دەنمين جارتى جىلدان بەرى كوروناۆيرۋس ستاتيستيكاسىن قاتە بەرىپ كەلگەن

قازاقستاننىڭ دەنساۋلىق ساقتاۋ مينيسترلىگى QT رەداكتسياسىنىڭ سۇراۋىنان كەيىن كوروناۆيرۋس ستاتيستيكاسىنا قاتىستى تاعى ءبىر كەمشىلىگىن تۇزەتتى. مينيسترلىك دەرەگىنە قاراعاندا، وسى ۋاقىتقا دەيىن كوروناۆيرۋستىڭ راستالعان تۇرىنەن «وتكەن كۇنى» قايتىس بولدى دەلىنگەن اقپارات قاتە بەرىلگەن. دۇرىسى – «الدىڭعى تاۋلىكتە» دەپ كورسەتىلۋى كەرەك.

رەسمي مالىمەتكە سۇيەنسەك، قازاقستان ۇكىمەتى تەك پتر ارقىلى راستالعان دەرەكتەردى ۋاقىتىلى جاريالايدى، ال قالعان نەگىزگى كورسەتكىشتەر (ياعني، پنەۆمونياعا شالدىققاندار، كوروناۆيرۋس پەن پنەۆمونيادان قايتىس بولعان ادامدار سانى – QT) بىر تاۋلىككە كەشىگىپ بەرىلەدى. بۇعان دەنساۋلىق ساقتاۋ سالاسىنداعى اقپاراتتىق جۇيەنىڭ جەتىلمەۋى سەبەپ.

وسى ۋاقىتقا دەيىن كۆي+ دياگنوزى بويىنشا جاڭا انىقتالعان ناۋقاستار ايماقتارداعى كورسەتكىشى كۇندەلىكتى، ال كۆي- دەرەگى تەك جيىنتىق ماندە بەرىلىپ كەلگەن.

مينيسترلىك رەداكتسيا تالابىنان كەيىن ستاتيستيكاداعى كەمشىلىكتى مويىنداپ، 26 جەلتوقساننان بەرى رەسمي حابارلامادا پنەۆمونيانىڭ ءبىر تاۋلىككە كەشىگىپ جاريالاناتىنىن راستاپ مەرزىمىن كورسەتەتىن بولدى. 2 اقپاننان كوروناۆيرۋس پنەۆمونياسى انىقتالعان ناۋقاستاردىڭ ايماقتارداعى كورسەتكىشى قوسا كۇندەلىكتى بەرىلە باستادى. ال اقپاننىڭ 18-ءى كوروناۆيرۋس پەن ونىڭ پنەۆمونياسىنان قايتىس بولعانداردىڭ ەسەبىن كۇن سايىن جاريالاۋعا كوشتى. بىراق سوڭعى ستاتيستيكادا مەرزىم جاعىنان قايشىلىق بايقالدى. رەداكتسيا مۇنى دا مينيسترلىككە بىرنەشە مارتە ەسكەرتۋگە ءماجبۇر بولدى. وسىلايشا كۆي+ پەن كۆي- ديگنوزىنان كوز جۇمعانداردىڭ تىركەلگەن كۇنى ەرتەڭىنە ەمەس، ءبىر كۇننەن كەيىن جاريالانىپ كەلگەنى بەلگىلى بولدى. قاتە دەگەنىمىز – اقپارات قۇرالدارى كۇندەلىكتى ستاتيستيكانىڭ ناقتى بولماۋىنان كوروناۆيرۋستان قايتقانداردى وتكەن كۇنگە تەلىپ حابارلاۋعا ءماجبۇر بولعان.

QT ەسكەرتۋ-تالابىنان كەيىن مينيسترلىكتىڭ رەسمي حابارلاماسىنا كۆي- جانە كۆي+ دياگنوزدارى تۇسىنا "*" بەلگىسى ارقىلى مەرزىمى ناقتىلاندى. ينفو-فوتو: قر دسم

پاندەميا كۇندەرەگى

25 اقپان كوروناۆيرۋس جۇققان 855 ادام، ال 24 اقپان كوروناۆيرۋس پنەۆمونياسىنا شالدىققان 51 ادام تىركەلدى. قازىر ەلدە 20 مىڭنان اسا ادام (U07.1 نەمەسە كۆي+ بويىنشا 13 358, U07.2 نەمەسە كۆي- بويىنشا 6919) اۋىرىپ جاتىر.

