الماتى اۋەجايىنىڭ ماڭىنداعى 191 جەر تەلىمى زاڭسىز ساتىلعان. قر سىبايلاس-جەمقورلىقپەن كۇرەس قىزمەتى وسىلاي دەپ مالىمدەدى.

رەسمي مالىمەتكە سەنسەك تۇرعىن ۇيلەر سالۋ ءۇشىن ساتىلعان جەر تەلىمدەرىنىڭ كولەمى 12,7 گا قۇرايدى ەكەن. حابارلامادا ايتىلعانداي، پانفيلوۆ اۋىلدىق وكرۋگىنىڭ بۇرىنعى اكىمىنىڭ باستاماسىمەن قۇرىلعان قىلمىستىق توپ مەملەكەتتىك قورداعى جەر تەلىمدەرىن زاڭسىز جولمەن يەمدەنىپ، ساتىلىمعا شىعارعان.

2019 جىلدىڭ 27 جەلتوقسانىندا  “Bek Air”  اۋە كومپانياسىنىڭ جولاۋشىلار مىنگەن ۇشاعى الماتى اۋەجايىنان ۇشىپ شىققان ساتتە اپاتقا ۇشىراپ، زاڭسىز سالىندى دەپ تانىلعان تۇرعىن ۇيگە سوقتىعىسقان بولاتىن. وسى وقيعادان كەيىن پانفيلوۆ اۋىلدىق وكرۋگىنىڭ ەكس-اكىمى نۇرعالي اپپازوۆتىڭ ۇستىنەن اۋەجەي ماڭىنداعى جەرلەردى ساتتى دەگەن كۇدىكپەن قىلمىستىق ءىس قوزعالعان. كەيىنىرەك كۇدىكتىلەر قاتارىنا ەڭبەكشىقازاق اۋدانى اكىمىنىڭ ورىنباسارى دا ءىلىندى. قازىر تالعار اۋداندىق اكىمدىگىنىڭ جاۋاپتى قىزمەتكەرلەرىنە قاتىستى تەرگەۋ جۇمىستارى جۇرگىزىلىپ جاتىر دەلىنگەن رەسمي مالىمدەمەدە.

وتكەن جىلدىڭ 28 جەلتوقسانىندا بولعان ۇشاق اپاتىنان 12 ادام قازا تاۋىپ، 49 ادام جاراقات العان ەدى. ەكسپەرتيزانىڭ ناتيجەسى بويىنشا اپاتقا ۇشاقتاعى تەحنيكالىق اقاۋ سەبەپ بولعان. “Bek Air”  اۋە كومپانياسىنىڭ باسشىلىعى ەگەر جولدا زاڭسىز سالىنعا ءۇي بولماعاندا، اپاتتان ەش شىعىنسىز شىعۋعا بولاتىن ەدى دەپ، تۇرعىن ءۇيدىڭ يەسىمەن سوتتاسقان بولاتىن. قۇزىرلى ورگانداردىڭ زاڭسىز جەر تەلىمدەرىنە نەلىكتەن اپاتقا دەيىن نازار اۋدارماعانداعى ءالى دە تۇسىنىكسىز.

"The Qazaq Times"