فوتو: ار

گەرمانيانىڭ ميۋنحەن قالاسىندا جىل سايىنعى قاۋىپسىزدىك جونىندەگى 57-ءشى حالىقارالىق كونفەرەنتسيا ءوتتى. پاندەمياعا بايلانىستى ونلاين فورماتتا ۇيىمداستىرىلعان جيىندا قىتاي، رەسەي جانە تاياۋ شىعىس وكىلدەرى بوي كورسەتپەدى.

قاۋىپسىزدىك جونىندەگى ميۋنحەن حالىقارالىق كونفەرەنتسياسى العاش رەت 1963 جىلى وتكەن بولاتىن. بۇل جولى باسقوسۋعا تەك اقش، گەرمانيا، فرانتسيا باشىلارى مەن ەۋرووداق جانە ناتو وكىلدەرى قاتىستى.

كەزدەسۋدە كوروناۆيرۋس ىندەتى، كليماتتىڭ وزگەرۋى، لاڭكەستىك سىندى عالامدىق ماسەلەلەر تالقىلاندى. سونىمەن قاتار، جيىندا ەۋروكوميسسيا باسشىسى ۋرسۋلا فون دەر ليايەن كليماتتىڭ وزگەرۋىمەن كۇرەستە ەۋروپا مەن اقش-تى كۇش بىرىكتىرۋگە شاقىردى.

ۋرسۋلا فون دەر ليايەن مالىمدەمەسىندە: «ءبىز تسيفرلىق ەكونوميكا ءۇشىن ورتاق ەرەجەلەر دايىنداپ شىعارۋمىز كەرەك. ول ادام قۇقىعى مەن اشىقتىققا نەگىزدەلۋى ءتيىس. سەبەبى الپاۋىت كومپانيالاردىڭ دەموكراتيامىزعا اسەر ەتەتىن ارەكەتتەرىن باقىلاۋسىز قالدىرۋعا بولمايدى. فەيسبۋكتىڭ اۆسترالياعا قاتىستى شەشىمى وسىنىڭ ءبىر دالەلى»، – دەپ اتاپ ءوتتى.

ەۋروكوميسسيا باسشىسىنىڭ ايتۋىنشا، تسيفرلىق نارىقتى دامىتۋ سالاسىندا جاڭا ءىس-ارەكەتتەردى قولعا الۋ قاجەت. بۇل ءىرى تەحنولوگيالىق كومپانيالاردىڭ ىقپالىن باقىلاۋعا كومەكتەسەدى.

"The Qazaq Times"