قاسىم-جومات توقاەۆ پەن ۆلاديمير پۋتين تەلەفون ارقىلى سويلەستى. بۇل جولى تاراپتار ءوز ۇكىمەتتەرىنىڭ پاندەمياعا قارسى كۇرەسىنە وڭ باعا بەرىپ، رەسەيلىك ۆاكتسينانى قازاقستانعا جەتكىزۋ تۋرالى كەلىسىمگە كەلگەن. ءوز ۇندەۋىندە «قازاقستان مەديتسيناسى پاندەمياعا دايىن بولماعانىن» اشىق مويىنداعان ەكىنشى پرەزيدەنتتىڭ پۋتينمەن اڭگىمەسىندە ۇكىمەت جۇمىسىن جوعارى باعاعا لايىق دەپ تانۋى ساياساتتاعى پارادوكستاردىڭ ءبىر پاراسى سىندى.
اقوردانىڭ حابارلاۋىنشا، پۋتين توقاەۆتىڭ ەۋرازيالىق ينتەگراتسيانى نىعايتۋ بويىنشا جوسپارلارىنا قولداۋ بىلدىرگەن. سونىمەن قاتار، تاراپتار ەكىجاقتى ىنتىماقتاستىق ماسەلەلەرىن تالقىلاعان.
ءبىر قىزىعى، قوس پرەزيدەنت تە رەسمي سويلەسۋ كەزىندە رەسەي مەن قازاقستاننىڭ كوروناۆيرۋسقا قارسى كۇرەس شارالارىنا ريزالىعىن بىلدىرگەن. الايدا، «وتشاشۋ داۋىنان» كەيىن 8 شىلدەدە توقاەۆ ەل مەديتسيناسىنىڭ پاندەمياعا دايىن بولماعانىن مويىنداعان بولاتىن. سول كۇنى ەكىنشى پرەزيدەنت قازاقستانداعى احۋالدىڭ كۇرت ناشارلاۋىنا «ەكس-مينيستر قىزمەتىندەگى قاتەلىكتەر، حالىقتىڭ ساقتىق شارالارىن ساقتاماۋى» سەبەپ بول عانىن ايتىپ، 13 شىلدەنى ۇلتتىق ازا كۇنى دەپ جاريالاعان.
پاندەميا باستالعاندا قازاقستانداعى احۋال ناشارلادى. دەنساۋلىق ساقتاۋ مينيسترلىگى پنەۆمونيا دياگنوزى قويىلعان ناۋقاستاردىڭ ءبىرازىنان كوروناۆيرۋس دەرەگى انىقتالعان جوق دەسە دە، ولاردى دا COVID-19 حاتتاماسىمەن ەمدەدى. ال اۋرۋحانالاردا ناۋقاستارعا ورىن، ءدارىحانالاردا قاجەتتى پرەپاراتتار تاپشىلىعى جاعدايدىڭ ۋشىعۋىنا اكەپ سوققان.
11 تامىزدا ۆلاديمير پۋتين رەسەيدىڭ الەمدە ءبىرىنشى بولىپ كوروناۆيرۋس ينفەكتسياسىنا قارسى ۆاكتسينانى تىركەگەنىن حابارلاعان ەدى. پۋتين سوزىندە ەكپەنىڭ وتە ءتيىمدى جۇمىس ىستەيتىنىن، تۇراقتى يممۋندىق جۇيەنى قالىپتاستىراتىنىن جانە بارلىق قاجەتتى تەكسەرۋلەردەن وتكەنىن اتاپ ءوتتى. بىراق كەيبىر باتىس ساراپشىلارى مەن جەرگىلىكتى ماماندار سىناقتان تولىق وتپەگەن ۆاكتسينانىڭ قاۋىپسىزدىگىنە كۇمان كەلتىرگەن بولاتىن. سونىمەن قاتار Reuters اگەنتتىگى پرەپارات ۆيرۋستىڭ مۋتاتسيالانۋىنا جول اشۋى مۇمكىن دەگەن. بىراق رەسەي تاراپى بۇل دابىلدى جوققا شىعاردى.
