«ەستيتىن مەملەكەتتىڭ» اكىمدەرى: كولگىنوۆ تە، ساعىنتاەۆ تا الدىنا بارعان انالارمەن كەزدەسپەدى

تابيعات كوكتەپ جاتسا دا، انالاردىڭ كوڭىلىندە اقتۇتەك بوران. بالاسىنىڭ بولاشاعىنا الاڭداتقان ۋايىم ۇيىتقىسى. 5 ناۋرىز كۇنى تۇسكە قاراي الماتىدا كوپ بالالى جانە مۇگەدەك بالا تاربيەلەپ وتىرعان ايەلدەردىڭ ءبىر توبى اكىمدىككە بارىپ، باسپانا ماسەلەسىن شەشۋدى تالاپ ەتتى. جينالعاندار ۇزاق ۋاقىت بويى «جىلجىپ بولمايتىن ءۇي كەزەگىندە تۇرىپ كەلەدى»، بىراق ناتيجە جوق. ەل اۋزىنداعى «اكىم بول، حالقىڭا جاقىن بول» دەگەن ءۋالى ءسوزدىڭ شيپاسى بىتكەندەي.

«2018 جىلدان بەرى اكىمدىك تابالدىرىعىن توزدىرىپ كەلەمىز. بىراق كەزەگىمىز دە جىلجىعان جوق، ماسەلەمىز دە شەشىلگەن جوق. ساعىنتاەۆتىڭ وزىنە دە حات جىبەردىك. اكىم حاتتاعى تالاپتى ورىنداماق تۇگىلى جاۋاپ تا جازعان جوق»، – دەيدى كوپ بالالى انانىڭ ءبىرى بالجان جۇماعۇلوۆا ازاتتىق تىلشىسىنە بەرگەن پىكىرىندە.

الەۋمەتتىك ساياساتقا كوڭىلى تولماعان نارازىلار قالا اكىمى باقىتجان ساعىنتاەۆتىڭ شىعۋىن تالاپ ەتىپ، «ساعىنتاەۆ، شىق!» دەپ ايقايلادى. دەگەنمەن ساعىنتاەۆ ەل الدىنا شىعۋدان ءمان تاپپاعان ءتارىزدى، ادەتتەگىدەي نارازىلار الدىنا كەلمەدى. پاتەر اۋىستىرۋدان ابدەن قاجىعان انالار مۇگەدەك بالاسى بار جانە كوپ بالالى وتباسىلاردى باسپانا كەزەگىنە ەكى بولەك قويۋدى سۇرادى.

جينالعاندار تاعى ءبىر شەتىن ماسەلە – مۇگەدەكتىكتى رەسمي تۇردە راستاۋدىڭ الەگى، بۇرقىراعان بيۋروكاراتيانى سىنادى. ەرەكشە كۇتىمگە مۇقتاج بالالارعا مەملەكەتتىك قولداۋدىڭ جەتىسپەۋشىلىگى، مۇگەدەك ەكەنى جايلى مارتەبەگە قول جەتكىزۋدىڭ قيىندىعى جۇرتتىڭ تابانىن توزدىرعان.

وقيعا ورنىندا تاراپتاردى تىڭداعان ازاتتىق ءتىلشىسىنىڭ حابارلاۋىنشا، اكىمدىكتەن نارازىلار الدىنا الەۋمەتتىك ءال-اۋقات باسقارماسىنىڭ باسشىسى ءنازيرا توعىزباەۆا جانە تۇرعىن ءۇي ساياساتى باسقارماسى باسشىسىنىڭ ورىنباسارى ەرمەك ءامىروۆ شىعىپ، سۇراقتارعا جاۋاپ بەردى. شەنەۋنىكتەردىڭ تاپسىرىنە سەنسەك، ەكى ساناتتاعى توپتارعا ارنالعان تۇرعىن ءۇي كەزەگىن جەكە ءتىزىم تۇرىندە جۇرگىزۋ زاڭداستىرىلماعان. ولار «الەۋمەتتىك تۇرعىدا از قامتىلعان توپ وكىلدەرىنە ارنالعان جەكە باعدارلامالار بارىن» العا تارتادى.

«مىسالى، «شاڭىراق» باعدارلاماسى بىلتىردان بەرى جۇمىس ىستەپ تۇر. ول بويىنشا كەزەكتە تۇرعان مىڭ شاقتى ادامعا ءۇي بەردىك»، – دەگەن ەرمەك ءامىروۆ.

ءدال وسىنداي تالاپتارمەن استانالىق انالار ەكى اپتادان بەرى اكىمدىكتە تۇنەپ ءجۇر. اقپاننىڭ اقىرعى اپتاسىندا باستالعان انالاردىڭ نارازىلىعى كوكتەمگە جالعاستى. ساعىنتاەۆ سياقتى ەلوردا اكىمى كولگىنوۆ تە ون ەكى كۇن تابالدىرعىندا جۇرگەن نارازىلاردى كورگىسى، كورسە دە سويلەسىپ-ماسەلەنى تىڭداعىسى جوق. استانا انالارى دا مەملەكەتتىك جاردەماقىنى كۇنكورىس دەڭگەيىنە جەتكىزۋدى، باسپانا قولجەتىمدىلىگىن تالاپ ەتىپ كەلەدى. كولگىنوۆتىڭ كومانداسى ماسەلەنى شەشۋگە باعىتتالعان بايسالدى ديالوگ جۇرگىزۋدىڭ ورنىنا رەسمي سايتتا نارازى انالاردى جەكە باسىن كۇيتتەدى دەگەن ايىپتاۋ مانىندە اقپارات تاراتىپ وتىر. ايەلدەر مۇنى «قارالاۋ»، «ارانداتۋ»، «انالاردى قوعامعا جاماناتتى قىلۋ» ارەكەتى دەپ سانايدى.

"The Qazaq Times"