الماتىداعى ۇشاق اپاتى: ەكى ەكيپاج مۇشەسىنىڭ جاعدايى بەلگىلى بولدى

الماتىداعى ۇشاق اپاتىنان ءتىرى قالعان ەكى ەكيپاج مۇشەسىنە وتا جاسالدى. قازىر ولاردىڭ جاعدايى تۇراقتى اۋىر.

13 ناۋرىزدا الماتى اۋەجايىنا قونار ساتتە قازاقستان ۇلتتىق قاۋىپسىزدىك كوميتەتى اۆياتسيا قىزمەتىنىڭ ۇشاعى ان-26 اپاتقا  ۇشىرادى. ۇشاق ىشىندە التى ەكيپاج مۇشەسى بولعان. ونىڭ تورتەۋى وقيعا ورنىندا قازا تاپتى. ەكەۋى اۋىر حالدە اۋرۋحاناعا جەتكىزىلدى.

ۇلتتىق قاۋىپسىزدىك كوميتەتى قازا تاپقان اسكەري قىزمەتكەرلەردىڭ اتى-ءجونى مەن لاۋازىمىن جاريالادى:

مايور بارلىقباەۆ عابيت ەسىمدەۇلى، 1984 جىلى 19 قازاندا تۋعان، اۆياتسيا ءبولىمىنىڭ شتۋرمانى;

كاپيتان بايمۇراتوۆ دوسجان عالىمبەكۇلى، 1985 جىلى 15 جەلتوقساندا تۋعان، اۆياتسيا ءبولىمى ۇشۋ توبىنىڭ بورت تەحنيگى;

اعا لەيتەنانت ساعىمباەۆ مۇحتار قاجىمۇقانۇلى، 1994 جىلى 24 قاراشادا تۋعان، اۆياتسيا ءبولىمى ۇشۋ توبى ەكيپاجىنىڭ شتۋرمانى;

سەرجانت ۆاسيلكوۆ ەۆگەني بوريسوۆيچ، 1985 جىلى 10 قاراشادا تۋعان، اۆياتسيا ءبولىمى ۇشۋ توبىنىڭ اعا بورت مەحانيگى.

ان-26 ۇشاعى 1947 جىلى 31 تامىزدا العاش اۋەگە كوتەرىلگەن. ال 1973 جىلى كەڭەس وداعىندا ىسكە قوسىلعان.

اۋە كەمەسىنىڭ تەحنيكالىق سيپاتتاماسى مىناداي:

تاسىمالداۋ قۋاتى – 5,6 توننا;

قالىپتى كوتەرۋ سالماعى – 23 توننا;

ماكسيمالدى كوتەرۋ سالماعى – 24 توننا;

ىشكى باكتارداعى وتىننىڭ كولەمى 7 توننانى قۇرايدى;

جوعارى جىلدامدىعى – 540 كم/ساع.

قانات ارالىعى – 29,2 مەتر;

ۇشاقتىڭ ۇزىندىعى – 23,8 مەتر;

بيىكتىگى – 8,6 مەتر;

سىيىمدىلىعى 40 ادامعا دەيىن.

"The Qazaq Times"