ءپۋتيننىڭ بۇل جاڭالىعىنان كەيىن قازاقستان پرەزيدەنتى توقاەۆ قۇتتىقتاۋ جەدەلحاتىن جولداپ، سول ۋاقىتتا سىناقتان ءالى وتپەگەن «كۇماندى» ۆاكتسينانى الۋ تۋرالى كەلىسىمگە كەلگەن.
قازاقستان پرەزيدەنتىنىڭ پاندەميا مەن ۆاكتسينا جونىندە مالىمدەمەلەرى ءبىرىنشى رەت سىنعا ۇشىراپ وتىرعان جوق. بۇعان دەيىن ۇكىمەت وتىرىسىندا توقاەۆ «سىناقتان ءساتتى وتكەن جاعدايدا، وتاندىق ۆاكتسينانى قابىلدايمىن» دەگەن. بىراق دەنمين قازاقستاندا 18 جاسقا تولماعان بالالار مەن 65 جاستان اسقاندارعا «ۆاكتسينانىڭ تيىمدىلىگى مەن قاۋىپسىزدىگى تۋرالى مالىمەت جوق بولعاندىقتان»، ەكپە سالىنبايتىنىن حابارلادى. ياعني 67 جاستاعى ەكىنشى پرەزيدەنتكە ەكپە سالىنبايدى. «قازاقستاندىق ەكپەنى سالدىرامىن» دەپ سەندىرگەن پرەزيدەنتتىڭ بۇل مالىمدەمەسى مەن دەنمين حابارالاماسىنداعى قايشىلىق حالىقتىڭ ۆاكتسيناتسياعا دەگەن كۇدىگىن ودان ارى كۇشەيتكەنى راس.
قازاقستان رەسەيلىك ۆاكتسينانى رەسمي تىركەۋدەن وتكىزبەي تۇرىپ-اق سالا باستادى. جاپپاي ۆاكتسينا ەگۋ 1 اقپاندا باستالىپ كەتتى. ۇكىمەت جىل سوڭىنا دەيىن 6 ميلليون ادامعا ۆاكتسينا سالۋدى جوسپارلاپ وتىر. ال ساۋىردەن باستاپ قازاقستاندىق QazCovid-In ۆاكتسيناسى ەگىلەتىنى، وسى ەكپە 1-2 سىناق كەزەڭىندە 96 پايىز تيىمدىلىك كورسەتكەنى حابارلاندى. قازىر QazCovid-In سىناقتىڭ ءۇشىنشى كەزەڭىنەن ءوتىپ جاتىر.
10 اقپاندا دەنساۋلىق ساقتاۋ ءمينيسترى الەكسەي تسوي قازاقستاندا 13 301 ادامعا رەسەيلىك «سپۋتنيك V» ۆاكتسيناسى سالىنعانىن ايتتى. وسىلايشا، قازاقستان «سپۋتنيك V» ەكپەسىن قولدانۋدى ماقۇلداعان 27-ەل اتاندى. قازىرگە دەيىن بۇل ەكپەنى رەسەيدەن وزگە بەلارۋس، ارگەنتينا، سەربيا، الجير، پاراگۆاي، تۇركىمەنستان، ۆەنگريا، باە، يران سەكىلدى ەلدەر ماقۇلداعان.
الماتى وبل پركۋراتۋراسى. بەلسەندىلەر: «جالعان جالامەن قاماۋداعى ايگەرىم مەن دۋمانعا بوستاندىق!»
جاۋاعاشتى تۇرمەسى ايگەرىمدى تاعايىندالعان ەمگە جىبەرمەي جاتىر
Oyan, Qazaqstan قوزعالىسىنىڭ تاعى ءبىر بەلسەندىسىن پوليتسيا بولىمىنە شاقىردى
ورتالىق ازيا: تاريحي، ساياسي جانە ەكونوميكالىق مۇددەلەر اياسىندا
ازاتتىق راديوسى سىنعا قالعان باپ بويىنشا سوتقا تارتىلىپ جاتى