#U07.1 كوروناۆيرۋس پتر تەستى ارقىلى تابىلعان جاڭا كەيستەردىڭ ەڭ كوبى – استانا (135), الماتى قالاسى (110), پاۆلودار (78), بقو (75), اقمولا (74), الماتى (72) وڭىرلەرىندە. وتكەن تاۋلىكتە اۋرۋدان ايىققان 746 ادام ۇيىنە جىبەرىلگەن. سونداي-اق سارسەنبىدە جيىنى 12 ادام: استانا (4), بقو (2), اقتوبە، الماتى، اتىراۋ، شقو، قىزىلوردا وبلىستارى مەن الماتى قالاسىندا ءبىر-بىردەن قايتىس بولعان.

كەيىنگى جارتى ايدا الماتى ۆيرۋس جۇققاندار سانى جاعىنان وڭىرلەر اراسىندا العاشقى قاتارلاردان كورىندى. دەگەنمەن قالاداعى ەپيدجاعداي «جاسىل دەڭگەيدە» دەپ سانايتىن باس سانيتار دارىگەرى جانداربەك بەكشين 13 اقپان كارانتين شاراسىن جەڭىلدەدەتىن جاڭا قاۋلى شىعاردى. قۇجاتقا سايكەس، قوعامدىق تاماقتانۋ ورىندارى ءتۇن جارىمعا دەيىن، بازار-ساۋدا ورىندارى اپتا بويى، ساۋنا-باسسەين جانە ساناتوريلەرگە، بيليارد، بوۋلينگ، ويىنحانالارعا، ايماقتار اراسىندا قاتىنايتىن اۆتوبۋستارعا جۇمىس ىستەۋگە رۇقسات ەتىلدى.

#U07.2  سارسەنبى كۇنى، ياعني اقپاننىڭ 24-ءى كوروناۆيرۋس پنەۆمونياسىنا جاتاتىن 51 ناۋقاس جانە ءبىر ءولىم جاعدايى تىركەلگەن. پنەۆمونيا انىقتالعان ناۋقستاردىڭ ەڭ كوبى – ادەتتەگىدەي جامبىل (19), اقتوبە (6), شقو مەن قاراعاندى (ارقايسى 5-تەن), اقمولا (3) وبلىستارىنا تيەسىلى. سونىمەن قوسا، پاۆلودار وبلىسىندا ءبىر ادام كوز جۇمعان.

#جالپى  ەكىنشى تولقىنداعى كۇندەلىكتى كورسەتكىش قۇبىلمالى. قاڭتار ايىنىڭ ەكىنشى جانە اقپان ايىنىڭ العاشقى جارتىسىندا تاۋلىگىنە ۇدايى مىڭ شاقتى جاعداي انىقتالسا، كەيىنگى كەزدە قايتا ءبىرشاما ازايىپ، ەندى قايتا ەكپىن الا باستادى. ماسەلەن، كوروناۆيرۋس پەن وسىعان ۇقساس پنەۆمونيانى قوسا ەسەپتەگەندە دۇيسەنبى 748, سەيسەنبى 827, سارسەنبى 846 ناۋقاس انىقتالعان.

دەنمين-ءنىڭ رەسمي مالىمەتىنشە, ەمدەلىپ جاتقان 20 277 ناۋقاستىڭ 4452-ءى اۋرۋحانادا، 15 825-ءى امبۋلاتورلىق باقىلاۋدا. احۋالى ناشار 254 ناۋقاستىڭ جاعدايى قيىن، ونداعى 53 ادامنىڭ ءحالى وتە اۋىر. بۇدان وزگە 41 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

