فوتو: ۆۆس

بەلارۋستە بيلىككە قارسى وتكەن نارازىلىق اكتسياسىندا 400-دەن استام ادام قاماۋعا الىندى. بۇل تۋرالى بەلارۋس باس پروكۋراتۋراسى حابارلادى.

پروكۋراتۋرا مالىمدەمەسىندە: «قۇقىق بۇزۋشىلىق، قىلمىس جاساعان ازاماتتاردىڭ بارلىعىن جاۋاپكەرشىلىككە تارتامىز. ەلدە ۇلتتىق جانە الەۋمەتتىك قاۋىپسىزدىكتى، مەملەكەت پەن قوعامنىڭ دامۋىن قامتاماسىز ەتۋ ماقساتىندا قۇقىق قورعاۋ ورگاندارىنىڭ جۇمىسى الداعى ۋاقىتتا بۇرىنعىدان دا قارقىندى بولادى»، – دەلىنگەن.

قازىر بەلارۋستە ءتاۋىلسىز جۋرناليستەر مەن ۇيىمداردى ءتىنتۋ، ميتينگكە شىققان ازاماتتاردى تەرگەۋگە الۋ جالعاسىپ جاتىر. بۇگىن رەسمي تىركەلمەگەن «ۆەسنا» قۇقىق قورعاۋ ورتالىعىندا تەرگەۋ جۇمىستارى باستالعان.

17 اقپاننان باستاپ بەلارۋستە پوليتسيا ونداعان جۋرناليست پەن قۇقىق قورعاۋشىلارعا ءتىنتۋ جۇرگىزىپ جاتىر. قاۋىپسىزدىك قىزمەتكەرلەرى 2020 جىلعى نارازىلىق شەرۋلەرىنىڭ شەتەلدەن قارجىلاندىرىلعاندىعى تۋرالى دالەل ىزدەستىرگەن. مينسكىدە ولار بەلارۋس جۋرناليستەر قاۋىمداستىعىنىڭ باسشىلىعىنا دا ءتىنتۋ جۇرگىزدى. كەيىننەن پوليتسيا ۇيىمنىڭ كەڭسەسىنە دە باردى. بۇل تاۋەلسىز ۇيىم 1995 جىلى بەلارۋس جۋرناليستەرىنىڭ رەسمي وداعىنا قارسى قۇرىلعان.

9 تامىز بەلارۋستە پرەزيدەنتتىك سايلاۋ ءوتتى. سول كۇنى وسك الەكساندر لۋكاشەنكونىڭ 80,10% داۋىس جيناپ، جەڭىسكە جەتكەنىن حابارلادى. سايلاۋ ناتيجەلەرىن مويىنداۋدان باس تارتقان سۆەتلانا تيحانوۆسكايا كانديدات رەتىندە 10,12% داۋىس جيناعان. داۋىس بەرۋ قورىتىندىلارى شىعارىلعاننان كەيىن ەلدە جاپپاي نارازىلىق اكتسيالارى باستالدى. ءىرى قاقتىعىستار كەزىندە پوليتسيا شەرۋگە شىققاندارعا قارسى وق اتىپ، كۇشپەن باسىپ-جانشۋعا تىرىستى. قازىر بەلارۋستە جەرگىلىكتى نارازىلىق اكتسيالارى ءالى دە جالعاسۋدا.

"The Qazaq Times"