بيۋدجەتى 7,6 ترلن تەڭگە بولاتىن «قۋاتتى وڭىرلەر – ەل دامۋىنىڭ درايۆەرى» ۇلتتىق جوباسى اياسىندا 2025 جىلعا دەيىن جۇمىس ىستەيتىن جاستار ءۇشىن 15 مىڭ باسپانا جالعا بەرىلەدى. الەۋمەتتىك وسال توپقا، تۇرمىسى ناشار، تابىسى جەتكىلىكسىز ازاماتتارعا ارنالعان جاڭا باعدارلاما ىسكە قوسىلادى.
جۇما كۇنى ورتكوم الاڭىندا وتكەن بريفينگتە QT ءتىلشىسى ۇلتتىق جوبانى تۇزۋگە جانە جۇزەگە اسىرۋعا جاۋاپتى ۆەدومستۆو وكىلدەرىنەن جالعىزباستى اكەلەر يا انالاردىڭ، ءتۇرلى الەۋمەتتىك توپتاردىڭ ءتورت جىلعى جوسپارداعى ورنى تۋرالى سۇرادى.
ءۇش مەگاپوليستەگى جۇمىسشى جاستارعا 2019 جىل 3 مىڭ، 2020 جىل 1 مىڭ باسپانا جالعا بەرىلدى، بيىل تاعى 3 مىڭ پاتەر بەرۋ جوسپارلانعان. مينيسترلىكتىڭ مالىمەتىنشە، جوبا جاستارعا باسپانالى بولۋ ءۇشىن باستاپقى جارناسىن جيناۋعا جاعداي جاساپ قانا قويماي، نارىقتا سۇرانىسقا يە كاسىپتى مەڭگەرگەن مامانداردى ىنتالاندىرۋدى ماقسات تۇتادى.
«وسى ايدا جاڭا زاڭ كۇشىنە ەنەدى. ادامداردى ۇيمەن قامتۋ يدەولوگياسى مۇلدە وزگەرىپ جاتىر. جالعىزباستى اكە يا انانىڭ جاعدايى مەن مۇمكىندىگىنە قاراپ، ءۇيىن ءوزى تاڭداۋىنا مۇمكىندىك بەرمەكپىز. جاعدايى جوق ازاماتتارعا جالعا بەرىلەتىن پاتەر مەملەكەت تاراپىنان سۋبسيديالانادى. سۋبسيديا ءار ءوڭىردىڭ ەرەكشەلىگىنە قاراي بەكىتىلەدى. بۇدان وزگە تابىسىنا قاراي 2-5% مولشەرىندە نەسيەگە تۇرعىن ءۇي بەرىلەدى. وسىلايشا، 2025 جىلعا دەيىن كەزەكتە تۇرعانداردى قىسقارتۋعا تىرىسامىز»، – دەدى يندۋستريا جانە ينفراقۇرىلىمدىق دامۋ ۆيتسە-ءمينيسترى قايىربەك وسكەنباەۆ.
ۇكىمەت «جايلى تۇرعىن ءۇي» جوباسى شەڭبەرىندە تۇرعىن ءۇي قۇرىلىسىنا 13,5 ترلن تەڭگە ينۆەستيتسيا تارتىلادى دەيدى. بۇل قاراجاتقا 185,1 مىڭ ادام ءۇشىن جەكە تۇرعىن ءۇي قورىنان تۇرعىن ءۇيدى جالعا الۋ، 102,3 مىڭ بىرلىك الەۋمەتتىك جالعا بەرۋ قۇرىلىسىن سالۋ شىعىستارىن سۋبسيديالاۋ، اۋىلدا جالعا بەرىلەتىن 2,9 مىڭ ءۇي سالۋ كوزدەلگەن. ءوزىن «حالىق ۇنىنە قۇلاق اساتىن ۇكىمەت» دەپ سانايتىن ءماميننىڭ مينكابينەتى ءتورت جىلدا اۋدانى 103 ملن شارشى مەتر تۇرعىن ءۇي سالۋعا ۋادە بەردى.
«وتباسى مۇشەلەرىنە شاققاندا ەڭ تومەنگى كۇنكورىس مولشەرىنەن (34 مىڭ تەڭگە – QT) تومەن تابىسى بار كەزەكتە تۇرعاندار جاڭادان ەنگىزىلەتىن تۇرعىن ءۇيدى سۋبسيديالاۋ تەتىگى ارقىلى جالدامادى باسپانامەن قامتاماسىز ەتىلەدى. ولارعا نەگىزىنەن كوپ بالالى وتباسىلار، جەتىم بالالار، مۇگەدەك بالالارى بار وتباسىلار جانە حالىقتىڭ باسقا دا الەۋمەتتىك وسال توپتارى جاتادى.
تابىسى ەڭ تومەنگى كۇنكورىس مولشەرىنەن جوعارى (ار ادامعا 34 مىڭ تەڭگەدەن جوعارى – QT) كەزەكتە تۇرعاندار جاڭا تۇرعىن ۇيگە وتباسى بانكى ارقىلى جەڭىلدەتىلگەن نەسيە الۋ ارقىلى قول جەتكىزە الاتىن بولادى. بۇل ساناتقا كوبىنە مەملەكەتتىك قىزمەتكەرلەر، بيۋدجەت قىزمەتكەرلەرى،سونداي-اق تولىق ەمەس وتباسىلار جانە باسقا كەزەكتە تۇرعان ازاماتتار كىرەدى»، – دەپ ءتۇسىندىردى مينيسترلىكتىڭ ءباسپاسوز قىزمەتى ۇسىنعان جاۋاپتا.
قازىر قازاقستاندا 577 مىڭنان اسا ادام تۇرعىن ءۇي كەزەگىندە تۇر. كەيىنگى جىلدارى، اسىرەسە، پاندەميا تۇسىندا ۇكىمەت حالىقتىڭ الەۋمەتتىك جاعدايىن جاساي الماي، ەلدىڭ تۇرمىسى ناشارلاعان. قىمباتشىلىق قىسقانىن ايتقان جۇرت كۇنكورىستىڭ قيىنداعانىنا نارازى. رەسمي ستاتيستيكادا جۇمىسسىزدار مەن نارىقتاعى باعا ادەتتەگىدەي تۇراقتى دەپ كورسەتىلەدى.
قاراعايعا قارسى بۇتاق. دۋماننىڭ سوت تەرگەۋى اياقتالدى. 29 شىلدە ءجارىسسوز.
ابزال ايدارحان: جوعارعى سوت قالاس نۇرپەيىسوۆتىڭ ىسىندەگى نەگىزگى قاتەلىكتەردى قارامادى
اينارا ايدارحان: جوعارعى سوت ايگەرىم تىلەۋجاننىڭ ءىسىن قارماي تاستادى
شىنقۋات بايجانوۆ: اۋەجاي ءىسىن كاساتسيالىق سوت قاراماي تاستادى. ءبىز اياعىنا دەيىن كۇرەسەمىز
رىسبەك سارسەنبايۇلى: ء"بىز جىندىلار ەلىندە تۇرامىز. بيلىك ءوز قىلمىسىن جاسىرۋ ءۇشىن قاراپايىم ازاماتتاردى سوتتادى"
"قىزىقتىڭ كوكەسى ەندى باستالدى. پروكۋرور دۋماننىڭ سوتىن جابىق وتكىزۋ ءۇشىن سوتتى دا شاتاستىرعان"