2021 جىلى 10 قاڭتاردا قازاقستان بويىنشا، ءماجىلىس پەن ءماسليحاتتار سايلاۋى ءوتتى. ساياسي ناۋقان بارىسىندا سايلاۋ ۋچاسكەلەرى تاراپىنان تاۋەلسىز بايقاۋشىلار مەن باقىلاۋشىلاردىڭ قاتىسۋىنا، اقپارات قۇرالدارىنىڭ كەيبىر وكىلدەرىنىڭ حابار تاراتۋىنا ءارتۇرلى كەدەرگىلەر جاسالدى. بىراق باس پروكۋراتۋرا مۇنى «بولماشى زاڭبۇزۋشىلىقتار» دەپ اتادى.

دۇيسەنبىگە قاراعان ءتۇنى ءۇش بىردەي ۇيىم ەسەبى وسى ۋاقىتقا دەيىن ساۋالناما قورىتىندىلارىنا سايكەس كەلەتىن ەكسزيت-پول مالىمەتىن جاريالادى.

«قوعامدىق پىكىر» عىلىمي-زەرتتەۋ ينستيتۋتى، كتك تەلەارناسىنىڭ تاپسىرىسى بويىنشا «دەموكراتيا ينستيتۋتى» عىلىمي-زەرتتەۋ اسسوتسياتسياسى قب جانە «استانا» تەلەارناسىنىڭ تاپسىرىسىمەن «Astana Zertteu» كومپانياسى ەكسزيت-پولل قورىتىندىسىن ۇسىندى. بارلىعىنىڭ ەسەبى ءبىر-ءبىرىنىڭ «اۋزىنا تۇكىرىپ قويعانداي»، اينا-قاتەسىز ۇقساس.

اشىق دەرەكوزدەردەگى مالىمەتتەرگە قاراعاندا، الەۋمەتتىك زەرتتەۋ-ساۋالناما جانە ەكزيت-پولل جۇرگىزۋگە رۇقسات العان «استانا-زەرتتەۋ» قوعامدىق قورى مەن «قوعامدىق پىكىر» زەرتتەۋ ينستيتۋتىنىڭ تابىسى سايلاۋ قارساڭىندا ايتارلىقتاي مولايعان.

بۇعان دەيىن بيلىك پارتياسىنىڭ تاپسىرىسى بويىنشا «استانا-زەرتتەۋ» قوعامدىق قورى جۇرتشىلىققا ساۋالناما جۇرگىزىپ، رەسپونتەنتتەردىڭ 74,2%-ى Nur Otan-دى تاڭداعانىن حابارلاعان. سونىمەن قوسا، تۇڭعىش پرەزيدەنت كۇنى قارساڭىندا اقورداشىل ساياساتتانۋشى، Nur Otan مۇشەسى ءارى ەڭ بەلدى ناسيحاتشىسى، الداعى سايلاۋدا ءماجىلىس دەپۋتاتتىعىنا ۇمىتكەر ەرلان سايىروۆ ءوزى باسقاراتىن ەۋرازيالىق ينتەگراتسيا ينستيتۋتىڭ وسى تاقىلەتتەس زەرتتەۋىندە بيلىك پارتياسىنا پىكىر بىلدىرۋشىلەردىڭ 72,3%-ى داۋىس بەرگەنى ايتىلدى.

جوعارىداعى كورسەتكىشتەرمەن سارىنداس سارىنداس ەسەپتى «قوعامدىق پىكىر» زەرتتەۋ ينستيتۋتى دا قاراشا ايىندا جاريالاعان: نازارباەۆ باسقاراتىن پارتيانىڭ ۇلەسى ادەتتەگىدەي 72,1% كورسەتكەن-ءمىس.

ءبىر قىزىعى، ەشبىر زەرتتەۋ ۇيىمىنىڭ قورىتىندىسىندا Nur Otan-نان وزگە بىردە-ءبىر پارتيا 7%-عا جەتە الماعان.

بىرنەشە جىلدان بەرى ەكزيتپول جۇرگىزىپ كەلە جاتقان «ستراتەگيا» الەۋمەتتىك-ساياسي زەرتتەۋ ورتالىعى مەن «ساندج» ورتالىعىن بيىل تىزىمگە ەنگىزبەي قويعان. بۇل  ۇيىمداردىڭ جەتەكشىلەرى مەن تاۋەلسىز ساراپشىلارى ەكزيتپولعا رۇقسات بەرىلگەن  ۇيىمداردىڭ بيلىك قولايىنا «جاعاتىن» قورىتىندى شىعارارىن، زەرتتەۋدىڭ وبەكتيۆتىلىگى كۇمان تۋدىراتىنىن ايتادى.

“The Qazaq Times”