شەنەۋنىكتەردىڭ «تىنىسى تارىلا» تۇسپەك – تۋىسىن تارتا المايدى، سىيلىق المايدى

جەمقورلىق جايلاعان قازاقستانداعى شەنەۋنىكتەرگە زاڭ بويىنشا قىزمەتىنە قاتىستى سىي-سىياپات الۋعا، تۋىستارىن جۇمىسقا ورنالاستىرۋعا، ءوز كىلەتتىلىگىن اسىرا پايدالانۋعا شەكتەۋ قويىلدى. سىبايلاس جەمقورلىققا قارسى قىزمەت وكىلدەرىنە ارانداتۋ ارقىلى قولدان قىلمىسكەر جاساۋعا اپاراتىن جولدى كەسۋ ماقساتىندا بىرقاتار قۇقىقتىق تەتىكتەر ەنگىزىلدى. پرەزيدەنت توقاەۆ «قر كەيبىر زاڭنامالىق اكتىلەرىنە سىبايلاس جەمقورلىققا قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ» تۋرالى زاڭعا قول قويدى.

پرەزيدەنت ءباسپاسوز قىزمەتىنىڭ حابارلاۋىنشا، سىبايلاس جەمقورلىققا قارسى زاڭناما ەداۋىر جەتىلدىرىلدى. ونىڭ كورىنىسى رەتىندە سوتقا دەيىنگى تەرگەۋ جانە  جەدەل-ىزدەستىرۋ قىزمەتىندە جۇمىس ىستەيتىن مەملەكەتتىك قىزمەتكەرلەر بۇدان بىلاي ارانداتۋ ارەكەتىنە بارىپ، قىلمىس ۇستىندە ۇستاۋ ماقساتىندا كۇدىكتىگە پارا بەرمەۋى ءتيىس.

سونداي-اق، مەملەكەتتىك قىزمەتكەر مەن ونىڭ وتباسى مۇشەلەرىنە قاندايدا ءبىر سىيلىق نەمەسە تەگىن قىزمەت الۋعا تىيىم سالىنادى. بۇل مەملەكەت بيۋدجەتىنەن قارجىلاندىرىلاتىن جوبالارعا جاۋاپتى ءارى ساتىپ الۋ وپەراتسيالارىن جۇزەگە اسىراتىن ۇلتتىق كومپانيالار مەن مەمحولدينگتەردىڭ قىزمەتكەرلەرىنە دە قاتىستى.

سىبايلاس جەمقورلىققا قارسى جاڭا زاڭدا شەنەۋنىكتەر ەندى جاقىن تۋىستارىن ء(وزىنىڭ جانە جۇبايىنىڭ/زايىبىنىڭ) قاراماعىنا جۇمىسقا ورنالاستىرۋعا تۇپكىلىكتى تۇردە شەكتەۋ قويىلادى.

قازاقستاندا اشىق ۇكىمەت پورتالى مەن مەملەكەتتىك ساتىپ الۋ (تەندەر) پروتسەستەرى تۋرالى دەرەكتەر قولجەتىمدى بولعانىمەن، ءالى كۇنگە دەيىن جەمقورلىق مەملەكەتتىك باسقارۋ جۇيەسى مەن بيلىكتىڭ، ەل ءومىرىنىڭ بارلىق سالاسىندا كەڭىنەن تارالعانى جونىندە ءجيى ايتىلادى. مۇنى ەكس جانە بۇگىنگى پرەزيدەنتتەر، ۆەدومستۆولار (قارجى مينيسترلىگى، انتيكوررۋپتسيا ت.ب.) اشىق مويىندايدى. حالىقتىڭ باسىم بولىگى ومىرىندە كەمى ءبىر رەت بولسىن جەمقورلىق جاعدايىنا ۇشىرايتىنىن ايتادى. Transparency International (TI) حالىقارالىق ۇيىمىنىڭ 2019 جىلعا ارنالعان ەسەبىندە جەمقورلىق بويىنشا قازاقستان 180 ەلدىڭ ىشىندە 113-ورىنعا تۇراقتاعان.

"The Qazaq Times"