ەندى شەنەۋنىك تە، وتباسى دا شەتەلدەن شوت اشا المايدى

سارسەنبى كۇنى وتكەن ۇكىمەت وتىرىسىندا قارجى ءمينيسترى ەرۇلان جاماۋباەۆ لاۋازىمدى شەنەۋنىكتەردىڭ وتباسى مۇشەلەرىنە شەتەلدىك شوتتاردى اشۋعا تىيىم سالىناتىنىن حابارلادى.

مينيستر كولەڭكەلى ەكونوميكاعا قارسى كۇرەس شاراسى ءجۇرىپ جاتىر دەپ سەندرەدى.

«كولەڭكەلى ەكونوميكاعا قارسى ءىس-قيمىل جونىندەگى جوسپار وزەكتەندىرىلەدى جانە وففشورلىق يۋريسديكتسيالارعا اقشالاي اۋدارىم بولىگى بويىنشا زاڭناما جەتىلدىرىلەدى.  ...ەكونوميكالىق ىنتىماقتاستىق جانە دامۋ ۇيىمى (ەىدۇ) ەلدەرىنىڭ سالىق ورگاندارى اراسىندا اقپارات الماسۋ اياسىندا قر رەزيدەنتتەرىنىڭ قارجىلىق شوتتارى تۋرالى مالىمەتتەر تالدانباق. سالىقتىق جانە كەدەندىك اكىمشىلەندىرۋدى تسيفرلاندىرۋ بويىنشا جۇمىس جانداندىرىلدى. استانا-1, ەلەكتروندىق شوت-فاكتۋرالار جۇيەسى جانە ۆيرتۋالدى قويما ىسكە قوسىلدى. بۇدان باسقا، تەمەكى جانە الكوگول ونىمدەرىن تاڭبالاۋ پيلوتتىق جوبا رەتىندە جۇرگىزىلەدى جانە ونلاين-باقىلاۋ كاسسالىق ماشينالارى (بكم) ەنگىزىلدى»، – دەدى جاماۋباەۆ.

مينيسترلىك FATF ۇسىنىمدارىن ەنگىزە وتىرىپ، مەملەكەتتىك جانە كۆازيمەملەكەتتىك سەكتوردىڭ لاۋازىمدى تۇلعالارىنا جانە ولاردىڭ وتباسى مۇشەلەرىنە شەتەلدىك شوتتاردى اشۋعا تىيىم سالماق.

سونداي-اق، الداعى ۋاقىتتا سالىق ورگاندارى كاسىپكەرلىك سۋيۋەكتىلەردىڭ  تۇپكىلىكتى بەنەفيتسيارلارى تۋرالى مالىمەتتەردى الۋعا مۇمكىندىك بەرەتىن زاڭنامانى بەكىتەدى.

1 قىركۇيەك قازاقستان پرەزيدەنتى توقاەۆتىڭ حالىققا ارناعان جولداۋىندا شەتەلدە ەسەپ شوتى بار مەملەكەتتىك قىزمەتشىلەر، دەپۋتاتتار مەن سۋديالار قىزمەتتەن بوساتىلاتىنىن ايتقان. سونىمەن قوسا،  ەگەر قازاقستاندىق شەنەۋنىكتەر نەمەسە كۆازيمەملەكەتتىك سەكتور قىزمەتكەرلەرىندە قوس ازاماتتىق انىقتالسا، بىردەن ورنىن بوساتادى-مىس.

ىشكى ىستەر ۆيتسە-ءمينيسترى مارات قوجاەۆتىڭ دەرەگىنشە، 2019 جىلى ەلدە قوس ازاماتتىعى بار 500 ادام انىقتالعان. سىرت ەلدە ازاماتتىعى بار ادامنىڭ كوبىندە بولەك ەسەپ شوتى بولاتىنى انىق.

“The Qazaq Times”