ۋكراينا بەلارۋس كاسىپكەرلەرىنە سانكتسيا ەنگىزبەك

ۋكراينانىڭ ۇلتتىق قاۋىپسىزدىك جانە قورعانىس كەڭەسى (ۇقك) بەلارۋس شەنەۋنىكتەرى مەن كاسىپكەرلەرىنە سانكتسيالار ەنگىزۋدى قاراستىرادى. جوعارى رادا دەپۋتاتى الەكسەي گونچارەنكو پرەزيدەنت اكىمشىلىگىنە وسىنداي سۇراۋ حات جولداعان.

پرەزيدەنت كەڭسەسىنىڭ گونچارەنكونىڭ سۇراۋىنا بەرگەن جاۋابىندا: «بەلارۋس رەسپۋبليكاسىنىڭ جەكەلەگەن ازاماتتارىنا قاتىستى شەكتەۋ شارالارىن (سانكتسيالار) ەنگىزۋ تۋرالى دەپۋتاتتىق ءوتىنىشتىڭ ناتيجەلەرى تۋرالى حاباردار ەتۋ ءۇشىن ۋكراينانىڭ ۇلتتىق قاۋىپسىزدىك جانە قورعانىس كەڭەسىنىڭ اپپاراتىنا ۇسىنىس حات جولدايمىز»،  – دەلىنگەن.

سانكتسيا لۋكاشەنكو رەجيمىن قولدايتىن بەلارۋس ازاماتتارىنا قارسى ەنگىزىلۋى مۇمكىن. قارا تىزىمدە «كارپاتزاپادترانس» جشس-ءنىڭ يەسى، كاسىپكەر نيكولاي ۆوروبيان بار.

26 اقپاندا ۋكراينا ۇكىمەتىندە بەلارۋس ازاماتتارىنا قارسى سانكتسيالار ەنگىزۋ باستاماسى كوتەرىلگەن. دەپۋتتاردىڭ باسىم بولىگى «اقش پەن ەۋرووداق بەلارۋستەگى احۋالعا بايلانىستى سانكتسيا ەنگىزگەندە، ۋكراينا ءۇنسىز قالماۋى ءتيىس. ۋكراينا ادام قۇقىقتارىنىڭ تاپتالۋىنا قارسى»، – دەيدى.

19 اقپاندا ۋكراينانىڭ ۇلتتىق قاۋىپسىزدىك جانە قورعانىس كەڭەسى «سامارا - باتىس باعىتى» قۇبىرىنىڭ بولىگىن، سونداي-اق وتىن ترانزيتىنە ارنالعان «پريكارپاتزاپادترانس» مۇناي قۇبىرىن مەملەكەتتىك مەنشىككە قايتارۋ تۋرالى شەشىم قابىلدادى. ۋكراينالىق باق-تىڭ حابارلاۋىنشا، ونى بەلارۋس كاسىپكەرى نيكولاي ۆوروبەي جانە گەرمانيا ازاماتى اناتولي شەفەر يەمدەنەدى.

"The Qazaq Times"