لۋكاشەنكو قاقتىعىستار كەزىندە «ەلدى قورعاعان» اسكەريلەرگە العىس ءبىلدىردى

الەكساندر لۋكاشەنكو «2020 جىل اسكەريلەر مەن شەكاراشىلار ءۇشىن اۋىر بولعانىن جانە بەلارۋس بيلىگى بۇل سىناقتان ءساتتى وتكەنىن» ايتتى.

لۋكاشەنكونىڭ بەلتا اگەنتتىگىندە جاريالانعان مالىمدەمەسىندە: «وتكەن جىل ءبارىمىز ءۇشىن، اسىرەسە ساربازدار مەن شەكارا كۇزەتكەندەر ءۇشىن سىناق، ءارى تەكسەرىس بولدى. ايتا كەتۋ كەرەك، ءبىز بۇل تەكسەرۋدەن وتتىك: شەكارا اسكەرلەرى وزدەرىنىڭ نەگىزگى باعىتتارى بويىنشا باسقا كۇش قۇرىلىمدارىنا قاراعاندا الدەقايدا جاقسى جۇمىس ىستەدى. باتىستا ءبىز تەك بەلارۋستى عانا ەمەس، وداقتاس مەملەكەتتىڭ شەكاراسىن دا قورعايمىز. سوندىقتان ءبىز مەملەكەتتىك شەكارانى قورعاۋعا ۇلكەن كوڭىل بولەمىز»، – دەلىنگەن.

لۋكاشەنكو مەملەكەتتىك شەكارانى قورعاۋدىڭ تيىمدىلىگىن ارتتىرۋ بويىنشا جۇمىس جالعاساتىنىن ايتتى. وسى ماقساتتا جاڭا شەكارا بەكەتتەرى مەن مانەۆرلىك توپتاردىڭ سانى ارتقان.

مەملەكەت باسشىسى زاڭسىز كوشى-قونعا، ەسىرتكى ترافيگىنە، كونترابانداعا، تەرروريستىك قاتەرلەرگە قارسى كۇرەستەگى وڭ ناتيجەلەردى دە اتاپ ءوتتى.سونىمەن قاتار، «ەۋروپانىڭ سوڭعى ديكتاتورى» اتانعان لۋكشەنكو «مەنىڭ بۇيرىقتارىمدى اسكەريلەر جوعارى دەڭگەيدە ورىندادى» – دەپ بەلارۋس ساربازدارىنا ريزاشىلىعىن ءبىلدىردى.

بەلارۋستەر 9 تامىزداعى داۋلى سايلاۋدان كەيىن جاپپاي نارازىلىق تانىتا باستاعان. بيلىك اياۋسىز باسىپ-جانشىسا دا، ۇكىمەتكە قارسىلىق باسىلماق ەمەس. 66 جاستاعى لۋكاشەنكوعا حالىقارالىق قىسىم دا كۇشەيىپ كەلەدى. باتىس ەلدەرى، ونىڭ ىشىندە اقش، كانادا مەن ەۋروپا وداعى لۋكاشەنكونى بەلارۋستىڭ زاڭدى پرەزيدەنتى دەپ تانۋدان باس تارتىپ، وعان جانە جوعارى شەندى شەنەۋنىكتەرگە سايلاۋدى بۇرمالادى جانە دەمونسترانتتاردى قۋعىنعا ۇشىراتىپ وتىر دەپ سانكتسيا سالعان.

Human Rights Watch ۇيىمىنىڭ 2021 جىلعى ەسەبى بويىنشا، بەلارۋس پوليتسياسى قاراشانىڭ ورتاسىنا دەيىن 25 مىڭنان استام ادامدى ۇستاعان. مۇنىمەن قاتار، بەلارۋس بيلىگى «ساياسي وپپوزيتسيونەرلەرگە، نارازىلىق تانىتۋشىلار مەن ولاردىڭ جاقتاستارىنا، ازاماتتىق بەلسەندىلەر مەن قۇقىق قورعاۋشىلارعا قارسى ساياسي استارى بار جۇزدەگەن قىلمىستىق ءىس قوزعاعان».

"The Qazaq Times"