بەلارۋستەگى ميتينگ. فوتو: TUT.BY

بەلارۋس قالالارىندا وتكەن نارازىلىق شەرۋلەرىندە قۇقىق قورعاۋ ورگاندارى 600-گە جۋىق قاتىسۋشىنى ۇستادى. بۇل تۋرالى بيلىك رەسمي تىركەمەگەن «ۆەسنا» قۇقىق قورعاۋ ورتالىعى حابارلادى.

ۇيىمنىڭ سايتىندا جاريالانعان جاڭارتىلعان تىزىمدە 585 ادامنىڭ اتى-ءجونى بار. ۇستالعانداردىڭ اراسىندا ساۋلەتشى نيكيتا دومراچەۆ، بياتلوننان ءتورت دۇركىن وليمپيادا چەمپيونى داريا دومراچەۆا بار. سونداي-اق جەكسەنبىدە شەرۋگە شىققان 40-تان استاسم باق وكىلدەرى دە ۇستالعان.

بيلىككە قارسى اكتسيا بەرەزوۆكا، برەست، بوبرۋيسك، ۆيتەبسك، گومەل، گرودنو، جلوبين، كوبرين، موگيلەۆ، مولودەچنو، پرۋجان، سوليگورسك قالالارىندا ءوتتى. مينسكىدە وپپوزيتسيا «ماقتانىش شەرۋىن» وتكىزبەك بولدى، بىراق قاۋىپسىزدىك كۇشتەرى وعان جول بەرمەدى. ميليتسيا دەمونسترانتتارعا سۋ شاشىپ، رەزەڭكە تاياق قولدانعان. 200-دەن استام ادام ۇستالعان.

بۇعان دەيىن بەلارۋس سىرتقى ىستەر مينيسترلىگى شەتەلدىك ءباسپاسوز قۇرالدارىنا جۇمىس ىستەيتىن تىلشىلەردى تۇگەلدەي اككرەديتاتسياسىنان ايىرعان. مينيسترلىك بۇل شەشىمدى شەتەلدىك باق جۋرناليستەرىن اككرەديتاتسيالاۋ ءتارتىبى وزگەرگەندىكتەن قابىلداعانىن ايتتى.

10 قازاندا بەلارۋس پرەزيدەنتى الەكساندر لۋكاشەنكو مەملەكەتتىك ۇلتتىق قاۋىپسىزدىك كوميتەتىنىڭ تەرگەۋ يزولياتورىندا قامالعان وپپوزيتسيا وكىلدەرىمەن كەزدەسكەن. ولاردىڭ ناقتى قانداي ماسەلە جايلى سويلەسكەنى ايتىلمايدى.

9 تامىزدا وتكەن پرەزيدەنت سايلاۋىنان كەيىن ەلدە جاپپاي نارازىلىق ورىن الىپ، ەۋرووداق پەن امەريكا شيرەك عاسىر بيلىك ەتكەن «ەۋروپانىڭ سوڭعى ديكتاتورى» لۋكاشەنكونىڭ جەڭىسىن مويىنداۋدان باس تارتتى. سونىمەن قاتار ەو قۇرامىنداعى 27 مەملەكەت بەلارۋسكە سانكتسيا ەنگىزۋ ماسەلەسىن قاراستىردى. لۋكاشەنكونى «ايقىن جەڭىسىمەن» قۇتتىقتاعان ەلدەر قاتارىندا قىتاي، رەسەي، قازاقستان، وزبەكستان، تاجىكستان بار.

"The Qazaq Times"