زەرتتەۋ: «ەستيتىن مەملەكەتتىڭ» شەنەۋنىكتەرى ەتيكا جاعىنان اقساپ تۇر

قازاقستانداعى بىرىككەن ۇلتتار ۇيىمىنىڭ دامۋ باعدارلاماسى (بۇۇدب) مەن مەملەكەتتىك قىزمەت ىستەرى اگەنتتىگى قوعامدىق پىكىر ينستيتۋتىنىڭ مەملەكەتتىك قىزمەتكەرلەر ەتيكاسىن باعالاۋعا ارنالعان بىلتىرعى زەرتتەۋ ەسەبىن ءبولىستى.

7 مىڭ رەسپوندەنت قاتىسقان ساۋالناما مەملەكەتتىك قىزمەت تۋرالى زاڭعا وزگەرىستەرگە بايلانىستى ادەپ قاعيداسىننىڭ ساقتالۋ دەڭگەيىن باعالاۋعا باعىتتالعان.

زەرتتەۋگە مەملەكەتتىك قىزمەتكەرلەردەن باسقا، كاسىپكەرلەر مەن تاۋەلسىز ساراپشىلار تارتىلعان. قاتىسۋشىلار ون بالدىق باعالاۋ جۇيەسى نەگىزىندە مەملەكەتتىك قىزمەتكەرلەردىڭ ادەپ-ەتيكا دەڭگەيىن سىناپ كورگەن.

ساۋالناما قورىتىندىسى بويىنشا، ون بالدىق شكالانىڭ تەك 5,09 جيناعان جوعارعى سوت ەڭ تومەنگى ورىننان كورىندى. ال ەڭ جوعارعى باعانى تسيفرلىق دامۋ  مينيسترلىگى (8,01) يەمدەنگەن.

باعالاۋ قورىتىندىسىنا سايكەس، ۇلتتىق قاۋىپسىزدىك كوميتەتى، كوشى-قون قىزمەتى كوميتەتى، قىلمىستىق-اتقارۋ جۇيەسى كوميتەتى، باس پروكۋراتۋرا، كونستيتۋتسيالىق كەڭەس، ىشكى ىستەر مينيسترلىگى، سونداي-اق دەنساۋلىق ساقتاۋ مينيسترلىگى جەتى بالدان تومەن العان.

سونىمەن قاتار، ساۋالناماعا قاتىسۋشىلار وبلىس،قالا، اۋدان اكىمدىك قىزمەتكەرلەرىنىڭ مىنەز-قۇلىق ەرەجەلەرىنە باعا بەردى. اكىمدىك قىزمەتكەرلەرىنىڭ جوعارعى كورسەتكىشى قوستاناي (9,08) مەن جامبىل (8,05) وبلىسىنا بەرىلدى. ەڭ تومەن كورسەتكىش الماتى قالاسى اكىمدىگىنىڭ قىزمەتكەرلەرىنە (4,94) تيەسىلى. بۇدان وزگە  تومەن باعالانعان بەس ءوڭىر قاتارىندا – شىمكەنت (5,25), تۇركىستان (5,52), اتىراۋ (5,74), اقمولا (5,92) وبلىستارى تۇر.

قازاقستاندا شەنەۋنىكتەردىڭ ارتىق ءسوز ايتىپ نە وعاش قىلىق كورسەتىپ باسى داۋعا قالاتىن كەزى از از ەمەس. 2016 جىلى سول كەزدەگى پارلامەنت دەپۋتاتى مۇحتار تىنىكەەۆ ماس كۇيىندە قاراعاندى ءماسليحاتىنىڭ دەپۋتاتىن ۇرىپ-سوعىپ، بالاعاتتاعانى ءۇشىن مانداتىنان ايىرىلعان. ءماجىلىس دەپۋتاتتارىنىڭ اراسىندا بىلتىر باقىتبەك سماعۇل نارازىلىققا شىققان انالاردىڭ بىرىنە قاراتا «قاتىن»، «شابالاڭداما» دەپ بۇيىرا سويلەگەن. ءدال وسىلاي ۇزاق جىلداردان بەرى دەپۋتاتتىقتا جۇرگەن نۇروتاندىق بەكبولات تىلەۋحاننىڭ الەۋمەتتىك جەلىلەردەگى «اسا اۋىر قارعىسى» تاراپ، قوعامدى تىكسىندىرگەن. بىراق بيلىك پارتياسىنىڭ ەكى بىردەي دەپۋتاتى ەشقانداي جاۋاپقا تارتىلمادى.

بيىلدىڭ وزىندە الماتى ءماسليحاتىنىڭ دەپۋتاتى، بوكستان سيدنەي وليمپياداسىنىڭ چەمپيونى ەرماحان يبرايموۆتىڭ اتى ەكى رەت بەلگىلى بولدى. ءبىرىنشىسى. 10 قاڭتار سايلاۋ كۇنگى نارازىلىقتا ازاماتتىق قوعامنىڭ جاس بەلسەندىلەرىنە قارسى سەس كورسەتىپ، پلاكاتىن جىرتىپ تاستاعان. ەكىنشىسى، اقپاندا جامبىل وبلىسىنداعى جاڭاتاس وقيعاسىنان كەيىنگى سۇحباتىندا كوپبالالى ايەلدەردىڭ نامىسىنا تيگەن. كوپتىڭ شامىنا تيگەن  دەپۋتاتتىڭ بۇل ارەكەتتەرى ادەپ كەڭەسىندە قارالعان يا قارالماعانى تۋرالى اقپارات جوق.

وسىعان دەيىن 2018 جىلعى زەرتتەۋدە مەملەكەتتىك قىزمەتكەرلەردىڭ ادەپتىلىگىنىڭ ورتاشا ۇپايى 6,88 بولعانىن ەسكەرسەك، «حالىق ۇنىنە قۇلاق اساتىن مەملەكەت»، «ەستيتىن ۇكىمەت» تۇجىرىمداماسىن العا تارتقان بيلىك وكىلدەرى ءالى دە ءسوز بەن ءىستى قابىستىرۋدا شەتىن قالىپ وتىرعانىن بايقاۋ قيىن ەمەس.

“The Qazaq Times”