جاپاروۆ استاناعا كەلدى. فوتو: قىرعىزستان پا بق.

قىرعىزستان پرەزيدەنتى سادىر جاپاروۆ بۇگىن قازاق ەلىندەگى رەسمي ساپارىن باستادى. قىرعىز پرەزيدەنتىن كۇتىپ الۋعا قر ءسىم باسشىسى مەن ەنەرگەتيكا ءمينيسترى جانە ەل وردا اكىمى التاي كولگىنوۆ شىققان.

جاپاروۆتىڭ ساپارىنان بۇرىن ونىڭ ءباسپاسوز قىزمەتى قازاقستانداعى مەملەكەتتىك ساپارى كەزىندە قر پرەزيدەنتى قاسىم-جومارت توقاەۆ پەن ەكس-پرەزيدەنت نۇرسۇلتان نازارباەۆ، ءماجىلىس توراعاسى ن.نىعىماتۋلين، ۇكىمەت باسشىسى ا.مامينمەن كەزدەسەتىنىن ايتقان.

جاپاروۆ پرەزيدەنت قىزمەتىنە كىرىسكەننەن بەرى ەكىنشى رەت شەتەلگە ساپارلاي شىقتى. رەسەيگە ءپۋتيننىڭ شاقىرۋىمەن بارىپ قايتقاننان كەيىن العاشقى رەسمي مەملەكەتتىك ساپارىن قازاقستاننان باستاپ وتىر. جاپاروۆ قازاقستانداعى رەسمي ساپارىنىڭ الدىندا ەكى ەلدىڭ قارىم-قاتىناسى تۋرالى پىكىرلەرىمەن ءبولىسىپ «قازينفورم»-عا كولەمدى سۇحبات بەرگەنى بار. وندا ولا ەكى ەل اراسىندا شەشىلمەگەن تۇيتكىلدى تۇيىندەردىڭ جوق ەكەنىن، تەك ۇساق-تۇيەك ماسەلەلەر عانا ەكەنىن، ونىڭ ءبارىن ديالوگ ارقىلى شەشىپ كەلە جاتقانىن ايتىپ وتكەن.

جاپاروۆ بۇگىن پرەزيدەنت توقاەۆپەن كەزدەسەدى. كەزدەسۋدە تاراپتار قازاق-قىرعىز اراسىنداعى مامىلەنى دامىتا ءتۇسۋ باعىتىندا سويلەسەتىنىن جاپاروۆتىڭ ءباسپاسوز قىزمەتى مالىمدەگەن.

“The Qazaq Times”