فرانتسيا سەناتى 18-59 جاس ارالىعىنداعى ازاماتتاردىڭ ۆاكتسينا الۋىن مىندەتتەۋدى ۇسىندى.

پاستەر ينستيتۋتى مەن ۇلتتىق زەرتتەۋلەر ينستيتۋتىنىڭ عالىمدارى دا پاندەميانىڭ الدىن الۋ ءۇشىن تۇرعىندار جاپپاي ەكپە الۋى ءتيىس دەيدى. اتالعان زەرتتەۋ ورتالىقتارىنىڭ بولجامىنا سايكەس، حالىقتىڭ جارتىسىنان كوبى ەكپە سالدىرسا دا، كۇزدە فرانتسيادا ىندەتتىڭ ءتورتىنشى تولقىنى باستالۋى مۇمكىن. ال دەنساۋلىق ساقتاۋ جۇيەسىنە تۇسكەن اۋىرتپاشىلىق بىلتىرعىداي بولماق.

وسى تاقىرىپتا وتكەن جيىندا سەناتور بەرنار جومە: «مەديتسينا قىزمەتكەرلەرىنە ۆاكتسينالاۋدى مىندەتتەۋ ماسەلەسىن تەز ارادا شەشۋ كەرەك. بۇل اسا قيىندىقتى تۋعىزبايدى. وعان قوسا 18 بەن 59 جاس ارالىعىنداعى ازاماتتارىمىزعا دا ەكپە سالۋدى مىندەتتەۋ ماسەلەسىن كوتەرۋ كەرەك. ويتكەنى قولىمىزداعى دەرەكتەر بويىنشا، ۆيرۋستى ەڭ كوپ تاراتاتىن وسى توپ. ال ولاردىڭ اراسىندا ۆاكتسينا العاندار از»، – دەدى.

سەناتورلار ۇكىمەتكە شىلدەنىڭ اياعىنا دەيىن مەديتسينا قىزمەتكەرلەرىن، ال وسىدان كەيىن بۇكىل ەرەسەك ازاماتتارىن ۆاكتسينالاۋعا مىندەتتەۋ ماسەلەسىن شەشۋدى ۇسىندى. وسى باستاماعا فرانتسيانىڭ جوعارى عىلىمي كەڭەسى جاۋاپ بەرۋى ءتيىس. سونداي-اق، جاڭا وقۋ جىلىندا اپتا سايىن وقۋشىلاردى كوروناۆيرۋسقا تەستىلەۋ نۇسقاۋى بەرىلدى. ەلدە ۇجىمدىق يممۋنيتەت قالىپتاستىرۋ ءۇشىن تەز ارادا كەم دەگەندە 10 ملن ادامدى ۆاكتسينالاۋ قاجەت.

"The Qazaq Times"