستى مىندەتى – نەگىزگى زاڭعا ۇسىنىلعان تۇزەتۋلەردى كەڭىنەن تالقىلاۋدى ۇيىمداستىرۋ»، – دەدى لۋكاشەنكو.

وسى تاقىرىپ اياسىندا جۇرگىزىلگەن ساۋالنامادا قاتىسۋشىلاردىڭ 65%-دان استامى كونستيتۋتسيانى وزگەرتۋگە قارسىلىق بىلدىرگەن.

لۋكاشەنكونىڭ ايتۋىنشا، وتكەن جىلعى وقيعالار، پرەزيدەنتتىك سايلاۋدان كەيىن باستالعان نارازىلىق اكتسيالارى ەلدەگى الەۋمەتتىك-ساياسي جۇيەنىڭ تۇراقتىلىعىن كورسەتكەن. «بارلىق بەلورۋستار وزدەرىنىڭ بەيبىت ءومىرىن، ەگەمەندىگىن جوعالتۋى مۇمكىن ەكەنىن ءتۇسىندى. بۇل – ءبىزدىڭ قوعامداعى باستى قۇندىلىق. وسى قۇندىلىقتاردىڭ كەپىلى مىقتى بيلىك جانە ءبىزدىڭ ءومىر سالتىمىز، اتا-بابالارىمىزدىڭ داستۇرلەرىن قورعايتىن حالىق ەكەنىن ۋاقىت كورسەتتى»، – دەدى ول.

كونستيتۋتسياعا تۇزەتۋلەر ەنگىزۋ جونىندەگى كوميسسيانى قۇرۋ تۋرالى شەشىم اقپاندا VI بۇكىل بەلارۋس حالىق جينالىسىندا قابىلدانعان. كوميسسيا ءوز جۇمىسىن 15 ناۋرىزدا، بەلارۋستە كونستيتۋتسيا كۇنى اتاپ وتىلەتىن كەزدە باستاماق. كوميسسيا قۇرامىنا مەملەكەتتىك ورگاندار، زاڭ، قوعامدىق بىرلەستىكتەر، ەكونوميكا سىندى ءارتۇرلى سالالار مەن الەۋمەتتىك سالانىڭ وكىلدەرى كىرەدى.

بىلتىر قاراشادا الەكساندر لۋكاشەنكو جاڭا كونستيتۋتسيا قابىلدانعاننان كەيىن بيلىكتەن كەتۋگە ۋادە بەرگەن. بۇل جونىندە ول: «مەن ءوزىم ءۇشىن ەشقانداي كونستيتۋتسيا جاسامايمىن. سوندىقتان، سابىر ەتىڭىزدەر. ءبىزدىڭ كونستيتۋتسيا جوعارى ماڭىزعا يە. قازاقستان، رەسەي جانە ءبىز قاتاڭ كونستيتۋتسياسى بار ءۇش وزىق مەملەكەتپىز، مۇندا بارلىعى پرەزيدەنتتىڭ شەشىمىنە بايلانىستى. مەن جەكە بيلىگىمدى ەمەس، ەلدىڭ بولاشاعىن ويلايمىن»، – دەدى.

ول كونستيتۋتسياعا تۇزەتۋلەر ەنگىزۋدى جانە ونداعى رەسپۋبليكا پرەزيدەنتىنىڭ وكىلەتتىكتەرىن تۇزەتۋ كەرەگىن اتاپ ءوتتى. سونىمەن قاتار، «ەۋروپانىڭ سوڭعى ديكتاتورى» دەموكراتيانى اينالىپ وتكەن جوق. «دەموكراتيا بولسىن دەيسىڭدەر. ءبىز مۇنى گورباچەۆ كەزىندە وتتىك. ءبىز بارلىعىن – كاسىپورىن باسشىلارىن، ديرەكتورلاردى سايلادىق. ال ناتيجە نە بولدى؟ ەل جوعالىپ، وداق قۇلادى. قازىر بىزگە وسى كەرەك پە؟»، – دەدى لۋكاشەنكو.

بەلارۋس كونستيتۋتسياسىنا تۇزەتۋلەر ەنگىزۋدى لۋكاشەنكو بۇرىننان ايتىپ جۇرگەن. قازاندا ول وپپوزيتسيا جەتەكشىلەرىمەن كونستيتۋتسياعا ەنگىزىلگەن تۇزەتۋلەردى تالقىلاعان. بۇل تالقىعا 11 ادام قاتىستى، ونىڭ ىشىندە بەلگازپرومبانكتىڭ بۇرىنعى باسشىسى ۆيكتور باباريكو جانە ونىڭ ۇلى ەدۋارد باباريكو، ۇيلەستىرۋ كەڭەسى پرەزيديۋمىنىڭ مۇشەسى ليليا ۆلاسوۆا جانە وپپوزيتسيالىق شتابتىڭ ۇيلەستىرۋشىسى يۋري ۆوسكرەسەنسكي.

كەزدەسۋ ورنى ەرەكشە بولدى: وپپوزيتسيا جەتەكشىلەرى تەرگەۋ يزولياتورىندا بولعاندىقتان، لۋكاشەنكو بۇل تاقىرىپتى سول جەردە تالقىلادى. بەلارۋس پرەزيدەنتتىگىنە ەكس-كانديدات سۆەتلانا تيحانوۆسكايا نەگىزگى زاڭدى ياعني كونستيتۋتسيانى وزگەرتۋ يدەياسىن قولدامادى. «بۇل ارقىلى لۋكاشەنكو بيلىك ەتۋ مەرزىمىن ۇزارتپاق» دەگەن تيحانوۆسكايا پرەزيدەنتپەن كەزدەسۋدەن باس تارتتى.

"The Qazaq Times"