بىلتىر جەلتوقسان ايىنىڭ العاشقى جارتىسىندا 13 254, بيىلعى قاڭتار ايىنىڭ ءبىرىنشى جارتىسىندا 12 537, قالعان جارتىسىندا 21 919 ادام  جانە اقپان ايىنىڭ ءدال وسى ۋاقىتىندا 16 091 ناۋقاس تىركەلگەن. جالپى 2021 جىل باستالعالى قازاقستاندا 59 مىڭ ادامنان اۋرۋ انىقتالعان. جىل باسىنان بەرى پاۆلودار (8,3 مىڭ), اقمولا (6,4 مىڭ) وبلىستارى، الماتى قالاسى (6,6 مىڭ)  جانە استانادا (6,4 مىڭ) جاعداي ۋشىققان. ال قىزىلوردا (442), ماڭعىستاۋ (554), تۇركىستان (625), اقتوبە (635) وڭىرلەرى مەن شىمكەنت (742) قالاسىندا احۋال تۇراقتى.

ازىرگە ۆيرۋس تارالۋ قاتەرى جاعىنان بقو، اقمولا، پالودار، قوستاناي وبلىستارى مەن استانا – سارى ايماقتا تۇر.

وسىعان دەيىن اقپارات مينيسترلىگىنىڭ coronavirus2020.kz سايتى مەن دەنساۋلىق ساقتاۋ مينيسترلىگىنىڭ مەديا رەسۋرستارىندا جاريالانعان دەرەكتەر بىرنەشە ايدان بەرى قاتە بەرىلىپ كەلگەنى جايلى ماتەريالدار جاريالاپ، اقپارات قۇرالدارىنا ەسكەرتكەنبىز.

(!) پاندەميا مودەراتورى – مينيسترلىك تەك سەنبى-جەكسەنبىدە عانا ەمەس، مەرەكە كۇندەرى دە ستاتيستيكانى تولىقتاي جۇرگىزۋگە قاۋقارسىز. ماسەلەن، جەلتوقسان ايىنىڭ 1, 16, 17, 18-ءى جانە 19-ىنا، 1-4, 7 قاڭتارعا تيەسىلى دەرەكتەر ەسەلەپ كەمىگەن. كۇزدىڭ ورتاسىندا سول كەزدەگى دەنمين-ءنىڭ رەسمي-ەرىكتى وكىلى باعدات قوجاحمەتوۆ ەكىنشى تولقىندا دەمالىس كۇنىنە قاراماستان ستاتيستيكانى تولىق كولەمدە جۇرگىزۋگە ۋادە بەرگەن ەدى. بىراق ءىس جۇزىندە ولاي بولماي شىقتى. 

The Qazaq Times رەداكتسياسى تومەندەگى كەستەنى رەسمي مالىمەتتىڭ رەتتەلگەن نۇسقاسى دەپ سانايدى.

وسى قىستىڭ باسىندا باس مەملەكەتتىك سانيتار-دارىگەر ەرلان قياسوۆ قازاقستاندا كەزەكتى تولقىنىنىڭ شارىقتاۋ كەزەڭى قاڭتار-اقپان ايلارىنا، ال مينيستر الەكسەي تسوي ناۋرىز ايىنىڭ سوڭىنا قاراي تۇسپا-تۇس كەلەتىنىن مالىمدەگەن.

13 ناۋرىزدان بەرى COVID-19 ينفەكتسياسىن جۇقتىرعاندار قاتارى 211 مىڭنان، 1 تامىزدان بەرگى كوروناۆيرۋس پنەۆمونياسى 49 مىڭنان اسقان. ددسۇ مالىمەتىنشە، قازاقستاندا اۋىرعانداردىڭ سانى 259 مىڭعا، ال ۇلتتىق ستاتيستيكادا 260 مىڭعا جەتكەن. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى ۆيرۋس جۇققانداردىڭ 4414-ءى (كۆي+ / U07.1 – 2733, كۆي- / U07.2 – 620, ىلەسپە اۋرۋلاردان – 1061) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 1061 ادامدى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

قازاقستان ۆيرۋس تارالۋى بويىنشا الەمدە Worldometers دەرەكقورى، دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 50-ورىندا تۇر.

"The Qazaq Times"